ސަރުކާރު މުވައްޒަފުން އިތުރުގަޑީގައި ކުރާ މަސައްކަތަށް ކުރިންވެސް ހަމަޖެހިފައި އޮންނަ އުސޫލުން އިތުރުގަޑީގެ ފައިސާ ލިބެމުންދާނެކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީން ވިދާޅުވީ ސަރުކާރުން މުވައްޒަފުންނަށް އިތުރުގަޑީގެ ފައިސާ ނުލިބޭނެކަމަށް ބުނެ ފަތުރަމުންދަނީ ހަޤީޤަތާ ޚިލާފު ޚަބަރުތަކެއްކަމަށެވެ. އަދި ސިވިލް ސަރވިސް މުވައްޒަފުންނަށް ކުރިންވެސް އިތުރުގަޑީގެ ފައިސާ ލިބެމުންދިޔަ އުސޫލުން އިތުރުގަޑީގެ ފައިސާ ލިބޭނެކަމަށް ފިނޭންސް މިނިސްޓްރީން ވިދާޅުވެއެވެ.
ފިނޭންސް މިނިސްޓްރީން ވިދާޅުވީ ކޯވިޑްއާ ގުޅިގެން ހަފްތާއަކު 48 ގަޑިއިރު ހަމަވުމުން އިތުރުގަޑީގެ ފައިސާ ދިނުމަށް އަމަލުކުރަމުންދިޔަ އުސޫލަށް އަމަލުކުރުން ހުއްޓާލާފައިވާކަމަށެވެ. އަދި މިހާރު ސަރުކާރު މުވައްޒަފުންނަށް އިތުރުގަޑީގެ ފައިސާ ލިބޭނީ ކުރިންވެސް ލިބެމުންދިޔަ އުސޫލުންކަމަށް ފިނޭންސް މިނިސްޓްރީން ވިދާޅުވެއެވެ.
ފިނޭންސް މިނިސްޓްރީން ވިދާޅުވީ ދައުލަތުގެ އޮފީސްތަކުން އިތުރުގަޑީގެ ފައިސާ ދިނުމުގައި ތަފާތު ގޮތްތަކަށް އަމަލުކުރަމުންދާކަމަށެެވެ. އަދި އަހަރުން އަހަރަށް އިތުރުގަޑީގެ ފައިސާއަށްކުރާ ޚަރަދު ބޮޑުވާތީ، ޚަރަދުތައް ކުޑަކުރުމަށް މަސައްކަތްކުރަމުންދާކަމަށެވެ. އެގޮތުން އިތުރުގަޑީގެ ފައިސާ ދިނުމުގައި ހަމަހަމަ އުސޫލަކުން އަމަލުކުރާނެ ގޮތްތަކެއް ކަނޑައެޅުމަށް ކަމާބެހޭ ފަރާތްތަކާއެކު މަސައްކަތްކުރަމުންދާކަމަށް ފިނޭންސް މިނިސްޓްރީން ވިދާޅުވެއެވެ.