ލީބިޔާގެ މައްސަލާގައި މަޝްވަރާކުރެއްވުމަށް ރަޝިޔާގެ ޚާރިޖީ ވަޒީރު ސަރްގައި ލަވްރޮފާއި ދިފާޢީ ވަޒީރު ސަރްގައި ޝޮއިގޫ ތުރުކީވިލާތަށް ވަޑައިގެންނެވުމަށް ހަމަޖެހިއްޖެއެވެ.
ލީބިޔާގެ ދާޚިލީ ހަނގުރާމައިގައި ތުރުކީވިލާތުން ވާގިވެރިވަނީ ބައިނަލްއަޤްވާމީ މުޖުތަމަޢުން ޤަބޫލުކޮށްފައިވާ ސަރުކާރަކަށެވެ. ރަޝިޔާއާއި ޔޫއޭއީއާއި މިޞްރުން ވާގިވެރިވަނީ އިދިކޮޅު ޚަލީފާ ޙަފްތާރުގެ ލީބިޔަން ނޭޝަނަލް އާމީ، އެލްއެންއޭއަށެވެ.
ފާއިތުވި ހަފުތާތަކުގައި ސަރުކާރަށް ނިސްބަތްވާ ފައުޖުތަކުންވަނީ އެލްއެންއޭއާ ކުރިމަތިލައި އަސްކަރީ ބޮޑެތި ކާމިޔާބީތަކެއް ހޯދައިފައެވެ. އިދިކޮޅު ހަނގުރާމަވެރިންގެ ބާރުގެ ދަށަށް ލީބިޔާގެ ވެރިރަށް ޠަރާބުލުޞް ގެނައުމަށް ކުރަމުންދިޔަ މަސައްކަތް ނިމުމަކަށް ގެނެސް ތުރުކީވިލާތުގެ އެހީތެރިކަމާއެކު އެ ސަރަޙައްދުވަނީ ސަރުކާރުގެ ފުރިހަމަ ބާރުގެ ދަށަށް ގެނެސްފައެވެ. އެންމެ ފަހުގެ ކުރިމަތިލުންތަކަށްފަހު ދެ ފަރާތުންވެސް ޙަމަލާ ބަދަލުކުރުން ހުއްޓާލުމުގެ އައު މަޝްވަރާތަކެއް ފަށައިފައިވާކަމަށް އދންވަނީ ބުނެފައެވެ.
ތުރުކީވިލާތުގެ ދާޚިލީ ވުޒާރާއިން ބުނީ ރަޝިޔާގެ އިސްވެރިން އެ ޤައުމަށް ކުރައްވާ ދަތުރުގައި ސަރަޙައްދީ މައްސަލަތަކާ ގުޅޭގޮތުން މަޝްވަރާކުރާނެކަމަށެވެ. އެ ބައްދަލުވުންތަކުގައި ރަޝިޔާގެ އަސްކަރީވެރިން ބައިވެރިވެވަޑައިގަތުމަށްވަނީ ހަމަޖެހިފައެވެ.
ބެލެވޭ ގޮތުގައި ލީބިޔާގެ މައްސަލައިގެ އިތުރުން ސޫރިޔާގެ މައްސަލައާ ގުޅޭގޮތުން ބައްދަލުވުމުގައި މަޝްވަރާކުރާނެއެވެ. ސޫރިޔާގެ މައްސަލައިގައި ރަޝިޔާއިން ވާގިވެރިވަނީ ރައީސް ބައްޝާރުލް ޢަސަދަށެވެ. އަދި އިދިކޮޅު ހަނގުރާމަވެރިންނަށް އެހީތެރިވަމުންދަނީ ތުރުކީވިލާތުންނެވެ.