އޭޕްރިލް މަހުގެ ކުރީކޮޅު އުމުރުން 99 އަހަރުގެ ކެޕްޓަން ޓޮމް މޯރް ހިންގުމަށް ބޭނުންކުރާ ކޮށި ހިފައިގެން ގޭގެ ބަގީޗާއަށް ނުކުތީ އިނގިރޭސިވިލާތުގެ ނޭޝަނަލް ހެލްތު ސާވިސަސް، އެންއެޗުއެސްއަށް ހަދިޔާ ކުރުމަށް 1،000 ޕައުންޑު އެއްކުރުމުގެ އަޒުމުގައެވެ. އޭނާގެ އަމާޒަކަށްވީ އުރުމުން 100 އަހަރު ފުރުމުގެ ކުރިން، 50 މީޓަރުގެ ބަގީޗާގެ ދެކޮޅަށް 100 ބުރު ޖެހުމެވެ.
1920ވަނަ އަހަރު އުފަންވި ކެޕްޓަން ޓޮމްގެ މަސައްކަތަކީ އެސަރަޙައްދުގެ ނޫސްތަކުން ޝައުގުވެރިވެދާނެ ވާހަކައެއްކަމަށް ބަލާ އޭނާގެ ދަރިފުޅު، ހަންނާ އިންގްރަމް މޯރްވަނީ އޭނާގެ ކުންފުނީގެ ފަރާތުން ނޫސް ބަޔާނެއް ނެރެފައެވެ. އެނޫސްބަޔާނުގައި ކެޕްޓަން ޓޮމްގެ ކޮށި ކޮއްޕަމުން ހިނގަމުންދާ ފޮޓޮއެއް ހިމަނާފައިވެއެވެ. ޤައުމުގެ ހުރިހާ ރައްޔިތުން ގޭގައި މަޑުކޮށްގެން އެންއެޗުއެސް ރައްކާތެރިކުރުމަށް ގޮވާލަމުންދާ ދަނޑިވަޅުގައި ޓޮމް ގޭގައި ހުރެ ޞިއްހީ ޚިދުމަތްތެރިންގެ ޙައްޤުގައި ކުރަމުންދާ މަސައްކަތް އެލިޔުމުގައި ހިމަނާފައިވެއެވެ. އެނޫސްބަޔާނާއެކު ބައެއްގެ ޙައްޤުގައި ފައިސާ އެއްކުރަން މީހަކު ކުރި އެންމެ ކާމިޔާބު މަސައްކަތް އުފަންވިއެވެ.
މުޅި ޤައުމާއި ދުނިޔޭގެ ސަމާލުކަން ހޯދާ އާންމުންގެ ހިތް އަތުލި ޤަރުނުވެރިޔާގެ ވާހަކައަކީ ނޫސްވެރިކަމުގެ ބާރާއި ޤައުމީ ކާރިޘާއެއްގެ ވަގުތުގައި އުފާވެރިކަމަށް ރައްޔިތުން އެދެމުންދާ މިންވަރު ދައްކުވައިދިން ޚާއްޞަ ހާދިޘާއެކެވެ. ކެޕްޓަން ޓޮމްގެ ވާހަކަ ނޫސްވެރިންގެ ލޮލުގައި އަޅައިގަތީ އިނގިރޭސިިވިލާތުގެ އަވަށެއްކަމަށްވާ މިލްޓަން ކީންސްގައި ނޫސް އިދާރާއެއް ހިންގާ ޑޭމިއަން ލުކަސަށް އެވާހަކަ ލިޔެފައިވާ ނޫސްބަޔާން ފެނުނު ހިސާބުންނެވެ.
އެބަޔާން ނެރުނު ދުވަހު ބެޑްފޮޑް ޓުޑޭ ނޫހުގައި ބެޑްފޮޑަށް ނިސްބަތްވާ މީހަކަށް 100 އަހަރު ފުރުމުގެ ކުރިން ޙާޞިލްކުރަން ބޭނުންވާ އަމާޒާބެހޭގޮތުން ލިޔުމެއް ޝާއިރުކުރިއެވެ. އެލިޔުމުގައި އެންއެޗުއެސްއަށް އެހީތެރިވުމަށް ފައިސާ އެއްކުރުމުގެ ޚިޔާލު އައިގޮތް ލިޔެފައިވެއެވެ. އޭނާގެ ޅަދުވަހުގައި އިނގިރޭސިވިލާތުގެ އަސްކަރިއްޔާއަށް ޚިދުމަތްކޮށްދިން ކެޕްޓަން ޓޮމްއަކީ 2018ވަނަ އަހަރު ވެއްޓި އުނަގަނޑު ބިންދައިގެން ގޮސްފައިވާ މީހެކެވެ. އަދި ހަމުގެ ކެންސަރު ޖެހި އެކަމަށް ފަަރުވާ ހޯދާފައިވާ މީހެކެވެ. އޭނާއަށް ދެފަހަރުވެސް އެންއެޗުއެސްގެ ފަރާތުން ލިބުނީ ވަރަށް ފުރިހަމަ ޚިދުމަތެކެވެ. އުފަންދުވަސް އަންނަން 4 ހަފުތާއަށް ވެފައިވަނިކޮށް ޤައުމުގައި ބަލިމަޑުކަމެއް ފެތުރުނު ދަނޑިވަޅުގައި އެންއެޗުއެސުން ކުރަމުންދާ އާދަޔާޚިލާފު މަސައްކަތުގެ އަގު ވަޒަންކޮށް، ޞިއްޙީ ޚިދުމަތްތެރިންނަށް އެހީވުމަށް ތަފާތުކަމެއް ކުރުމުގެ ޚިޔާލު އޭނާއަށް އައެވެ.
ނޫސްތަކުގައި އެވާހަކަ ޖެހުމުން ޓީވީ ޗެނަލަކުންވެސް ކެޕްޓަން ޓޮމްގެ އަމާޒާބެހޭ ރިޕޯޓެއް ގެނެސްދިނެވެ. ދެތިން ދުވަސްފަހުން ބީބީސީން ގެނެސްދޭ ބްރެކްފަސްޓު ޕްރޮގްރާމުގެ މެހެމާނެއްގެގޮތުގައި ކެޕްޓަން ޓޮމް ބައިވެރިވިއެވެ.
''ގިނަ ދުވަސްތަކެއްވަންދެން ދުނިޔޭގައި ހުރެފިން. ޤައުމަށް ކުރިމަތިވި ގިނަ ދަތިދުވަސްކަތެއްވާނީ ފެނިފައި. ޝޯ ބަލަންތިބި މީހުންނަށް މިއަދުގެ ޙާލަތުވެސް ރަނގަޅުވާނެކަމުގެ އުއްމީދު ދިނުމަށް ބުނާނީ ކީކޭ؟'' ޝޯގެ ޕްރެސެންޓަރު ނާގާ މަންޗެޓީ ކެޕްޓަން ޓޮމް ކައިރީ އެއްސެވެ. ޖަވާބުގައި ކެޕްޓަން ޓޮމް ބުންޏެވެ. ''ހަނދާންކުރާތި. މާދަމާއަކީވެސް ރަނގަޅު ދުވަހެއް. މާދަމާ އަންނައިރު މިއަދުގެ ޙާލަތަށްވުރެ ރަނގަޅުވެފައިވާތަންވެސް ފެނިދާނެ.''
އެހާހިސާބުން އައު ތަރިއެއް އުފަންވިއެވެ. ބީބީސީގެ ބްރެކްފަސްޓު ޕްރޮގްރާމުގެ ޓީމުން ބަލަބަލާ ތިއްބާ ކުޑަ ވަގުތުކޮޅެއްގެ ތެރޭގައި ކެޕްޓަން ޓޮމްގެ ފަންޑަށް ލިބިފައިވާ ފައިސާ 1،000 ޕައުންޑު ފަހަނައަޅާ 1 މިލިއަނަށްވުރެ އިތުރުވިއެވެ. އިސާހިތަކު ބީބީސީ ބްރެކްފަސްޓު ޕްރޮގްރާމާ ވާދަކުރާ ގުޑް މޯނިން ބްރިޓަން ޝޯއިންވެސް ކެޕްޓަން ޓޮމްގެ ވާހަކަ ގެނެސްދިނެވެ. އެޝޯ ހުށަހަޅާ ޕިއާސް މޯގަން އޭނާގެ އަމިއްލަ ޖީބުން 10،000 ޕައުންޑް ކެޕްޓަން ޓޮމްގެ ފަންޑަށް ހަދިޔާކުރާނެކަމަށް އިޢުލާނުކުރިއެވެ.
މިލްޓަން ކީންސްއާ 12 މޭލު ދުރުގައި އޮންނަ ކުޑަކުޑަ މާސްޓަން މޮރެޓައިންގައި ކެޕްޓަން ޓޮމް އޭނާގެ ދަރިފުޅުގެ އާޢިލާއާއެކު ދިިރިއުޅެމުންދާ ގޭދޮށަށް އޭނާ ބަގީޗާގައި ބުރުޖަހާ މަންޒަރު ފެނޭތޯ ނޫސްވެރިންނާއި ހެޔޮއެދޭ މީހުން ޖަމާވަމުންދިޔައެވެ.
ކެޕްޓަން ޓޮމްގެ އުފަންދުވަހަކީ އޭޕްރިލް 30އެވެ. އޭނާގެ އަމާޒަކަށްވީ 100 އަހަރު ފުރުމުގެ ކުރިން ބަގީޗާގައި 100 ބުރު ޖެހުންކަމުގައިވީނަމަވެސް އެންމެ ދެހަފުތާގެ ތެރޭގައި ކެޕްޓަން ޓޮމްވަނީ އޭނާގެ އަމާޒު ޙާޞިލްކޮށްފައެވެ. އޭޕްރިލް 16ވަނަ ދުވަހު ކެޕްޓަން ޓޮމްވަނީ އޭނާގެ 100ވަނަ ބުރު ހަމަކޮށްފައެވެ. ބީބީސީ ބްރެކްފަސްޓު ޕްރޮގްރާމުގައި އެމަންޒުރު ވަގުތުން ބެލުންތެރިންނަށް ގެނެސްދިނެވެ. އޭނާގެ އަމާޒު ޙާޞިލްކުރި ވަގުތު އަސްކަރީ ޝަރަފުގެ ގާޑެއް އޭނާއަށް އަރުވާފައިވެއެވެ. އޭޕްރިލް 20ވަނަ ދުވަހާ ހަމައަށް އެހީގެ ފައިސާގެ ގޮތުގައި 20 މިލިއަން ޕައުންޑު ކެޕްޓަން ޓޮމް މެދުވެރިވެގެންވަނީ އެއްކޮށްފައެވެ. ހަމަ އެދުވަސްކޮޅު މަޝްހޫރު ލަވަކިޔުންތެރިޔާ މައިކަލް ބޯލްއާއެކު އެންއެޗުއެސްގެ ޚިދުމަތާބެހޭ ލަަވައެއް ރެކޯޑުކޮށް، އެލަވަ ޗާޓުތަކުގެ އެއްވަނައަށް އަރަން މިސްރާބުޖެހިއެވެ.
ކެޕްޓަން ޓޮމްގެ މަޝްހޫރުކަން އިތުރުވަމުންދިޔަ ވަރަކަށް ގޭދޮށަށް އެއްވަމުންދިޔަ މީހުންގެ ޢަދަދު ދިޔައީ އިތުރުވަމުންނެވެ. އެންމެ ފަހުން އާޢިލާއިން ކަންބޮޑުވާ ދަރަޖައަށް މީހުން ގިނަވިއެވެ. އެހާހިސާބުން ކެޕްޓަން ޓޮމްގެ އަވަށްޓެރިއެއް ވަޑާމުގެ މަސައްކަތާބެހޭ މަޝްހޫރު ޓީވީ ޝޯއެއްކަމަށްވާ ޑީއައިވައި އެސްއޯއެސް ޝޯ ހުށަހަޅާ ނިކް ނައުލްސާއި ގުޅޭނެ ނަންބަރެއް ހޯދާ އެއާޢިލާއާ ޙިއްޞާކުރިއެވެ.
ކެޕްޓަން ޓޮމްގެ ދަރިފުޅު ހަންނާއަކީ ނިކް ނައުލްސަށް ވަރަށް ތާޢީދުކުރާ މީހެކެވެ. ނިކް ނައުލްސަށް ހަންނާ މެސެޖެއް ފޮނުވާ، އެއްވެފައިވާ މީހުން ދުރުގައި ބޭތިއްބުމަށް އޭނާއަށް ކޮށްދެވޭނެކަމެއް އޮތްތޯ އޮޅުންފިލުވިއެވެ. ނިކް ނައުލްސްވަނީ އެއާޢިލާ ދިރިއުޅޭ ގޭގެ ބަގީޗާ ވަށައިގެން ފެންސެއް ޖަހާދިނުމުގެ އިންތިޒާމް ހަމަޖައްސައިދިފައެވެ. ނިކް ނައުލްސްގެ ޕަބްލިކް ރިލޭޝަންސް މެނޭޖަރު މެގަން ކާވާވެސް ހިލޭސާބަހަށް އެއާޢިލާއަށް އެހީތެރިވެދިނުމުގައި ބައިވެރިވިއެވެ. އެގޮތުން އެއާޢިލާއިން އޮޅުންފިލުވަން ބޭނުންވާ މަޢުލޫމާތާއި އެހީތެރިކަން ހޯދައިދޭން މެދުވެރިއަކަށްވިއެވެ.
އަބުރު ރައްކާތެރިކުރުމުގެ މައްސަލަތައް ބަލާ ޝިލިންގްސް ކުންފުންޏަށް މެގަން ގުޅިއެވެ. އެކުންފުންޏަކީ ވަރަށް އަގުބޮޑު އަދި ވަރަށް މަޝްހޫރު މީހުންނަށް ޚިދުމަތްދޭ ކުންފުންޏެއްގެ ގޮތުގައި މަޝްހޫރުވެފައިވާ ބައެކެވެ. ނަމަވެސް މެގަން ބުނިގޮތުގައި އޭނާ ޝިލިންގްސްއަށް ކުރި ފޯނުކޯލަކީ އޭނާގެ ޙަޔާތުގައި ކުރި އެންމެ ފަސޭހަ ފޯނުކޯލުކަމަށެވެ. ކެޕްޓަން ޓޮމްގެ އާޢިލާއަށް ކޮންމެވެސް މިންވަރެއްގެ އެހީތެރިކަމެއް ބޭނުންވާކަން ކިޔާދިނުމުން އެކުންފުނިންވަނީ އެމީހުންގެ ޚިދުމަތް އެއާޢިލާއަށް ދިނުމަށް ވަގުތުން އެއްބަސްވެފައެވެ. އަދި އެމީހުންގެ ޚިދުމަތަށް އެއްވެސް އަގެއް ނުނަގާނެކަމަށްވެސްވަނީ ބުނެފައެވެ.
އެހާހިސާބުން ޝިލިންގްސުން އިނގިރޭސިވިލާތުގެ ނޫސްވެރިންގެ ކަންކަން ބެލެހެއްޓުމާ ހަވާލުވެހުރި އިޕްސޯއަށް ގުޅިއެވެ. އަދި ކެޕްޓަން ޓޮމް ދިރިއުޅޭ ގޭގެ ބޭރުގައި ޖަހާފައިހުރި ފެންސުމަތިން ނޫސްވެރިން ނުބެލުމަށާއި ދުރުގައި ތިބެ ފޮޓޯނެގޭ ކެމެރާތައް ބޭނުންކޮށްގެން އެއާޢިލާގެ އަބުރުގެއްލޭފަދަ ފޮޓޯތައް ނުނެގުމަށް ނޫސްވެރިންނަށް އެނގުމަށް އެދުނެވެ. އަދި ކެޕްޓަން ޓޮމްގެ އާޢިލާއިން އޭނާގެ ފޮޓޯ ޙިއްޞާކުރާ ޓްވިޓަރ އެކައުންޓު މެދުވެރިކޮށް ފޮޓޯ ހޯދާ، ބޭނުންކުރުމަށް އެދުނެވެ.
ދެން ފެށުނީ އެހެން ބާބެކެވެ. ކެޕްޓަން ޓޮމްއާއި އޭނާގެ އާޢިލާއަށް ފާޑުކިޔުންތައް އަމާޒުވާން ފެށިއެވެ. އެންއެޗްއެސްގެ ޙައްޤުގައި އެއްކުރަމުންދިޔަ ފައިސާގެ އެއްބައި އެއާޢިލާއަށާއި އެމީހުންގެ ކުންފުންޏަށް ފައިދާގެގޮތުގައި ނަގަމުންދާކަމުގެ ތުހުމަތުކުރަންފެށިއެވެ. މީސްމީޑިޔާ ޕްލެޓްފޯމުތަކުގައި އެވާހަކަތައް ލިޔެ ދޮގު ޚަބަރުތައް ދައުރުވާން ފެށިއެވެ. ފައިސާ އެއްކުރަން ބޭނުންކުރާ ވެބްސައިޓު ޖަސްޓް ގިވިންގުން 2 މިލިއަން ފައުންޑަށްވުރެ ބޮޑު ޢަދަދެއް ނަގާފައިވަކަމުގެ އަޑު ފެތުރެންފެށިއެވެ. ކެޕްޓަން ޓޮމްގެ އާޢިލާއިން އެތުހުމަތުތަކަށް އިންކާރުކުރިއެވެ. އަދި ޞައްޙަނޫން މަޢުލޫމާތު ޔަޤީންކޮށްދޭ ފުލް ފެކްޓުން ޖަސްޓް ގިވިންގުން ނަގަނީ އެއްކުރެވޭ ފައިސާގެ އެކެއް އިންސައްތަކަން ޔަޤީންކޮށްދިނެވެ. އެއީ އޭރު އެއްކޮށްފައިވާ 32 މިލިއަން ޕައުންޑުގެ ތެރެއިން 320،000 ޕައުންޑެވެ.
ދުނިޔޭގެ އެކި ސަރަޙައްދުތަކަށް ކެޕްޓަން ޓޮމްގެ ވާހަކަ ފޯރާ، އޭނާއަށް ހެޔޮއެދޭ ފަރާތްތަކުން ފޮނުވަމުންދިޔަ ކާޑުތަކާއި ހަދިޔާތައް ނުތަކާވަރަށް އިތުރުވިއެވެ. ކެޕްޓަން ޓޮމްގެ އާޢިލާއަށް އެހީތެރިވުމަށް ދެން އަތުކުރި އޮޅާލީ އެސަރަޙައްދުގެ ޕޯސްޓު އޮފީހާ ޙަވާލުވެ ހުރި ބިލް ޗާންޑީއެވެ. ކެޕްޓަން ޓޮމްއަށް ފޮނުވާ ހުރިހާ ސިޓީއާއި ކާޑަށް ޕޯސްޓު އޮފީހުން ހަވާލުވުމުގެ އިންތިޒާމް ހަމަޖައްސައިދިނެވެ.
ހެޔޮއެދޭ ފަރާތްތަކުން ފޮނުވަމުންދާ ކާޑުތައް ގިނަވެ، އެންމެފަހުން އެކާޑުތައް އަތުރާފައި ބަހައްޓާނެ ތަނެއްގެ ބޭނުންޖެހުނެވެ. ދެން އެހީތެރިވީ ކެޕްޓަން ޓޮމްގެ ކާފަދަރިފުޅު ބެންޖީ ތަޢުލީމު ހާޞިލްކުރަމުންދާ މަދަރުސާއިންނެވެ. އެމަދަރުސާގެ ހޯލުގައި ކެޕްޓަން ޓޮމްއަށް ފޮނުވާފައިވާ 160،000އަށްވުރެ ގިނަ ކާޑު ރީތިކޮށް އަތުރާލާ ފުރާލިއެވެ. އެންމެފަހުން ކިލާސްތަކުގައިވެސް ކާޑުތައް އަތުރާވަރަށް ގިނަވިއެވެ. ބިލް ޗާންޑީ ބުނީ ހަމައެކަނި ކެޕްޓަން ޓޮމްއަށް އަންނަ ކާޑުތަކާއި ޕާރުސަލުތަކާ ޙަވާލުވުމަށް 3 މުވައްޒަފުން ތިބެންޖެހޭކަމަށެވެ.
ކެޕްޓަން ޓޮމްއަށް 100 އަހަރު ފުރުނު ދުވަހު އޭނާގެ އަސްކަރީ ޝަރަފު ކާނަލެއްގެ މަޤާމަށް އިނގިރޭސިވިލާތުގެ އަސްކަރިއްޔާއިން އުފުލިއެވެ. އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން އޭނާއަށް އުފަންދުވަހުގެ ތަހުނިޔާ ފޮނުއްވިއެވެ. އިނގިރޭސިވިލާތުގެ ރާނީ އެލިޒަބަތުގެ މެސެޖެއް އޭނާއަށް ފޮނުއްވިއެވެ. އަދި އަސްކަރީ ބޯޓުތައް އޭނާ ދިރިއުޅޭ އަވަށްމަތީގައި އޭނާގެ ޝަރަފުގައި ބުރުޖެހިއެވެ.
ބީބީސީ ބްރެކްފަސްޓުގެ އެޑިޓަރު ރިޗަޑް ފްރެޑިއަނީ ބުނީ ޓޮމްއަކީ މިޒަމާނުގެ ބަޠަލެއްގެ ލާމަސީލު މިޘާލެއްކަމަށެވެ. އޭނާއަކީ އަމިއްލަ މަޝްހޫރުކަން ހޯދަން މަސައްކަތްކުރާ މީހެއް ނޫންކަމަށާއި އަމިއްލަ އެދުމެއް އޮވެގެންއުޅޭ މީހެއް ނޫންކަމަށް ރިޗަޑު ބުންޏެވެ. ޓޮމްއަކީ ވަރަށް ޚާއްޞަ މީހެއްގެ ގޮތުގައި ރިޗަޑު ސިފަކުރިއެވެ. ވަރަށް އަނދިރި ވަގުތެއްގައި ޓޮމްގެ އާދަޔާޚިލާފު ހިތްވަރުން ޤައުމަށް އަލިކަމާއި އުފާވެރިކަން ގެނެސްދީފައިވާކަމަށް އޭނާ ބުންޏެވެ.