ކޯވިޑް-19 ފެތުރުން ހުއްޓުވުމަށް އަޅާ ފިޔަވަޅެއްގެ ގޮތުގައި ބަންދުވެފައި ހުންނަ ޢާންމު ތަންތަނުގައި ދުންފަތުގެ އިސްތިޢުމާލުކުރުން އުރުދުންގައި މަނާކޮށްފިއެވެ.
އުރުދުންގައިވަނީ 1،133 މީހުންނަށް ކޯވިޑް-19 ޖެހި، 9 މީހުން މަރުވެފައެވެ. 10 މިލިޔަން މީހުންގެ އާބާދީއެއް އޮންނަ އުރުދުންނަކީ އާބާދީގެ ނިސްބަތުން އެންމެ ގިނަ ޢަދަދެއްގެ މީހުން ދުންފަތުގެ އިސްތިޢުމާލުކުރާ އެއް ޤައުމެވެ. އެ ޤައުމުގައި ކޮންމެ 10 ފިރިހެނުންގެ ތެރެއިން 8 މީހުން ދުންފަތުގެ އިސްތިޢުމާލުކުރެއެވެ.
އުރުދުންގެ ޞިއްޙަތާބެހޭ ވުޒާރާއިން ބުނީ ދުންފަތުގެ އިސްތިޢުމާލުކުރާ މީހުންނަށް ކޯވިޑް-19 ޖެހުމުގެ ފުރުޞަތު ބޮޑުކަމަށާއި ބަލީގެ ސަބަބުން ދިމާވާ ޞިއްޙީ މައްސަލަތައް ބޮޑުކަމަށް ދުނިޔޭގެ ޞިއްޙަތު ޖަމްޢިއްޔާއިން ފާހަގަކޮށްފައިވާކަމަށެވެ. އެހެންކަމުން ޤައުމުގެ ރައްޔިތުންގެ ޞިއްޙަތާއި ސަލާމަތްތެރިކަން ރައްކާތެރިކުރުމަށް ބަންދުވެފައި ހުންނަ ޢާންމު ތަންތަނުގައި ސިނގިރޭޓު ބުއިމާއި އީސިނގުރޭޓު ބޭނުންކުރުމާއި ޝީޝާ ބުއިން މަނާކޮށްފައިވާކަމަށް އެ ވުޒާރާއިންވަނީ ބުނެފައެވެ.
2008ވަނަ އަހަރުން ފެށިގެން ޢާންމު ތަންތަނުގައި ސިނގިރޭޓު ބުއިން އުރުދުންގައިވަނީ މަނާކޮށްފައެވެ. ނަމަވެސް އެ ޤައުމުގައި މަޤުބޫލު އީސިނގިރޭޓާއި ޝީޝާ ބުއިން އޭރު މަނާކޮށްފައެއް ނުވެއެވެ. ޤަވާއިދަށް ގެނައި ބަދަލާއެކު ދުންފަތުގެ އިސްތިޢުމާލުކުރުން މަނާވާނީ ހަމައެކަނި އެއްކޮށް ބަންދުވެފައި ހުންނަ ޢާންމު ތަންތަނުގައި އެކަންޏެވެ.
އުރުދުންގެ ސަރުކާރުން ނިންމި ނިންމުމުގެ ސަބަބުން ދުންފަތުގެ ވިޔަފާރިއަށް މާބޮޑު ބަދަލެއް އަންނާނެކަމަކަށް ގިނަ ވިޔަފާރިވެރިން ޤަބޫލުއް ނުކުރެއެވެ. ގިނަ ބަޔަކު ބުނާ ގޮތުގައި ޢާންމު ތަންތަނުގައި ދުންފަތުގެ އިސްތިޢުމާލުކުރުމުގެ ޤަވާއިދު އެ ޤައުމުގައި އެދެވޭގޮތަކަށް ތަންފީޒުކޮށްފައި ނުވާކަމަށެވެ.