މެކްސިކޯގެ އުތުރުގެ ސަރަޙައްދަކަށް ބާރުގަދަ ބިންހެލުމެއް އައުމުގެ ސަބަބުން ހަ މީހުން މަރުވެއްޖެއެވެ.
ޕެސިފިކް ކަނޑުގެ އައްސޭރި ފަށުގައިވާ ސަރަޙައްދަށް ރިކްޓަރ މިންގަނޑުން 7.4 ބާރުމިނުގެ ބިންހެލުމެއް އައުމުގެ ސަބަބުން މެކްސިކޯގެ ހަ އަވަށެއްގައި ދިރިއުޅޭ ގިނަ ޢަދަދެއްގެ މީހުންނަށް އަނިޔާވެ އިމާރާތްތަކަށްވަނީ ގެއްލުން ލިބިފައެވެ. މީހުން މަރުވެފައިވަނީ ބިން ހެލުމުގެ އަސަރު އެންމެ ބޮޑަށް ކުރި ފަރުބަދަތައް ގިނަ ސްޓޭޓެއްކަމަށްވާ ވަހާކާގައެވެ. އެ ޤައުމުގެ ބިންހެލުމުގެ އިންޒާރުދޭ ނިޒާމު ހަރުދަނާވުމުގެ ސަބަބުން ގިނަ ޢަދަދެއްގެ މީހުންނަށް ރައްކާތެރި ސަރަޙައްދުތަކަށް ދިޔުމަށްވަނީ ފުރުޞަތު ލިބިފައެވެ.
ފަތުރުވެރި އަވަށެއްކަމިގައިވާ ލަ ކްރުކެސިޓާގެ 200 ގެއަކަށްވަނީ ބިންހެލުމުގެ ސަބަބުން ބޮޑެތި ގެއްލުންތަކެއް ލިބިފައެވެ. މީހުން ސަލާމަތްކުރުމުގައި ޙަރަކާތްތެރިވާ ފަރާތްތަކަށް ވަކިވަކިން އޮންނަ އަވަށްތަކަށް ދިއުމުގައި ދަތިތަކެއް ހުރުމުން އަނިޔާވެފައިވާ މީހުންގެ ޢަދަދު އިތުރުވުން އެކަށީގެންވާކަމަށް ބެލެވެއެވެ.
ބިންހެލުމަށްފަހު ގިނަ ޢަދަދެއްގެ ލޮޅުންތަކެއްވަނީ އެ ސަރަޙައްދަށް އައިސްފައެވެ. އޭގެ ތެރޭގައި ރިކްޓަރ މިންގަނޑުން 4.6 ބާރުމިނުގެ ލޮޅުމެއްވެސް ހިމެނެއެވެ.