ބްރެޒިލުގައި ކޯވިޑް-19 ޖެހޭ މީހުންނާއި ބަލީގައި މަރުވާ މީހުންގެ ޢަދަދުތައް އެ ޤައުމުގެ ސަރުކާރުން ޝާއިޢުކުރަމުންދިޔަ ވެބްސައިޓުން އުނިކޮށްފިއެވެ.
އެންމެ ފަހުގެ ޢަދަދުތަކުން ދައްކާގޮތުގައި ބްރެޒިލްގައި 676،49 މީހުންނަށް ކޯވިޑް-19 ޖެހި، 36،044 މީހުންވަނީ މަރުވެފައެވެ. އެ ޤައުމަކީ ދެވަނައަށް އެންމެ ހަލުވިކޮށް ބަލިފެތުރެމުންދާ ޤައުމެވެ. ފާއިތުވި 24 ގަޑިއިރުގެ ތެރޭގައި 27،581 މީހުންނަށް ބަލި ޖެހި 910 މީހުން މަރުވެފައިވާކަމަށް އެންމެ ފަހުގެ މައުލޫމާތުން ދައްކައެވެ.
މީގެ ކުރިން ބްރެޒިލުގެ ޞިއްޙަތާ ބެހޭ ވުޒާރާއިންވަނީ ކޯވިޑް-19 ފެތުރޭ ސްޓޭޓުތަކާއި އަވަށްތަކުގައި ބަލިޖެހޭ މީހުންނާއި މަރުވާ މީހުންގެ ޢަދަދުތައް ވަކިވަކިން އެނގޭނެ ގޮތަށް ޢާންމުކުރަމުންނެވެ. ނަމަވެސް އެ މަޢުލޫމާތުތައް ވެބްސައިޓުގައި ހިމެނުން ހުއްޓާލުމުގެ އިތުރުން ބަލިޖެހޭ މީހުންގެ ޖުމުލަ ޢަދަދު އިޢުލާނުކުރުންވެސްވަނީ ހުއްޓާލާފައެވެ.
ބްރެޒިލްގެ ރައީސް ޖައީޚް ބޮލްސޮނާރޯ ވިދާޅުވީ ރަސްމީ ޢަދަދުތަކުން ޤައުމުގެ ޙަޤީޤީ ޙާލަތު ދައްކުވައިނުދޭކަމަށާއި ބަލި ޖެހޭ މީހުންގެ ޢަދަދާއި އެހެނިހެން ޢަދަދުތައް ހާމަކުރާ އުޞޫލު އިތުރަށް ހަރުދަނާކުރުމަށް އިތުރު މަސައްކަތްތައް ކުރަމުންދާކަމަށެވެ. ބޮލްސޮނާރޯވަނީ ކޯވިޑް-19އަކީ އާދައިގެ ރޯގާއެއްގެ ގޮތުގައި ސިފަކުރައްވާ ބަލިން ރައްކާތެރިވުމަށް އަޅާ ފިޔަވަޅުތަކަށް ފާޑުކިޔުއްވާފައެވެ. އޭނާވަނީ ޞިއްޙަތާބެހޭ ވުޒާރާގެ ޞިއްޙީ މާހިރުންގެ ތެރެއިން ބަލީގެ ނުރައްކަލާބެހޭ އިންޒާރުދެމުންދިޔަ މީހުންގެ ބަދަލުގައި އެ މަޤާމުތަކަށް އަސްކަރީވެރިން ޢައްޔަނުކުރައްވާފައެވެ.
ކޯވިޑް-19ގެ މައުލޫމާތު ޝާއިޢުކުރަމުންދިޔަ ވެބްސައިޓުން އެ މައުލޫމާތު އުނިކުރި ސަބަބާ ގުޅޭގޮތުން ބޮލްސޮނާރޯއާއި ޞިއްޙަތާބެހޭ ވުޒާރާއިން އެއްވެސް އެއްޗެއް ބުނެފައެއް ނުވެއެވެ. އެ ވެބްސައިޓަކީ ބްރެޒިލްގައި ބަލި ފެތުރޭ މިންވަރާ ގުޅޭ މައުލޫމާތު ހޯދުމަށް ޢާންމުން ބޭނުންކުރާ މައިގަނޑު ވަޞީލަތެވެ.