ކަރަންޓީނުވާންޖެހޭ މުއްދަތު 14 ދުވަހަށްވުރެ ކުރުނުކުރުމަށް ވިލާތުގެ އިއްތިޙާދުން ސަރުކާރުތަކަށް ގޮވާލައިފިއެވެ.
ވިލާތުގެ އިއްތިޙާދަށް ނިސްބަތްވާ އެންމެ ބޮޑު ޤައުމުކަމުގައިވާ ޖަރުމަނުވިލާތުންވަނީ ކަރަންޓީނުގެ މުއްދަތު ކުރު ކުރުމަށް ނިންމާފައިވާކަމަށް ވިލާތުގެ އިއްތިޙާދަށް ވަނީ އަންގައިފައެވެ. މީގެ ކުރިން ނެދަލޭންޑްސާއި ނޯވޭއިންވެސްވަނީ ކަރަންޓީނުކުރާ މުއްދަތު ކުރުކުރުމަށް ނިންމާފައެވެ.
މިދިޔަ ހަފުތާގައި ޖަރުމަނުވިލާތުންވަނީ އޮކްޓޯބަރު މަހުން ފެށިގެން ބަލި ބޮޑަށް ފެތުރެމުންދާ ސަރަޙައްދުތަކުން އެ ޤައުމަށް އަނބުރާ އަންނަ މީހުން ކަރަންޓީނުވާންޖެހޭނީ 5 ދުވަހަށްކަމަށް ނިންމާފައެވެ. ޖަރުމަނުވިލާތުން އަޅާފައިވާ ފިޔަވަޅުތަކަށް ލުއިދޭން ފަށައިފައިވަނީ ވިލާތުގައި ކޯވިޑް-19 ފެތުރޭ މިންވަރު އަނެއްކާވެސް އިތުރުވާން ފަށައިފައިވަނިކޮށެވެ.
ޔޫރަޕިއަން ސެންޓަރ ފޮރ ޑިސީސް ޕްރިވެންޝަން އެންޑް ކޮންޓްރޯލް، އީސީޑީއީގެ އިސްވެރިޔާ، އެންޑްރިއާ އެމޮން ވިދާޅުވީ ކަރަންޓީނުގެ މުއްދަތު ކުރުކުރުމުން ލިބިދާނެ ގެއްލުންތަކާ ގުޅޭ ހެކި ފޯރުކޮށްފިނުމަށް މަސައްކަތްކުރަމުންދާކަމަށެވެ. އޭނާ ވިދާޅުވީ ބަލިޖެހޭ 3 ނުވަތަ 4 އިންސައްތަ މީހުންގެ ހަށިގަނޑުން ބަލީގެ އަސަރު ފެނުމަށް 14 ދުވަހަށްވުރެ ގިނަ ދުވަސްނަގާކަމަށެވެ. އެމޮން ވިދާޅުވީ ވިލާތުގައި ކޮންމެ 100،000 މީހެއްގެ ތެރެއިން 46 މީހުންނަށް މި ހަފުތާގައި ބަލިޖެހިފައިވާކަމަށެވެ. އެއީ މިދިޔަ މާރިޗު މަހުގައި އެންމެ ހަލުވިކޮށް ބަލިފެތުރެން ފެށި ދުވަސްވަރު ބަލިޖެހެމުންދިޔަ މިންވަރާ ގާތްކުރާ އަދަދެއްކަމަށް އޭނާ ވިދާޅުވިއެވެ.
މާރިޗު މަހުގައި ހަލުވިކޮށް ބަލިފެތުރެމުންދިޔަ ދުވަސްވަރު ކޮންމެ 100،000 މީހުންގެ ތެރެއިން 40 މީހުންނަށް ބަލި ޖެހެމުންގޮސް އޭޕްރިލް މަހުގައި އެ ޢަދަދުވަނީ ކޮންމެ 100،000 މީހުންގެ ތެރެއިން 70 މީހުންނަށް އިތުރުވެފައެވެ. ބަލިޖެހޭ މީހުންގެ ޢަދަދު މިހާރު އިތުރުވަމުންދަނީ ތަހުލީލިކުރާ މިންވަރު އިތުރުވަމުންދާތީކަމަށްވުން އެކަށީގެންވާކަމަށް އެމޮން ވިދާޅުވިއެވެ. އޭގެ އިތުރުން ޒުވާނުންގެ މެދުގައި ބަލިފެތުރޭ މިންވަރު އިތުރުވެފައިވާކަމަށްވެސް އެމޮން ވިދާޅުވިއެވެ. އާންމު ގޮތެއްގައި ބަލީގެ ސަބަބުން ޙާލު ދެރަވަމުންދަނީ އުމުރުން ދުވަސްވީ މީހުންކަމުން ފާއިތުވި ދުވަސްތަކުގައި ބަލިޖެހޭ ޒުވާނުންގެ ޢަދަދު އިތުރުވުމުން ހަސްފަތާލުގައި ފަރުވާ ގޯދާ މީހުންގެ ޢަދަދުއޮތީ އެއް މިނެއްގައި ހިފެހެއްޓިފައެވެ. ނަމަވެސް އަނެއްކާވެސް ހަސްފަތާލުގައި އެނދުމަތިކުރަންޖެހޭ މީހުންގެ ޢަދަދު އިތުރުވަމުންދާކަމަށާއި އުމުރުން ދުވަސްވީ މީހުންގެ މެދުގައި ބަލިފެތުރެމުންދާ މިންވަރު އިތުރުވެފައިވާކަން އޭގެން ހާމަކޮށްދޭކަމަށް އޭނާ ވިދާޅުވިއެވެ.
ވިލާތުގެ ޤައުމުތަކުގައި މިހާތަނަށް 3.6 މިލިއަން މީހުންނަށް ކޯވިޑް-19ޖެހި 208،000މީހުންވަނީ މަރުވެފައެވެ. އެ ސަރަޙައްދުގެ ޤައުމުތަކުގެ ތެރެއިން މިދުވަސްވަރު އެންމެ ގިނަ ޢަދަދެއްގެ މީހުންނަށް ބަލިޖެހެމުންދަނީ ސްޕެއިނާއި ފަރަންސޭސިވިލާތާއި ރަޝިޔާގައެވެ.