އިޓަލީވިލާތުގެ ދަތުރުވެރިންނަށް ވިލާތުގެ ޤައުމުތައް ހުޅުވާނެކަމުގެ އުންމީދުކުރާކަމަށް އެ ޤައުމުން ބުނެފި

މި މަހުގެ 15ވަނަ ދުވަހު ވިލާތުގެ އިއްތިޙާދުގެ ޤައުމުތަކުން އެ ޤައުމުތަކުގެ ސަރަޙައްދީ ރޮނގުތައް އިޓަލީވިލާތުގެ ރައްޔިތުންނަށް ހުޅުވާނެކަމަށް އުންމީދުކުރައްވާކަމަށް އެ ޤައުމުގެ ޚާރިޖީ ވަޒީރު ލުއިޖީ ޑި މާއިއޯ ވިދާޅުވެއްޖެއެވެ.

އިޓަލީވިލާތަކީ ވިލާތުގެ ޤައުމުތަކުގެ ތެރެއިން ކޯވިޑް-19ގެ އަސަރު އެންމެ ބޮޑަށް ކޮށްފައިވާ އެއް ޤައުމެވެ. އެ ޤައުމުގައި 234،801 މީހުންނަށް ކޯވިޑް-19 ޖެހި، 33،846 މީހުންވަނީ މަރުވެފައެވެ. ކޯވިޑް-19ގެ ސަބަބުން ހަތަރުވަނައަށް އެންމެ ގިނަ މީހުން މަރުވެފައިވަނީ އިޓަލީވިލާތުގައެވެ.

ޖޫން 3ގައި އިޓަލީވިލާތުންވަނީ އެ ޤައުމުގެ ސަރަޙައްދީ ރޮނގުތައް ވިލާތުގެ އިއްތިޙާދަށް ހުޅުވާލައިފައެވެ. ނަމަވެސް ވިލާތުގެ އިއްތިޙާދުގެ ގިނަ ޤައުމުތަކުން އިޓަލީވިލާތުގެ ރައްޔިތުން އެތެރެވުމުގެ ޙުއްދަ ދީފައެއް ނުވެއެވެ.

ސްލޮވީނިއާއަށް ކުރެއްވި ޒިޔާރަތެއްގައި ނޫސްވެރިންނާ ވާހަކަދައްކަވަމުން ޑި މާއިއޯ ވިދާޅުވީ ޖޫން 15އަކީ އިޓަލީވިލާތުގެ ރައްޔިތުންނަށް މުހިންމު ދުވަހެއްކަމަށާއި އެ ތާރީޚުގައި އަވަށްޓެރި ޖަރުމަނުވިލާތާއި ސްވިޒަލެންޑުގެ ސަރަޙައްދީ ރޮނގުތައް އިޓަލީވިލާތުގެ ރައްޔިތުންނަށް ހުޅުވާނެކަމުގެ އިޝާރާތެއް އެ ޤައުމުތަކުގެ ސަރުކާރުން ދީފައިވާކަމަށެވެ. އޭނާ ވިދާޅުވީ ކޯވިޑް-19ގެ އަސަރު އެންމެ ބޮޑަށް ކޮށްފައިވާ ސިޓީތަކުގެ ރައްޔިތުންނަށްވެސް އެ ފުރުޞަތު ފަހިވެގެންދާނެކަމަށް އުންމީދުކުރައްވާކަމަށެވެ.

ނޫސްވެރިންނާ ވާހަކަ ދައްކަވަމުން ސްލޮވީނިއާގެ ޚާރިޖީ ވަޒީރު އަންޒޭ ލޯގަރު ވިދާޅުވީ އިޓަލީވިލާތުގެ ޞިއްޙީ ޙާލަތުދަނީ ހަލުވި މިނެއްގައި ރަނގަޅުވަމުންކަމަށާއި ޖޫން 15އާމެދު ކުރެވޭ އުންމީދު ބޮޑުކަމަށެވެ. މިދިޔަ މަހު ސްލޮވީނިއާއިންވަނީ އެ ޤައުމުގައި ކޯވިޑް-19 ފެތުރުން ހުއްޓިއްޖެކަން އިޢުލާނުކޮށް، ކްރޮއޭޝިޔާއާއި ހަންގޭރީއަށާއި އޮސްޓްރިއާގެ ރައްޔިތުންނަށް އެ ޤައުމުގެ ސަރަޙައްދީ ރޮނގު ހުޅުވައިލާފައެވެ.