އޮކްލަހޯމާގައި އެމެރިކާގެ ރައީސް ޑޮނަލްޑު ޓްރަންޕް ބޭއްވެވި ސިޔާސީ އެއްވުމުގައި ބައިވެރިވި މީހުންގެ ޢަދަދު މަދުވީ މީސްމީޑިޔާގައި ހިންގި ޙަރަކާތެއްގެ ސަބަބުން ނޫންކަމަށް އޭނާގެ ކެންޕެއިނު ޓީމުން ބުނެފިއެވެ.
ކުރިއަށް އޮތް އެމެރިކާގެ ރިޔާސީ އިންތިޚާބަށް ތާޢީދު ހޯއްދެވުމުގެ ގޮތުން ޖޫން 21ވަނަ ދުވަހު އެމެރިކާގެ ރައީސް ޓްރަންޕް ބޭއްވެވި އެއްވުމުގައި ބައިވެރިވުމަށް މިލިއަނަކަށްވުރެ ގިނަ މީހުން ޝައުގުވެރިކަން ފާޅުކޮށް ޖާގަ ހޯދުމަށް ޓިކެޓަށް އެދިފައިވާކަމަށް އޭނާގެ ކެމްޕެއިނު ޓީމުންވަނީ ބުނެފައެވެ. 19،000 މީހުންގެ ޖާގަ އޮންނަ މާލަމުގައި ބޭއްވި އެއްވުމުގައި ބައިވެރިވި މީހުންގެ ޢަދަދީ 6000ކަމަށް ޓަލްސާގެ ފަޔާ ބްރިގޭޑުންވަނީ ބުނެފައެވެ. ނަމަވެސް ހާޒިރުވި މީހުންގެ ޢަދަދު އެއަށްވުރެ އިތުރުކަމަށް ކެމްޕެއިނު ޓީމުންވަނީ ބުނެފައެވެ.
ޒުވާނުންގެ މެދުގައި މަޝްހޫރު ޓިކްޓޮކާއި ކޮރެޔާގެ މިއުޒިކަށް ލޯބިކުރާ ޒުވާނުންވަނީ އެއްވުމުގައި ބައިވެރިވުމުގެ އެއްވެސް ނިޔަތެއް ނެތި އެ ޙަރަކާތުގައި ބައިވެރިވުމަށް ޝައުގުވެރިވާކަމަށް ބުނެ ޓިކެޓު ނަގާފައިވާކަމަށް ބުނެފައެވެ. ޓްރަންޕުގެ ސިޔާސީ ޙަރަކާތަށް އެހާ މަދު ޢަދަދެއްގެ މީހުން ހާޒިރުވީ އެހެންވެކަމަށް އެމީހުންވަނީ ބުނެފައެވެ. ނަމަވެސް ޓްރަންޕުގެ ކެންޕެއިން ޓީމުން ބުނީ އެފަދަ މީޙުން ފާހަގަކޮށް، އެމީހުންގެ ޓިކެޓުތައް ބާޠިލުކޮށްފައިވާނެކަމަށެވެ. އެ ޓީމުން ބުނީ އެމެރިކާގައި ކުރަމުންދާ މުޒާހަރާތަކުގެ ސަބަބުން ބައެއް މީހުން ޓްރަންޕުގެ އެއްވުމުގައި ފަސްޖެހުނުކަމަށެވެ.
ކޯވިޑް-19ގެ ސަބަބުން މެދުކަނޑާލައިފައި އޮތުމަށްފަހު ޓްރަންޕް ބޭއްވެވި ފުރަތަމަ ސިޔާސީ އެއްވުމުގައި އޭނާވަނީ ބައްޔަށް ތަހުލީލުކުރާ ޢަދަދު އިތުރުވާވަރަކަށް ބަލި ޖެހިފައިވާ މީހުންގެ ޢަދަދުވެސް އިތުރުވާނެކަމަށް ވިދާޅުވެ، ކުރިއަށް އޮތްތަނުގައި ތަހުލީލުކުރާ މިންވަރު މަޑުޖައްސާލުމަށް އަންގަވާފައިވާނެކަމަށް ވިދާޅުވެފައެވެ. ނަމަވެސް އެއީ ޓްރަންޕު ސަމާސާއެއްގެ ގޮތުގައި ވިދާޅުވި ވާހަކައެއްކަމަށް އެމެރިކާގެ ރިޔާސީ އިދާރާ ވައިޓް ހައުސުންވަނީ ފަހުން ބުނެފައެވެ.