ދުނިޔޭގެ ޞިއްޙަތު ޖަމުޢިއްޔާ، ޑަބްލިއުއެޗުއޯއަށް އެމެރިކާއިން ދައްކަންޖެހޭ ފައިސާ އެ ޤައުމުން ނުދައްކާނެކަމަށް ބުނެފިއެވެ. އެމެރިކާއިން އެގޮތަށް ނިންމާފައިވަނީ ޑަބްލިއުއެޗުއޯއިން ޗައިނާއާ ގުޅުންބަދަހިކުރާކަމަށާއި ކޯވިޑް-19 ފެތުރޭތީ އެކަށީގެންވާ ފިޔަވަޅު އެ ޖަމުޢިއްޔާއިން އަޅާފައިނުވާކަމަށް ބުނެ އެ ޖަމުޢިއްޔާއިން ވަކިވުމަށް އެމެރިކާއިން ނިންމާފައިވާ ނިންމުމުގެ ދަށުންނެވެ.
އެމެރިކާގެ ނިންމުން އިޢުލާނުކޮށްފައިވަނީ ކޯވިޑް-19އާ ދެކޮޅަށް އުފައްދާ ވެކްސިނެއް ހުރިހާ ޤައުމަކަށްވެސް ލިބޭނެކަން ޔަޤީންކުރުމަށް ޑަބްލިއުއެޗުއޯގެ އެހީތެރިކަމާއެކު 150 ޤައުމަކުން ޤާއިމްކުރަމުންދާ ކޯވިޑް-19 ވެކްސިންސް ގްލޯބަލް އެކްސެސް ފެސިލިޓީ ނުވަތަ ކޯވެކްސްގައި އެމެރިކާއިން ބައިވެރިނުވާނެކަމަށް އިޢުލާނުކުރުމުގެ އެއް ދުވަސް ތެރޭގައެވެ.
2020ވަނަ އަހަރު އެމެރިކާއިން 120 މިލިއަން އެމެރިކާ ޑޮލަރު ޑަބްލިއުއެޗުއޯއިން ދައްކަންޖެހެއެވެ. މިހާތަނަށް އެމެރިކާއިން ދައްކާފައިވަނީ އޭގެ ތެރެއިން 52 މިލިއަން އެމެރިކާ ޑޮލަރެވެ. އެމެރިކާގެ ނިންމުމާއެކު ޞިއްޙަތު ޖަމުޢިއްޔާއަށް ލިބެންޖެހޭ 62 މިލިއަން ޑޮލަރުން އެ ޖަމުޢިއްޔާ މަހުރޫމުވާނެއެވެ. ޞިއްޙަތު ޖަމުޢިއްޔާއަށް އެމެރިކާއިން ދައްކަންޖެހޭ 62 މިލިއަން އެމެރިކާ ޑޮލަރު އެ ޖަމުޢިއްޔާއަށް ދެއްކުމުގެ ބަދަލުގައި އދ.އަށް ދައްކަންޖެހޭ އެހެނިހެން ފައިސާ ދެއްކުމަށް ބޭނުންކުރާނެކަމަށް އެ ޤައުމުންވަނީ ބުނެފައެވެ. ނަމަވެސް އޭގެ ތަފްޞީލެއް ހާމަކޮށްފައެއް ނުވެއެވެ.
މިދިޔަ ޖުލައި މަހުގައި ޑަބްލިއުއެޗުއޯއިން ރަސްމީކޮށް ވަކިވުމަށް އެމެރިކާއިންވަނީ ހުށަހަޅާފައެވެ. އެ ޖަމުޢިއްޔާއިން ވަކިވާން ހުށަހެޅުމާ ވަކިވުމާ ދޭތެރެ ހޭދަވާ އެއް އަހަރު ދުވަހުގެ ތެރޭގައި ޑަބްލުއެޗުއޯގެ ބައެއް ބައްދަލުވުންތަކުގައި އެމެރިކާއިން ބައިވެރިވާނެކަމަށާއި އެމެރިކާގެ މަސްލަހަތާ ގުޅުންހުރި ކަންކަމުގައި އެ ޖަމުއިއްޔާއިން ބާއްވާ ބައްދަލުވުންތަކުގައި ބައިވެރިވާނެކަމަށްވަނީ ބުނެފައެވެ. އަދި އެ މުއްދަތުގެ ތެރޭގައި އަފްޣާނިސްތާނާއި ޕާކިސްތާނުން ޕޯލިއޯ ނައްތާލުމަށް ކުރާ މަސައްކަތަށާއި ލީބިޔާއާއި ސޫރިޔާއަށް އެހީތެރިކަން ފޯރުކޮށްދިނުމަށް އެއް ފަހަރުގެ މަތިން ފައިސާދޭނެކަމަށްވަނީ ބުނެފައެވެ. އޭގެ އިތުރުން އިންފުލުއެންޒާއާ ދެކޮޅަށް ކުރާ މަސައްކަތަށްވެސް އެ އުސޫލުން ފައިސާދޭނެކަމަށްވަނީ ބުނެފައެވެ.