ބްރެޒިލުން ޗައިނާއަށް އެތެރެކުރި "ޗިކަން ވިންގް" ތަކެއް ކޯވިޑަށް ޕޮޒިޓިވްވެފައިވާކަމަށް ޗައިނާއިން ބުނެފިއެވެ.
ޗައިނާގެ ޝެންޒެންގެ ކަމާއި ގުޅޭ އިދާރާތަކުން ބުނީ މިތަކެތި ކޯވިޑަށް ޕޮޒިޓިވްވެފައިވާކަން އެނގުނީ އެޤައުމަށް އެތެރެކުރާ ބައެއް ތަކެތި ސްކްރީންކުރުމުގެ ތެރެއިން ކަމަށެވެ. އެހެންނަމަވެސް މީ ކޮން ބްރޭންޑެއް އުފެއްދުންތަކެއްކަމަށް ޗައިނާގެ ކަމާއި ބެހޭ އިދާރާތަކުން ހާމައެއް ނުކުރެއެވެ.
ސިއްހީ މާހިރުންނާއި ދުނިޔޭގެ ސިއްހަތު ޖަމިއްޔާއިންވެސް މިހާތަނަށް ބުނެފައިވަނީ ކާތަކެތިން ކޯވިޑް ޖެހުމުގެ ފުރުސަތު ވަރަށް ކުޑަކަމަށެވެ.
ޝެންޒެންގެ ސިއްހީ އިދާރާތަކުން ބުނީ ޗިކަން ވިންގްތައް ކޯވިޑަށް ޕޮޒިޓިވްވުމުން އެ ބޭނުންކުރި ބައެއް މީހުން ހޯދާ ޓެސްޓްކުރިއިރު އެކަކުވެސް އެ ބައްޔަށް ޕޮޒިޓިވްވެފައި ނުވާކަމަށެވެ. އަދި ސްޓޮކްގައި ބާކީ ހުރި ހުރިހާ އެއްޗެއް ޓެސްޓްކުރި އިރުވެސް އެތަކެތިވެސް ނެގްޓިވްކަމަށް ޓެސްޓުތަކުން ދައްކާފައިވާކަމަށެވެ.
މި ބްރޭންޑްްގެ ބައެއް ތަކެތި ވިއްކިފައިވާތީ އެތަކެތި ގަތް މީހުން ހޯދުމުގެ މަސައްކަތް އަދިވެސް ކުރަމުން އަންނަކަމަށްވެސް ޗައިނާގެ ކަމާއި ގުޅޭ އިދާރާތަކުން ހާމަކުރެއެވެ. އަދި އެތަކެތި ރައްކާކޮށްފައިވާ ތަން ޑިސްއިންފެކްޓްކޮށް ޕޮޒިޓިވްކަމަށް ދެއްކި ތަކެތި ނައްތާލާފައިވާކަމަށްވެސް ޗައިނާއިން ބުނެއެވެ.
ބްރެޒިލްގެ ކަމާއި ގުޅޭ އިދާރާތަކުން ބުނެފައިވަނީ އެޤައުމުން އެކްސްޕޯޓްކުރި ތަކެތި ކޯވިޑްއަށް ޕޮޒިޓިވްވެފައިވާތީ އެކަން ބަލަމުން އަންނަކަމަށެވެ. އެހެންނަމަވެސް ކަމާއި ގުޅޭ އެއްވެސް އިދާރާއަކުން މަހުގެ ބާވަތްތަކުގައި މި ވައިރަސް ފެތުރޭކަން އެނގިފައިނުވާތީ މި ތަކެއްޗަށް މި ވައިރަސް އަރާފައިވަނީ އެތަކެތި ބަންދުކުރުމުގެ ތެރޭގައިތޯ ބަލަމުން އަންނަކަމަށެވެ.
ކުުކުޅުގެ ބާވަތަކުން ކޯވިޑްގެ ވައިރަސް ފެނުނުކަން ޗައިނާއިން ބުނެފައި މިވަނީ އިކުއަޑޯއިން އެތެރެކުރި ޑިންގާތަކުން އެބަލީގެ އަސަރު ފެނުނުކަމަށް އެޤައުމުން ބުނިތާ އެއްދުވަސްފަހުންނެވެ.