ބޮޑު ގޮވުންތަކެއް ގޮވުމުގެ ސަބަބުން ސުންނާފަތިވެފައިވާ ބައިރޫތު އާރާސްތު ކުރުމަށް ލިބޭ މާލީ އެހީތެރިކަން އެންމެ ބޭނުން ޖެހިފައިވާ ދާއިރާތަކަށް ޚަރަދުކުރުން މުހިންމުކަމަށް ލުބުނާނުގެ ރައީސް މިޝެލް އައުން ވިދާޅުވެއްޖެއެވެ.
އޮގަސްޓު މަހުގެ 4ވަނަ ދުވަހު ބައިރޫތުގެ ގުދަނެއްގައި ރޯވެ ހިނގި ގޮވުންތަކުގައި އެ ސިޓީއަށްވަނީ ބޮޑެތި ގެއްލުންތައް ލިބިފައެވެ. އެ ހާދިޘާގައި 178 މީހުން މަރުވިއިރު 6000އަށްވުރެ ގިނަ މީހުންވަނީ ޒަޚަމްވެފައެވެ. އަދި ގިނަ ޢަދަދެއްގެ މީހުންވަނީ ވީނުވީއެއް ނޭނގި ގެއްލިފައެވެ. 300،000އަށްވުރެ ގިނަ މީހުންގެ ގެދޮރު ގެއްލި، 6 ހަސްފަތާލާއި 20 ކުލިނިކާއި 120އަށްވުރެ ގިނަ މަދަރުސާވަނީ ބިމާހަމަވެފައެވެ. ގޮވުންތަކުގެ ޒިންމާ ސަރުކާރުން ނަގަންޖެހޭކަމަށް ބުނެ ބޮޑެތި މުޒާހަރާތައް ކުރުމުން އެ ޤައުމުގެ ސަރުކާރުވަނީ އިސްތިޢުފާދީފައެވެ.
އެ ޤައުމަށް އެހީތެރިވުމަށް އދން ވަނީ 565 މިލިއަން އެމެރިކާ ޑޮލަރު ހޯދުމަށް ދުނިޔޭގެ އެހީތެރިކަމަށް އެދިފައެވެ. އެހީތެރިކަން ފޯރުކޮށްދޭނެކަމުގެ ޔަޤީންކަން ގިނަ ޤައުމުތަކަކުންވަނީ ދީފައެވެ. ނަމަވެސް ކޮރަޕްޝަނުގެ މައްސަލަތައް އިންތިހާއަށް ބޮޑު ލުބުނާނުގެ ރައްޔިތުންނާ ހަމައަށް އެހީތެރިކަން ފޯރާނެކަމާމެދު އެމީހުންގެ ހިތުގައިވަނީ ޝައްކު އުފެދިފައެވެ.
ފަރަންސޭސިވިލާތުގެ ނޫހެއްކަމަށްވާ ބީއެފްއެމް ޓީވީއާ ވާހަކަދައްކަވަމުން އައުން ވިދާޅުވީ ޤައުމުތަކުން ދޭ ފައިސާގެ އެހީތެރިކަން އެންމެ މުހިންމު އަދި ބޭނުންޖެހިފައިވާ ދާއިރާތަކަށް ޚަރަދުކުރުމަށް އަންގަވާފައިވާކަމަށެވެ. ގޮވުންތަކުގެ ތަހުޤީޤުގައި އެ ހާދިޘާ ހިންގުމަށް މެދުވެރިވި ގޮތް ދިރާސާކުރަމުންދަނީ ހުރިހާ ޙާލަތަކަށްވެސް ބަލަމުންކަމަށްވެސް ރައީސް އައުން ވިދާޅުވިއެވެ. އޭނާ އިތުރަށް ވިދާޅުވީ ރައީސް ކަމުން އިސްތިޢުފާދެއްވުމުގެ ޚިޔާލު ނުގެންގުޅުއްވާކަމަށެވެ.
އދ ބުނީ ގޮދަން ރައްކާކުރާ ޓަވަރެއް ގޮވުމުގެ ތެރޭގައި ހަލާކުވެފައިވާތީ އދން އެންމެ މުހިންމުކަމެއް ދޭނީ ގޮދަން ފޯރުކޮށްދިނުމަށެވެ. އަދި ހާދިޘާ ހިންގި ސަރަޙައްދުގައި ތިން ހަސްފަތާލު އިމާރާތްކުރާނެކަމަށް އދއިންވަނީ ބުނެފައެވެ.