ބަންގްލަދޭޝްގައި ކުރީގައި ރައީސްކަން ކުރައްވާފައިވާ ފަރާތްތަކުން ޤާނޫނަކާއި ޚިލާފު ވެއްޖެ ނަމަ ނުވަތަ ޣައިރު ޤާނޫނީ އެއްވެސް ޢަމަލެއް ހިންގައިފި ނަމަ ޕެންޝަން އުވާލެވޭ ފަދަ ޤާނޫނެއް އެޤައުމުގެ ބޮޑު ވަޒީރު ޝައިޚް ހަސީނާ ތަޞްދީޤް ކުރައްވައިފިއެވެ.ރައީސުންނަށް ލިބިދޭ ޕެންޝަނާއި އިނާޔަތްތަކާއި ބެހޭ އާ ޤާނޫން ބޮޑުވަޒީރު ތަޞްދީޤް ކުރައްވާފައިވަނީ އިއްޔެ ބޭއްވި އެޤައުމުގެ ވަޒީރުންގެ މަޖްލީހުގައެވެ. ވަޒީރުންގެ މަޖްލީހުންވެސް އާ ޤާނޫނަށް ރުހުން ދީފައިވެއެވެ. މި ޤާނޫން ވުޖޫދަށް އައުމާއި އެކު 1979 ވަނަ އަހަރުން ފެށިގެން އެޤައުމުގައި ތަންފީޒް ކުރަމުން އައި ޤާނޫން ވަނީ އުވާލާފައެވެ.އާ ޤާނޫނު ބުނާ ގޮތުން ކުރީގެ ރައީސަކު ޣައިރު ޤާނޫނީ އަމަލެއް ހިންގެވިކަން އެޤައުމުގެ އެންމެ މަތީ ކޯޓުން ކަނޑައަޅައިފި ހިދެއްގައި އެ ރައީސަކަށް ލިބެމުން އައި ޕެންޝަނާއި އެއާއި ގުޅުން ހުރި އެހެނިހެން އިނާޔަތްތައް އުވާލެވޭނެއެވެ.އާ ޤާނޫނުގައި ރައީސުންނަށް ލިބިދޭ އެންމެހައި އިނާޔަަތްތައް ވަރަށް ފުރިހަމަޔަށް ބަޔާންވެގެންވާނޭ ކަމަށާއި،އަދި މި އާ ޤާނޫންގެ ދަށުން ކުރިން އިނާޔަތްތައް ހުއްޓިފައިވާ ކުރީގެ ރައީސުންނަށް ބައެއް އިނާޔަތްތައް ލިބުމަށް މަގުފަހިވެގެންދާނޭކަމަށް ވަޒީރުންގެ މަޖްލީހުގެ ސެކްރެޓަރީ މުޝައްރަފް ހުސައިން ވަނީ ވިދާޅުވެފައެވެ.