ލުބުނާނަށް ކުރިމަތިވެފައިވާ އިޤްތިޞާދީ މައްސަލަތަކުގެ ސަބަބުން އުފެދިފައިވާ ހަމަނުޖެހުންތައް އިތުރަށް ގޯސްކުރަނީ އިދިކޮޅު ފަރާތްތަކުންކަމަށް ވިދާޅުވެ، ލުބުނާނުގެ ބޮޑުވަޒީރު ޙަސަން ދިއާބް ބޮޑެތި ތުހުމަތުތަކެއް ކުރައްވައިފިއެވެ.
މިދިޔަ އަހަރުގެ އޮކްޓޫބަރު މަހުން ފެށިގެން ލުބުނާނުގެ ފައިސާގެ އަގުވަނީ 70 އިންސައްތަ ދަށަށްގޮސްފައެވެ. އޭގެ ސަބަބުން ދަރަނި ބޮޑު ލުބުނާނުގެ ޙާލަތު އިތުރަށް ގޯސްވެ، ޢާންމުންގެ ވަޒީފާތައް ގެއްލި ތަކެތީގެ އަގުވަނީ އުފުލިފައެވެ.
ލުބުނާނުގެ ފައިސާގެ އަގު ހަލުވި ދުވެލީގައި ދަށަށް ދިއުމުގެ ސަބަބުން އެކަމާ ނުރުހުން ފާޅުކޮށް، އެ ޤައުމުގެ ރައްޔިތުންދަނީ ވަރުގަދަ މުޒާހަރާތަކެއް ކުރަމުންނެވެ. ފައިސާގެ އަގު ދަށަށް ދިއުމުގެ ސަބަބުން އެ ޤައުމުގެ ރައްޔިތުންދަނީ ބޮޑެތި ދަތިތަކާ ކުރިމަތިލަމުންނެވެ. އެމީހުން ޤަބޫލުކުރާ ގޮތުގައި ޤައުމުގެ އިޤްތިޞާދު ހީނަރުވެފައިވަނީ އެދެވޭ ފިޔަވަޅުތަކެއް އެޅުމަށް ސަރުކާރަށް ނުކުޅެދުމުންނެވެ.
ލުބުނާނުގެ ބޮޑުވަޒީރު ދިއާބު ވިދާޅުވީ ކޮރަޕްޝަން ނައްތާލުމަށް ސަރުކާރުން ކުރަމުންދާ މަސައްކަތަށް އިދިކޮޅު ފަރާތްތަކުން ހުރަސް އަޅަމުންދާކަމަށާއި ޤައުމުގައި ހިނގަމުންދާ ހަމަނުޖެހުންތަކަށް ހިތްވަރު ދެނީ އިދިކޮޅު ފަރާތްތަކުންކަމަށެވެ. އަދި ޤައުމަށް ދިމާވެފައިވާ ޙާލަތުގެ ބޭނުންކޮށްގެން ފައިދާ ނެގުމަށް މަސައްކަތް ކުރަމުންދާކަމަށާއި ޞައްޙަ ނޫން މައުލޫމާތު ފެތުރުމުގެ ސަބަބުން ލުބުނާނުގެ ފައިސާގެ އަގު ދަށްވެފައިވާކަމަށެވެ ނަމަވެސް އެކަންކުރާ އިދިކޮޅު ފަރާތްތަކަކީ ކޮން ބައެއްކަމެއް އޭނާ ވިދާޅުވެފައެއް ނުވެއެވެ.
ޤައުމުގެ އިޤްތިޞާދު ހަމައަކަށް އެޅުވުމަށް މާލީ އެހީތެރިކަން ހޯދުމަށް އިންޓަނޭޝަނަލް މަނިޓަރީ ފަންޑު، އައިއެމްއެފާއެކު ލުބުނާނުގެ ސަރުކާރުން ކުރަމުންދާ މަޝްވަރާތަކަށް ހަމަނުޖެހުންތަކުގެ ސަބަބުން ބުރޫއަރާނެކަމަށް ބެލެވެއެވެ.