ކޯވިޑް-19 ޖެހޭ މީހުންނާއި ބަލީގައި މަރުވާ މީހުންގެ ޢަދަދުތައް ޢާންމުކުރުން ހުއްޓާލުމުން ބްރެޒިލުގެ ސުޕްރީމް ކޯޓުން އެ ނިންމުން ބަދަލުކުރަން އަމުރު ކުރުމުން އަލުން ތަފާސްހިސާބުތައް ޢާންމުކުރަން ފަށައިފިއެވެ. ސުޕްރީމު ކޯޓުން އެގޮތަށް އަމުރުކޮށްފައިވަނީ ކޯވިޑް-19 ޖެހޭ މީހުންގެ ޢަދަދުތައް ބްރެޒިލުގެ ސަރުކާރުން ސިއްރުކޮށް، އެ ޤައުމުގެ ޙާލަތު ފޮރުވަން މަސައްކަތްކުރަމުންދާކަމަށް ގިނަ ބަޔަކު ތުހުމަތުކުރަމުންދަނިކޮށެވެ.
މިދިޔަ ހަފުތާއާ ހަމައަށް ބްރެޒިލުން ދިޔައީ ކޮންމެ ސްޓޭޓެއްގައި ބަލި ޖެހޭ މީހުންނާއި މަރުވާ މީހުންގެ ޢަދަދުތައް ވަކިވަކިން އެނގޭގޮތަށް އެކަމަށް ޚާއްޞަ ވެބްސައިޓެއްގައި ޝާއިޢުކުރަމުންނެވެ. ނަމަވެސް އެ ވެބްސައިތުގައި ހުރި ތަފުޞީލީ ތަފާސްހިސާބުތައް ނެގުމަށް ބައެއް މަޢުލޫމާތުތައް ނުހިމެނޭގޮތަށް ފަހުންވަނީ ވެބްސައިޓަށް ބަދަލުތަކެއް ގެނަސްފައެވެ. ސުޕްރީމު ކޯޓުން ނެރުނު އަމުރުގައި ބުނެފައިވަނީ ކޯވިޑް-19ގެ ތަފާސްހިސާބުތައް ޞިއްޙާތާބެހޭ ވުޒާރާގެ ފަރާތުން ތަފުޞީލުކޮށް ވެބްސައިޓުގައި ހިމަނަންޖެހޭނެކަމަށާއި އެގޮތަށް ޢަމަލުނުކުރާނަމަ ބަލި ފެތުރޭ ގޮތާއި މިންވަރު ދެނެގަތުމަށް ހުރަސްއެޅި ބަލި ފެތުރުން ހުއްޓުވުމަށް އަޅަންޖެހޭ ފިޔަވަޅުތައް ނޭޅޭނެކަމަށެވެ.
ދުނިޔޭގައި ކޯވިޑް-19 ދެވަނައަށް އެންމެ ހަލުވިކޮށް ފެތުރެނީ ބްރެޒިލުގައެވެ. ބްރެޒިލްގެ ރައީސް ޖައީޚް ބޮލްސޮނާރޯވަނީ ކޯވިޑް-19 އަކީ އާދައިގެ ރޯގާއެއްގެ ގޮތަގައި ސިފަކުރައްވާ ރައްކާތެރިކަމުގެ ފިޔަވަޅުތައް އެޅުމާމެދު ހިތްހަމަނުޖެހުން ފާޅުކުރައްވާފައެވެ.
އެންމެ ފަހުގެ ތަފާސްހިސާބުތަކުން ދައްކާގޮތުގައި ބްރެޒިލްގައި 742،084 މީހުންނަށް ކޯވިޑް-19 ޖެހި، 38،497 މީހުންވަނީ މަރުވެފައެވެ. އެ ޤައުމުގައި ބަލި ފެތުރޭ މިންވަރު އެއް ދުވަހުން އަނެއް ދުވަހަށް އިތުރުވިނަމަވެސް ރައްކާތެރިކަމުގެ ފިޔަވަޅުތަކަށް ސަރުކާރުންދަނީ ލުއި ދެމުންނެވެ.