މަސްޖިދުލް އަޤްޞާ ހިމެނޭގޮތަށް ތިން ހަރަމަށް ޒިޔާރަތްކުރެވޭ އުމުރާ ދަތުރެއް ރާވާފައިވާކަމަށް ހައްޖު ކޯޕަރޭޝަނުން ބުނެފިއެވެ.ހައްޖު ކޯޕަރޭޝަންގެ މެނޭޖިންގ ޑިރެކްޓަރ ޔާމީން އިދްރީސް ވިދާޅުވީ އާންމުކޮށް ހުރިހާ ފަރާތްތަކަށް ހުޅުވާލެވިފައިވާ މިއުމްރާދަތުރުގެ ތަފްޞީލްތައް އަންނަ ހަފްތާގައި އިއުލާންކުރެވޭނެކަމަށެވެ.މިއުމްރާ ދަތުރުގައި ފުރަތަމަ ދަތުރުކުރާނީ އުރުދުންނަށް ކަމަށާ އެއަށްފަހު އުރުދުންމަގުން ފަލަސްޠީނަށް ދަތުރުކުރުމަށްފަހު ސައުދީ އަރަބިއްޔާއަށް ދަތުރުކުރާނީ އަނެއްކާވެސް އެނބުރި އުރުދުންއަށް އައުމަށްފަހު ކަމަށް ހައްޖު ކޯޕަރޭޝަނުން މައުލޫމާތުދެއެވެ.ޔާމީން އިދުރީސް ވިދާޅުވީ ދަތުރު ރާވާނީ ފަލަސްޠީނުގެ މަސްޖިދުލްއަޤްޞާގައި ހުކުރު ނަމާދުކުރެވޭގޮތަށްކަމަށާ، އަދި މިދަތުރުގައި އުރުދުންއާއި ފަލަސްޠީނުގައި ހުރި ބައެއް އާޘާރީ ތަންތަންތަނަށްވެސް ޒިޔާރަތްކުރުމުގެ ފުރުޞަތުލިބިގެންދާނެކަމަށެވެ. ވިއްސަކަށް ދުވަސް ހޭދަކުރެވޭގޮތަށް ރޭވިފައިވާ މިދަތުރު ބާއްވާނީ މިއަހަރުގެ ޑިސެމްބަރު މަހުތެރޭގައި ކަމަށް ހައްޖުކޯޕަރޭޝަނުން މައުލޫމާތުދެއެވެ.