ބަލިމަޑުކަން ދިގުލައިގެންދާނެ، އެމެރިކާގެ ނިންމުން ބަދަލުކުރާނެކަމަށް އުއްމީދުކުރަން: ޑަބްލިއުއެޗުއޯ
ދުނިޔޭގެ ޞިއްޙަތު ޖަމްޢިއްޔާ، ޑަބްލިއުއެޗުއޯއަށް އެމެރިކާއިން ދެމުންދިޔަ މާލީ އެހީތެރިކަން ހުއްޓާލަން ނިންމި ނިންމުން ބަދަލުކުރާނެކަމަށް އުއްމީދުކުރައްވާކަމަށާއި އެންމެ މުހިންމީ ހަލުވިކަމާއެކު ފެތުރެމުންދާ ކޯވިޑް-19އާ ދެކޮޅަށް މަސައްކަތްކޮށް ކާމިޔާބުވުންކަމަށް އެޖަމްޢިއްޔާގެ ޑިރެކްޓަރ ޖެނެރަލް ތެޑްރޮސް އަދަނޮމް ގެބްރިއޭސުސް ވިދާޅުވެއްޖެއެވެ.
ނޫސްވެރިންގެ ބައްދަލުވުމެއްގައި ވާހަކަދައްކަވަމުން ތެޑްރޮސް ވިދާޅުވީ އެފްރިކާއާއި ދެކުނު އެމެރިކާގެ ބައެއް ޤައުމުތަކުގައި ކޯވިޑް-19 ފެތުރޭ މިންވަރު އިތުރުވާންފަށާފައިވާކަން ފާހަގަވެފައިވާކަމަށާއި ކޯވިޑް-19 ފެތުރެން ފަށާފައިވާ ޤައުމުތައް އޮތީ ބަލިމަޑުކަމުގެ ފުރަތަމަ މަރުޚަލާގައިކަމަށާއި ކުރިން ކޯވިޑް-19 ފެތުރެންފެށުނު ބައެއް ޤައުމުތަކުގައި އަލުން ބަލިކަން ފެތުރެންފަށާފައިވާކަމަށެވެ. ވިލާތުގެ ބައެއް ޤައުމުތަކުގެ ޙާލަތު ރަނގަޅުވަމުންދާކަން ފާހަގަކުރައްވާ ތެޑްރޮސް ވިދާޅުވީ ބަލިމަޑުކަމުގެ ވަބާއިން އެއްކޮށް މިންޖުވާން ގިނަ ދުވަސްތަކެއް ނަގާނެކަމަށާއި އަދިވެސް ގިނަ މަސައްކަތްތަކެއް ކުރަންޖެހޭ ކަމަށެވެ. ތެޑްރޮސް ވިދާޅުވީ އެމެރިކާގެ ނިންމުން ބަދަލުކުރާނެކަމަށް އުއްމީދުކުރައްވާކަމަށެވެ. އަދި އިންސާނުންގެ ފުރާނަ ސަލާމަތްކުރުމަށް ދުނިޔޭގެ ޞިއްޙަތު ޖަމްޢިއްޔާއާ އަލުން ބައިވެރިވުމަކީ އެމެރިކާގެ ރައްޔިތުންގެ ރައްކާތެރިކަން ކަށަވަރުކުރުމަށްވެސް އެޅޭ މުހިންމު ފިޔަވަޅެއްކަމަށް އޭނާ ވިދާޅުވިއެވެ.
މިދިޔަ ހަފުތާގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްވަނީ ކޯވިޑް-19އާ ދެކޮޅަށް ދުނިޔޭގެ ޞިއްޙަތު ޖަމްޢިއްޔާއިން ކުރަމުންދާ މަސައްކަތަށް ފާޑުވިދާޅުވެ، އެމެރިކާއިން އެޖަމްޢިއްޔާއަށް ދެމުންދިޔަ މާލީ އެހީތެރިކަން މެދުކަނޑާލައްވާފައެވެ.