އިނގިރޭސިވިލާތުގެ ހުރިހާ މަދަރުސާތަކެއް ސެޕްޓެންބަރު މަހުގެ ތެރޭގައި ހުޅުވުމަށް މަސައްކަތްކުރަމުންދާކަމަށް އެ ޤައުމުގެ ބޮޑުވަޒީރު ބޮރިސް ޖޮންސަންގެ ރަސްމީ އޮފީހުން ބުނެފިއެވެ.
ކޯވިޑް-19 ފެތުރުން ހުއްޓުވުމަށް އެޅި ރައްކާތެރިކަމުގެ ފިޔަވަޅުތަކުގެ ތެރޭގައި އިނގިރޭސިވިލާތުގެ ހުރިހާ މަދަރުސާއެއްވަނީ މާރިޗު މަހުގެ ތެރޭގައި ބަންދުކޮށްފައެވެ. ނަމަވެސް ޖޫން މަހުން ފެށިގެން އަލުން އަނބުރާ މަދަރުސާއަށް ދިއުމުގެ ފުރުޞަތުވަނީ ބައެއް އުމުރުފުރާތަކުގެ ދަރިވަރުންނަށް ދީފައެވެ. ސަރުކާރުން ޙުއްދަ ދިނުމުންވެސް ބައެއް ތަޢުލީމީ މަރުކަޒުތަކުންވަނީ ރައްކާތެރިކަން ކަށަވަރުނުވާކަމަށް ބުނެ އެ މަރުކަޒުތައް ނުހުޅުވުމަށް ނިންމައިފައެވެ.
ސެޕްޓެންބަރު މަހުގެ ތެރޭގައި ހުރިހާ މަދަރުސާއެއް ހުޅުވުމަށް ތަޢުލީމީ ވުޒާރާއާއެކު މަސައްކަތްކުރަމުންދާކަމަށާއި ގެއްލިފައިވާ ފިލާވަޅުތައް ދަރިވަރުންނަށް ހޯދާދިނުމުގައި އެހީތެރިވެދިނުމަށް ޚާއްޞަ ސަޕޯޓު ޕެކޭޖުތަކެއް ތަޢާރަފުކުރަން ނިންމާފައިވާކަމަށް ބޮޑުވަޒީރުގެ ރަސްމީ އޮފީހުންވަނީ ބުނެފައެވެ. މަދަރުސާތަކާއި ކައުންސިލުތަކާއި ޔޫނިއަންތަކާއެކު ދަރިވަރުންގެ ރައްކާތެރިކަން ކަށަވަރުކުރުމުގެ މަސައްކަތް ކުރަމުންދާކަމަށްވެސް ބޮޑުވަޒީރުގެ ރަސްމީ އޮފީހުންވަނީ ބުނެފައެވެ.
ވިލާތުގެ ޤައުމުތަކުގެ ތެރެއިން ކޯވިޑް-19ގެ އަސަރު އެންމެ ބޮޑަށް ކޮށްފައިވާ އެއް ޤައުމަކީ އިނގިރޭސިވިލާތެވެ. އެ ޤައުމުގައި 294،375 މީހުންނަށް ކޯވިޑް-19 ޖެހި، 41،662 މީހުންވަނީ މަރުވެފައެވެ.