ކޯވިޑް-19 ފެތުރޭ މިންވަރު ވަރަށް ބޮޑަށް އިތުރުވުމުގެ ސަބަބުން މަޢުރިބުގެ ބޮޑެތި ސިޓީތައް ފުރަބަންދުކުރަން ނިންމައިފިއެވެ.
އޮގަސްޓު މަހުގެ 10ވަނަ ދުވަހުގެ ނިޔަލަށް ކުއްލި ނުރައްކަލުގެ ޙާލަތު އިޢުލަނުކޮށްފައިވާ މަޣުރިބުގައި 20،278 މީހުންނަށް ކޯވިޑް-19 ޖެހި، 313 މީހުންވަނީ މަރުވެފައެވެ. ރައްކާތެރިކަމުގެ ފިޔަވަޅެއްގެ ގޮތުން މުޅި ޤައުމު ފުރަބަންދުކުރުމަށްފަހު މިދިޔަ މަހުގެ ތެރޭގައި އެ ޤައުމުގައި އިޢުލާންކޮށްފައިވާ ފުރަބަންދުވަނީ އުވާލައިފައެވެ. އަދި ބޭރަށް ނުކުތުމުގައި މާސްކު ބޭނުންކުރުމަށްވެސް އެ ޤައުމުގެ ސަރުކާރުންވަނީ ލާމިޒުކޮށްފައެވެ. އެ ޤައުމުގައި އިޢުލާންކޮށްފައިވާ ފުރަބަންދު އުވާލިނަމަވެސް ބައިނަލްއަޤުވާމީ ދަތުރުތައް އަލުން ފަށައިފައެއް ނުވެއެވެ.
މަޣުރިބުގެ ޞިއްޙަތަބެހޭ ވުޒާރާއިން ބުނީ ފާއިތުވި 24 ގަޑިއިރުގެ ތެރޭގައި 633 މީހުންނަށް ކޯވިޑް-19 ޖެހިފައިވާކަމަށެވެ. ބަލި ފެތުރޭ މިންވަރު ވަރަށް ބޮޑަށް އިތުރުވުމުން މަޣުރިބުގެ އިޤްތިޞާދީ މައި ސަރަޙައްދުކަމުގައިވާ ދާރުއްބައިޟާއާއި މަރާކިޝް ފުރަބަންދުކުރަން ނިންމާފައިވާކަމަށް އެ ޤައުމުގެ ދާޚިލީ އަދި ޞިއްޙަތާބެހޭ ވުޒާރާއިންވަނީ އިޢުލާނުކޮށްފައެވެ. އޭގެ ސަބަބުން އެ ޤައުމުގެ ހީނަރުވަމުންދާ އިޤްތިޞާދު އިތުރަށް ބަލިކަށިވާނެކަމަށް ބެލެވެއެވެ. މި އަހަރުގެ ތެރޭގައި 7.5 އިންސައްތައިގެ ބަޖެޓު ޑިފިސިޓެއް ކުރިމަތިވެ، އެ ޤައުމުގެ އިޤްތިޞާދު 5 އިންސައްތައަށް ހީނަރުވާނެކަމެއްވަނީ އަންދާޒާކޮށްފައެވެ.