މިރޭ އައިޖީއެމްއެޗަށް ގެންދިޔަ އިރު ނިޔާވެފައިވާ އުމުރުން ދުވަސްވީ މީހަކު، ކޯވިޑް-19އަށް ޕޮޒިޓިވްވެފައިވާކަމުގައި އެޗްއީއޯސީން ހާމަކުރައްވައިފިއެވެ.
އެޗްއީއޯސީގެ ތަރުޖަމާނު ޑރ ނަޒްލާ ރަފީޤު ވިދާޅުވީ، މިރޭ އިރުއޮއްސި 7 ޖެހިއިރު އައިޖީއެމްއެޗަށް ގެންދިޔަ އުމުރުން 83 އަހަރުގެ ދިވެހި ފިރިހެންމީހާ ހޮސްޕިޓަލަށް ގެނެވުނު އިރުވެސް ވަނީ ނިޔާވެފައި ކަމަށެވެ. އަދި ކޯވިޑް-19އަށް ޓެސްޓްކުރި އިރު އެމީހާގެ ނަތީޖާ ޕޮޒިޓިވްވެފައިވާ ކަމުގައި ޑރ ނަޒްލާ ވިދާޅުވިއެވެ.
ޑރ ނަޒްލާ ވިދާޅުވީ، އެމީހާގެ ކިބައިގައި ނިޔާވިއިރު، ކޯވިޑް-19ގެ އެއްވެސް އަލާމާތެއް ނެތްކަމަށާއި، އަދި އެމީހާގެ މަރަކީ ކޯވިޑް-19ގެ މަރެއްގެ ގޮތުގައި ގުނުމާއި މެދު އަދި ވަކިގޮތެއް ނުނިންމާ ކަމަށެވެ.
އިއްޔެވެސް ރާއްޖެއިން މިބަލީގައި މީހަކު މަރުވި އިރު އޭގެ ކުރީދުވަހުވެސް ވަނީ މީހަކު މަރުވެފައެވެ.
މިހާތަނަށް ރާއްޖެއިން 21 މީހަކު ވަނީ ކޯވިޑް-19އަށް ޕޮޒިޓިވްވެ އެބަލީގައި ނިޔާވެފައެވެ.