ޓުއަރިޒަމް މިނިސްޓްރީގެ ސްޓޭޓް މިނިސްޓަރ އަހްމަދު ސާލިހު މައްޗަށް ދައުވާކުރާ މައްސަލައިގެ އަޑުއެހުންތައް މިއަދު ފަށައިފިއެވެ.
ސާލިހުގެ މައްޗަށް އުފުލާފައިވަނީ ރަސްމީ ހައްސިއްޔަތު ނަހަމުގޮތުގައި ބޭނުންކުރުމުގެ ކުށުގެ ދައުވާއެވެ. ދައުލަތުން ސާލިހާއި ދެކޮޅަށް ދައުވާ އުފުލާފައިވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޚިޔާނާތާއި ގުޅިގެން އެސެޓް ރިކަވަރީ ކޮމިޝަނުން ކުރިޔަށް ގެންދިޔަ ތަހުޤީގަކާއި ގުޅިގެންނެވެ.
މި ދައުވާގައި ބުނެފައިވަނީ ކ. އަތޮޅުގެ ދެ ފަޅަކާއި ވ. ފިތްތެޔޮފުށިން ދައުލަތަށް ލިބެންޖެހޭ ކުލި ލިބިފައި ނުވާތީ އެެތަންތަނުގެ ހެޑް ލީސް ބަދަލުނުކުރުމަށް އަންގާފައިވަނިކޮށް އެތަންތަނާއި ގުޅޭ އެއްވެސް ތަހުޤީގެއް ނުހިންގާކަމަށް ބުނެ ބައެއް ފަރާތްތަކަށް ސާލިހް ސިޓީ ފޮނުވާފައިވާކަމަށެވެ. އެހެންކަމުން އޭނާގެ މި އަމަލަކީ ބަޔަކަށް ނަހަމު ގޮތުގައި މަންފާއެއް ހޯދާދިނުމަށް ރަސްމީ ހައްސިއްޔަތު ނަހަމުގޮތުގައި ބޭނުންކުރުންކަމަށްވެސް ދައުލަތުގެ ދައުވާގައިވެއެވެ.
މި ދައުވާ އިއްވުމުން ސާލިހްގެ ފަރާތުން ވާހަކަދައްކަވަމުން ވަކީލް އަބްދުﷲ ޝާއިރުވަނީ ދައުވާ ސާފުނުވާކަމަށް ވިދާޅުވެ ގިނަ ސުވާލުތަކެއް އުފައްދަވާފައެވެ. އެގޮތުން ދައުވާކުރަނީ ކޮމިޝަންގެ އެންގުމަކާއި ހިލާފުވެގެންތޯ ނުވަތަ ސިޓީ ފޮނުވައިގެންތޯ ސުވާލު ކުރައްވާފައިވެއެވެ.
މި ސުވާލުތަކަށް ޖަވާބުދެއްވަމުން ދައުލަތުގެ ވަކީލު ވިދާޅުވީ ކުއްޔަށް ދީފައިވާ ރަށްތަކުން ދައުލަތަށް ލިބެންޖެހޭ ފައިސާ ނުލިބޭކަން ސާލިހަށް އެގޭނެކަމަށެވެ. އަދި ރިޔާސީ ކޮމިޝަނުން ވަކި އެންގުންތަކެއް އަންގާފައިވަނިކޮށް އެކަން އެނގިހުރެ އެއާއި ހިލާފު މައުލޫމާތުތަކެއް ސާލިހް ފޯރުކޮށްދިނީ ނުރަނގަޅު ނިޔަތެއްކަމަށްވެސް ދައުލަތުގެ ވަކީލް ވިދާޅުވިއެވެ.
ސާލިހް ވަނީ ދައުވާއަށް އިންކާރުކޮށްފައެވެ. އަދި ދިފާއީ ހެކީގެ ގޮތުގައި ބައެއް ވަޒީރުންނާއި ގިނަ ލިޔުންތަކެއް ވަނީ ހުށައަޅާފައެވެ. މިގޮތުން ހެކީގެ ގޮތުގައި ހުށައަޅާފައިވަނީ ކުރީގެ ޓްއަރިޒަމް މިނިސްޓަރ އަލީ ވަހީދާއި. ފިނޭންސް މިނިސްޓަރ އިބްރާހިމް އަމީރާއި، ޓްރާންސްޕޯޓް މިނިސްޓަރ އައިޝަތު ނަހުލާއާއި، ޕްލޭނިން މިނިސްޓަރ މުހައްމަދު އަސްލަމާއި އިކޮނޮމިކް މިނިސްޓަރ ފައްޔާޒު އިސްމާއިލާއި ކޮމިއުނިކޭޝަން މިނިސްޓަރ މަލީހު ޖަމާލާއި ރައީސް އޮފީހުގެ ސްޓޭޓް މިނިސްޓަރ އަލީ ޝިޔާމްއެވެ. މީގެއިތުރުން އެސެޓް ރިކަވަރީ ކޮމިޝަންގެ ރައީސް އަހްމަދު އައްސަދާއި ޓްއަރިޒަމް މިނިސްޓްރީގެ ބައެއް މުވައްޒަފުންވެސް ދިފާއީ ހެކީގެ ގޮތުގައިވަނީ ހުށައަޅާފައެވެ.
ދައުލަތުން ހެކީގެ ގޮތުގައި ހުށައެޅީ ޓުއަރިޒަމް މިނިސްޓްރީގެ ދެ މުވައްޒަފެކެވެ. މީގެއިތުރުން ބައެއް ލިޔެކިޔުންތައް ހެކީގެ ގޮތުގައި ހުށައަޅާފައިވެއެވެ.
މައްސަލަ ބައްލަވާ ގާޒީ އިބްރާހިމް އަލީ ވިދާޅުވީ ހެކިން ބަލައިގަތުމާއި ގުޅޭ ގޮތުން ގޮތެއް ނިންމާނީ ދެން އޮންނަ އަޑުއެހުމެއްގައިކަމަށެވެ. އަދި މި މައްސަލަ ކުރިޔަށް ގެންދެވޭނެކަމަށް ކަނޑައަޅާ ދެން އޮންނަ އަޑުއެހުމުގައި ދެ ފަރާތުން ހުށައަޅަންޖެހޭ ހުށައެޅުންތައް ހުށައެޅުން އޮންނާނެކަމަށްވެސް މައްސަލަ ބައްލަވާ ގާޒީ ވިދާޅުވިއެވެ.
ޓްއަރިޒަމް މިނިސްޓްރީގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ އަހްމަދު ސާލިހު މި މައްސަލައާ ގުޅިގެން ހުރީ ސަސްޕެންޑްކޮށްފައެވެ.
ކޯޓްގެ ވަގުތު
ބަލަގަ އެއްމެގޯސްވެގެންވެސް ތިކަމަކީ، އެޑްމިނިސްޓްރެޓިވް ކުށަކަށްވުރެ ބޮޑެއްނުވާނެ. ދެން ކޯޓުގެ ވަގުތުބޭރުކުރަން ރާއްޖޭގެ އެކިއެކި ސަރުކާރުތަކުގައި ޓޫރިޒަމަށް އެއްމެ އަގުހުރި ޚިދްމަތްކޮށްދެއްވި ތަޖްރިބާކާރު، އަދި ޓޫރިޒަމް ދާއިރާގައި ދުނިޔޭގެ ފެންވަރުހުރި ހަމައެކަނި ދިވެހި ދަރިއަށް އަނިޔާދިނުމުގެ ބޭނުމަކީކޮބާ. ކޯޓަށްނުގޮސްއާ ސިޓީއަކުން ހަމަޖައްސާލެވޭނެކަމެއްގައިކޯޓަށް ދިޔުމަކީ ބޮޑުއިސްރާފެއް. ޚާއްސަކޮށް ކޯޓުންނާއި ތިކަމިޝަނުންކުރަންޖެހޭ 'އަސްލު މައްސަލަ' އެއޮތީ! ެއަދިނަހަމަ ނުވަތަ "ނުރަގަޅު ނިޔަތެއް'ގައި ކުރިކަމަކަށް ޝައްކުކުރެވެއޭ ބުންޏަސް، އެކަހަލަ ނިޔަތެއްގައިކުރިކަމުގެ ސީދާހެކިދައްކަންޖެހޭނެ.