ޖީ7ގައި ރަޝިޔާ އަލުން ހިމެނުމަށް ޖަރުމަނުވިލާތުން ދެކޮޅުހަދައިފިއެވެ،
ޖީ8ގެ ޤައުމެއްގެ ގޮތުގައި 1997ވަނަ އަހަރުން ފެށިގެން އޮތް ރަޝިޔާ އެ ޖަމާޢަތުން ވަކިކޮށްފައިވަނީ 2014ވަނަ އަހަރު އެ ޤައުމުގެ ބާރުގެ ދަށަށް ޔުކްރެއިނުގެ ކުރިމިޔާ ގެނައުމުންނެވެ. އެ ސަރަޙައްދު އަދިވެސް އޮތީ ރަޝިޔާގެ ބާރުގެ ދަށުގައެވެ. ޖީ7 އުފެދުނީ ޖީ8ން ރަޝިޔާ އުނިކުރުމުންނެވެ. ޖީ7ގައި ރަޝިޔާ ހިމަނައި އަލުން ޖީ8 އެކުލަވާލުމަށް އެމެރިކާގެ ރައީސް ޑޮނަލްޑު ޓުރަންޕުވަނީ ހުށަހަޅުއްވައިފައެވެ. ނަމަވެސް އަލުން ޖީ8 އެކުލަވާލުމަށް ޖީ7ގެ ގިނަ ޤައުމުތަކުން ތާޢީދެއް ނުކުރެއެވެ.
ޖަރުމަނުވިލާތުގެ ނޫހަކަށް ދެއްވި ބަސްދީގަތުމެއްގައި އެ ޤައުމުގެ ޚާރިޖީ ވަޒީރު ހައިކޯ މާސް ވިދާޅުވީ އެމެރިކާގެ ހުށަހެޅުމަށް ރަޝިޔާއިން ދެކޮޅުހަދާފައިވާކަމަށެވެ. މާސް ވިދާޅުވީ ކުރިމިޔާއާއި އިތުމަތީ ޔުކުރެއިނުގެ މައްސަލައަށް އެދެވޭ ޙައްލެއް ނުހޯދައި ޖީ8ގައި އަލުން ރަޝިޔާ ހިމެނުމަށް އެއްވެސް ފުރުޞަތެއް އޮތްކަމަށް ޤަބޫލުނުކުރައްވާކަމަށެވެ.
ޖީ7އަށް ރަޝިޔާގެ އިތުރުން އެހެން ޤައުމުތައްވެސް އިތުރުކުރުމަށް އެމެރިކާގެ ރައީސް ހުށަހަޅުއްވާފައިވާ ހުށަހެޅުމަށް އިޝާރާތްކުރައްވާ މާސް ވިދަޅުވީ ޖީ7އާއި ޖީ20 އެކުލަވާލައިފައިވަނީ ޙިކުމަތްތެރި ގޮތަކަށްކަމަށެވެ. ޖީ11 ނުވަތަ ޖީ12އެއްގެ ބޭނުމެއް ނެތްކަމަށް އޭނާ ވިދާޅުވިއެވެ. ޖީ7ގައި ނުހިމެނުނަމަވެސް ޖީ20ގެ ޤައުމެއްގެ ގޮތުގައި ރަޝިޔާ ހިމެނެއެވެ.
މާސް ވިދާޅުވީ ޖަރުމަނުވިލާތާއި ރަޝިޔާއާ ދެމެދު އޮންނަނީ އުނދަގޫ ގުޅުމެއްކަމަށެވެ. ނަމަވެސް ސޫރިޔާއާއި ލީބިޔާއާއި ޔުކްރެއިނުގެ މައްސަލަތައް ޙައްލުކުރުމަށް ރަޝިޔާގެ ބައިވެރިވުން މުހިންމުކަމަށްވެސް އޭނާ ވިދާޅުވިއެވެ.