ޖަރުމަނުވިލާތާއި އެމެރިކާއާ ދެމެދު އޮންނަ ގުޅުމަކީ އުނދަގޫ ގުޅުމެއްގެ ގޮތުގައި ޖަރުމަނުވިލާތުގެ ދާޚިލީ ވަޒީރު ހައިކޯ މާސް ސިފަކުރައްވައިފިއެވެ.
ފާއިތުވި އަހަރުތަކުގައި ޖަރުމަނުވިލާތާއި އެމެރިކާ ގުޅިގެން ކޮށްފައިވާ މަސައްކަތްތައް ފާހަގަކުރައްވާ މާސް ވިދާޅުވީ އެ މަސައްކަތްތައް ބަލައިގަންނަކަމަށާއި އެއީ ދެ ޤައުމަށްވެސް އެންމެ ފައިދާހުރި ގޮތްކަމަށް ޤަބޫލުކުރައްވާކަމަށެވެ. ނަމަވެސް ދެ ޤައުމުގެ ދެމެދުގައި އޮންނަ ގުޅުމަކީ އުނދަގޫ ގުޅުމެއްކަމަށް ސިފަކުރައްވާ މާސް ވިދާޅުވީ ސަރަޙައްދީ ކަންކަމުގައި ދެ ޤައުމުން އެއްބާރުލުން ދިން ނަމަވެސް އެ ގުޅުމަކީ ފަސޭހަ ގުޅުމެއް ނޫންކަމަށެވެ.
ޖަރުމަނުވިލާތުގައި ތިބި 34،500 އެމެރިކާ ސިފައިންގެ ތެރެއިން 9،500 ސިފައިން އެ ޤައުމުން ފޮނުވާލާނެކަމަށް އެމެރިކާގެ ރައީސް ޑޮނަލްޑް ޓްރަންޕްވަނީ އިޢުލާނުކުރައްވާފައެވެ. އެމެރިކާއިންވަނީ ނޭޓޯގެ ޤައުމުތަކުން އަސްކަރިއްޔާއަށް ކުރާ ޚަރަދު އިތުރުކޮށް އެމެރިކާގެ މައްޗަށް ބަރޯސާވާ މިންވަރު ކުޑަކުރަންޖެހޭކަމަށް ވިދާޅުވެފައެވެ. ޖަރުމަނުވިލާތުގެ ޗާންސެލަރު އެންގެލާ މާކަލްގެ ވެރިކަންކުރާ ކޮންސަވޭޓިވް ބްލޮކަށް ނިސްބަތްވާ ޤާނޫނުހަދާ މަޖިލީހުގެ އިސް މެމްބަރުންވަނީ އެމެރިކާގެ ނިންމުމާމެދު ފާޑުކިޔައި ނުރުހުންފާޅުކޮށްފައެވެ.
ޖީ7ގެ ބައްދަލުވުމެއް މި މަހު ބޭއްވެވުމަށް އެމެރިކާގެ ރައީސް ރާއްވަވަމުން ދަނިކޮށް މާކަލްވަނީ އެ ބައްދަލުވުމުގައި މި ޙާލަތުގައި ބައިވެރިވެވަޑައިނުގަންނަވާނެކަމަށް ވިދާޅުވެފައެވެ. އެއަށްފަހު ޓްރަންޕްވަނީ އެ ބައްދަލުވުން ފަސްކުރައްވާފައެވެ.