ކޯވިޑް-19 ފެތުރޭ މިންވަރު އީރާނުގައި ދެވަނަ ފަހަރަށް އިތުރުވެއްޖެއެވެ.
އީރާނުގައި 167،156 މީހުންނަށް ކޯވިޑް-19 ޖެހި، 8،134 މީހުންވަނީ މަރުވެފައެވެ. އީރާނަކީ މެދުއިރުމަތީގެ ޤައުމުތަކުގެ ތެރެއިން ކޯވިޑް-19 އަސަރު އެންމެ ބޮޑަށްކޮށްފައިވާ ޤައުމެވެ. ޖޫން މަހުގެ 4ވަނަ ދުވަހު ބަލިޖެހިފައިވާ 3،574 މީހުން އީރާނުންވަނީ ފެނިފައެވެ. އެއީ މިދިޔަ ފެބްރުއަރީ މަހު އެ ޤައުމުގައި ބަލި ފެތުރެން ފެށިފަހުން އެއް ދުވަހުގެ ތެރޭގައި އެންމެ ގިނަ ޢަދަދެއްގެ މީހުންނަށް ބަލިޖެހުނު ދުވަހެވެ. އޭގެ ފަހުން އެ ޢަދަދުވަނީ 2،886އަށް ދަށްވެފައެވެ. އޭޕްރިލް މަހުގެ މެދުތެރެއިން ފެށިގެން އީރާނުގެ ސަރުކާރުންދަނީ އެ ޤައުމުގައި ކޯވިޑް-19 ފެތުރުން ހުއްޓުވުމަށް އަޅާފައިވާ ރައްކާތެރިކަމުގެ ފިޔަވަޅުތަކަށް ލުއިދޭން ފަށައިފައެވެ.
ސަރުކާރުގެ ނިންމުން ދިފާޢުކުރައްވާ އީރާނުގެ ރައީސް ޙަސަން ރޫޙާނީ ވިދާޅުވީ ދެވަނަ ފަހަރަށް ބަލި ފެތުރިދާނެކަމުގެ ބިރާއެކުވެސް ޤައުމުގެ އިޤްތިޞާދު އަލުން ހުޅުވުމަށް މަޖުބޫރުވެފައިވާކަމަށެވެ. އަދި ކާރުހާނާތަކާއި ވިޔަފާރިތައް ހުޅުވައި ޤައުމުގައި ދަތުރުކުރުމުގެ ފުރުޞަތު ދިނުން ނޫންގޮތެއް ނެތްކަމަށް އޭނާ ވިދާޅުވިއެވެ.
ރައީސް ރޫޙާނީ ވިދާޅުވީ ބަލިޖެހޭ މީހުންގެ ޢަދަދު ކުއްލިއަކަށް އިތުރުވެފައިވަނީ އެ ޤައުމުގައި ބޭއްވި ކައިވެނި ޙަފުލާއެއްގެ ސަބަބުންކަމަށެވެ. އޭނާ ވިދާޅުވީ އެ ޙަފުލާގެ ސަބަބުން ޢާންމުންނަށާއި ޞިއްޙީ އެހީތެރިންނަށާއި އިޤްތިޞާދަށާއި ޞިއްޙީ ނިޒާމަށް ބޮޑެތި ނޭދެވޭ އަސަރުތަކެއްވަނީ ކޮށްފައެވެ. ނަމަވެސް އެއީ ކޮން ތާރީޚެއްގައި އަދި ކޮން ސަރަޙައްދެއްގައި ބޭއްވި ޙަފުލާއެއްކަމެއް އޭނާ ވިދާޅުވެފައެއް ނުވެއެވެ.
ހަތަރު މަސް ދުވަހަށް ބަންދުކުރުމަށްފަހު އީރާނުގެ ޔުނިވާސިޓީތައްވަނީ މެއި މަހުގެ 30ވަނަ ދުވަހު ހުޅުވާފައެވެ. ކުރިއަށް އޮތް ހަފުތާގެ ތެރޭގައި ކުޑަކުދިން ކިޔަވާ ކިލާސްތަކާއި ޤުރުއާން ކިލާސްތަކާއި ބަސް ދަސްކޮށްދޭ ކިލާސްތައް އަލުން ފެށުމަށްވަނީ ހަމަޖެހިފައެވެ.