ސެމްސަންގެ ނޯޓް 20 އަދި ނޯޓް 20 އަލްޓްރާ ލޯންޗްކޮށްފި

ސެމްސަންގ ނޯޓް 20 އަދި ނޯޓް 20 އަލްޓްރާ ލޯންޗްކޮށްފިއެވެ.

އޮންލައިންކޮށް ބޭއްވި ބައްދަލުވުމެއްގެ ތެރެއިން ސެމްސަންގެ އާ ފޯނުތައް ލޯންޗުކޮށްފައިވާއިރު، ނޯޓް 20 އަދި ނޯޓް 20 އަލްޓްރާގެ އިތުރުން ފަތްޖަހާލެވޭ ގެލެކްސީ ޒީ ފޯލްޑް 2 ވެސް ވަނީ ލޯންޗުކޮށްފައެވެ. މީގެއިތުރުން ސެމްސަންގެ ޓެބްލެޓްކަމަށްވާ، ޓެބް އެސް 7 އަދި ޓެބް އެސް 7 ޕްލަސްއާއި ގެލެކްސީ ބަޑްވެސް ވަނީ ލޯންޗުކޮށްފައެވެ.

ސެމްސަންގްގެ އެންމެ ފަހުގެ ފޯނުތައް ލޯންޗްކުރިނަމަވެސް މި ސީރީޒް ބާޒާރުން ލިބެންހުންނާނީ މިމަހުގެ 21 ގައެވެ. އެންމެ ފަހުގެ ގެލެކްސީ ނޯޓް 20 އަދި ނޯޓް 20 އަލްޓްރާ ގައި ބޭނުންކުރުމަށް އެސްޕެން ވަނީ ހިމަނާފައެވެ. އެސްޕެންގެ ރޭންޖް އިތުރުކޮށް ދުރުން ފޯނާއި ގުޅެވޭނެ ގޮތް ވަނީ ހަމަޖައްސާފައެވެ.

ކެމެރާއަށް ބަލާއިރު ނޯޓް 20 ގައި ހިމެނެނީ 12 މެގަޕިކްސެލް އަލްޓްރާ ވައިޑް ކެމެރާއަކާއި، ވައިޑް އޭންގަލް ކެމެރާއެކެވެ. އަދި 64 މެގަޕިކްސެލް ޓެލެފޮޓޯ ކެމެރާއެކެވެ. ނޯޓް 20 އަދި ނޯޓް 20 އަލްޓްރާ ގެ ޕްރޮންޓް ކެމެރާގައި ހިމެނެނީ 10 މެގަޕިކްސެލްއެވެ. ނޯޓް 20 އަލްޓްރާ ގެ ބެކް ކެމެރާއަށް ބަލާއިރު ހިމެނެނީ 108 މެގަޕިކްސެލްގެ ކެމެރާއަކާއި، 12 މެގަޕިކްސެލް ވައިޑް ކެމެރާއަކާއި، 108 މެގަޕިކްސެލް ވައިޑް އޭންގަލް ކެމެރާއެކެވެ. ނޯޓް 20 ސީރީޒްގައި ވިންޑޯސް 10 ގައި ހިމެނޭފަދަ އޮޓޯސޭވް ކުރެވޭނެ ފިއުޗަރ ވަނީ ހިމަނާފައެވެ. އެގޮތުން މި ފޯނުގައި ނޯޓްސް ނަގަމުންދާ ވަގުތުގައި އޯޑިއޯވެސް ރެކޯޑް ކޮށްލެވޭނެއެވެ.

ފަތްޖަހާލެވޭ ގެލެކްސީ ފޯލްޑް ޒީ ޓޫއަށް ބަލާލާއިރު، ކުރީގެ ފަތްޖަހާލެވޭ ފޯނުގެ ކަވަރ ސްކްރީނަަށްވުރެ، ފަހުގެ ފޯނުގެ ކަވަރ ސްކްރީން ވަނީ ބޮޑުކޮށްފައެވެ. އެގޮތުން 4.6 އިންޗިން 6.2 އިންޗިއަށް ކަވަރ ސްކްރީން ވަނީ ބޮޑުކޮށްފައެވެ. އަދި އިންޓަރނަލް ޑިސްޕްލޭ ވަނީ 7.3 އިންޗިން 7.6 އިންޗިއަށް ބޮޑުކޮށްފައެވެ. މީގެއިތުރުން ސެމްސަންގެ ކުރީގެ ފަތްޖަހާލެވޭ ފޯނާ އަޅާބަލާއިރު، ފަހުގެ ފޯނަށް ވަނީ ކުރިއެރުންތަކެއް ގެނެސްފައެވެ.

ސެމްސަންގއިން ނެރުނު އެހެން އުފެއްދުންތަކަކީ، ގެލެކްސީ ބަޑްސް ލައިވް، ގެލެކްސީ ވޮޗް ތްރީ، އަދި ގެލެކްސީ ޓެބް ސެވަން އަދި ގެލެކްސީ ޓެބް ސެވަން ޕްލަސްއެވެ. މި އުފެއްދުންތަކަކީވެސް އެންމެފަހުގެ ޓެކްނޮލޮޖީ ހިމަނައިގެން ނެރެފައިވާ އުފެއްދުންތަކެކެވެ.

ސެމްސަންގއިން އަލަށް ނެރުނު ފޯނުތަކުގެ އަގުތައް ކަނޑައަޅާފައެއް ނުވެއެވެ. އެކުންފުނިން ބުނީ އަގުތައް އިޢުލާންކުރާނީ ސެޕްޓެމްބަރުމަހުކަމަށެވެ.