މެދުއިރުމަތީގެ ޤައުމުތަކުގެ ތެރެއިން އެންމެ ހަލުވިކަމާއެކު ކޯވިޑް-19 ފެތުރޭ ޤައުމަކަށް ތުރުކީވިލާތް

ތުރުކީވިލާތުގައި ކޯވިޑް-19ގެ އަސަރުކޮށްފައިވާ މީހުންގެ ޢަދަދު 82،300އަށް އިތުރުވެއްޖެއެވެ.

ފާއިތުވީ 24 ގަޑިއިރުގެ ތެރޭގައި އަލަށް ކޯވިޑް-19 ޖެހިފައިވާ 3،783 މީހުން ތުރުކީވިލާތުންވަނީ ފެނިފައެވެ. އެޢަދަދާއެކު މެދުއިރުމަތީގެ ޤައުމުތަކުގެ ތެރެއިން ކޯވިޑް-19ގެ އަސަރު އެންމެ ބޮޑަށް ކޮށްފައިވާ ޤައުމުގެގޮތުގައި ކުރިން އޮތް އީރާނުގައި ބަލިމަޑުކަމުގެ އަސަރުކޮށްފައިވާ މީހުންގެ ޢަދަދަށްވުރެ ތުރުކީވިލާތުގައި ބަލިމަޑުކަމުގެ އަސަރުކޮށްފައިވާ މީހުންގެ ޢަދަދުވަނީ އިތުރުވެފައެވެ. ތުރުކީވިލާތުގައި ކޯވިޑް-19 ޖެހިފައިވާ މީހުންގެ ޢަދަދުވަނީ އެންމެ ފުރަތަމަ ބަލިމަޑުކަން ފެތުރުނު ޗައިނާއާ އެއްވަރުވެފައެވެ.

ތުރުކީވިލާތުގެ ޞިއްޙަތާ ބެހޭ ވަޒީރު ފަހްރެއްތިން ކޮޗާ ވިދާޅުވީ ފާއިތުވީ 24 ގަޑިއިރުގެ ތެރޭގައި ބަލިމަޑުކަމުގެ ސަބަބުން 121 މީހުން މަރުވެފައިވާކަމަށެވެ. އެއާއެކު އެޤައުމުގައި ކޯވިޑް-19 ޖެހިގެން މަރުވި މީހުންގެ ޖުމްލަ ޢަދަދުވަނީ 1،890އަށް އިތުރުވެފައެވެ. އެއްދުވަސް ތެރޭގައި ކޯވިޑް-19އަށް 40,520 ތަހުލީލުކޮށްފައިވާކަމަށްވެސް އޭނާ ވިދާޅުވިއެވެ. ތުރުކީވިލާތުގެ ސަރުކާރުންވަނީ އެޤައުމުގެ 31 ސިޓީއަކުން ދުތުރުކުރުން އިތުރު 15 ދުވަހަށް މަނާކޮށްފައެވެ.

ތުރުކީވިލާތާ އިންވެގެންއޮންނަ އީރާނުގައި ބަލިމަޑުކަން ފެތުރޭ މިންވަރު މިހާރުވަނީ ކޮންމެވެސް ވަރަކަށް މަޑުޖެހިފައެވެ. އެޤައުމުގައި އެންމެ ހަލުވިކަމާއެކު ކޯވިޑް-19 ފެތުރުނު ދުވަސްކޮޅު ބަލީގެ އަސަރުކޮށްފައިވާ 3،000އަށްވުރެ ގިނަ މީހުން ދުވާލެއްގެ މައްޗަށް ފެނިފައިވެއެވެ. ނަމަވެސް އެޢަދަދު މިހާރުވަނީ 1،000އަށް ދަށްވެފައެވެ. އަދި މަރުވާ މީހުންގެ ޢަދަދުވެސް މިހާރުވަނީ 73ށް ދަށްފައެވެ. އެއީ ފާއިތުވީ އެއްމަސް ދުވަހުގެ ތެރޭގައި ބަލިމަޑުކަމުގެ ސަަބަބުން އެއްދުވަސް ތެރޭގައި އެޤައުމުގައި މީހުން މަރުވި އެންމެ ދަށް ޢަދަދެވެ.

ތިން މަރުޙަލާއަކަށް ބަހާލައިގެން އީރާނުގައި އަޅާފައިވާ ރައްކާތެރިކަމުގެ ފިޔަވަޅުތަކަށް ދޫދިނުމަށް އެޤައުމުގެ ސަރުކާރުންވަނީ ނިންމާފައެވެ. އެގޮތުން ފުރަތަމަ އަދި ދެވަނަ މަރުޙަލާ މިހާރުވަނީ ފުރިހަމަކޮށްފައެވެ. ވެރިކަންކުރާ ތެހްރާން ފިޔަވާ އެހެން ސަރަޙައްދުތަކުގެ ވިޔަފާރިތައް މީގެ އެއް ހަފުތާކުރިންވަނީ ހުޅުވާފައެވެ. އޭގެ ފަހުން ތެހްރާނުގެ ބައެއް ވިޔަފާރިތައްވަނީ އަލުން ހުޅުވާފައެވެ. އޭގެ ތެރޭގައި ބައެއް ފިހާރަތަކާއި ކާރުޚާނާތަކާއި ގުދަންތައް ހިމެނެއެވެ. ނަމަވެސް ތެހްރާންގެ ވިޔަފާރިތައް އަލުން ހުޅުވަން ނިންމި ނިންމުމަށް ޢާންމުންގެ ފަރާތުން ބޮޑު ތަރުޙީބެއް ލިބިފައެއް ނުވެއެވެ. ގިނަ ޢަދަދެއްގެ ޢާންމުން އަދިވެސް ބޭރުތެރެއަށް ނުނުކުމެ ގޭގައި މަޑުކުރަމުންދާތީ ފިހާރަތަކަށް ބާޒާރުކުރަންދާ މީހުންގެ ޢަދަދު ވަރަށް ދަށެވެ.

ތުރުކީވިލާތުގެ ރެސްޓޯރަންޓުތަކާއި ކެފޭތަކާއި މަދަރުސާތަކާއި ޖިމްތައްފަދަ ތަންތަން އަދިވެސް ހުރީ ބަންދުކޮށްފައެވެ. އެފަދަ ތަންތަން އަލުން ހުޅުވާނީ ފުރަތަމަ އަދި ދެވަނަ މަރުޙަލާގެ ކާމިޔާބީއަށް ބަލާ ތިންވަނަ މަރުޙަލާގައެވެ.

ރަސްމީ ޢަދަދުތައް ދައްކާގޮތުގައި އީރާނުގައި މިހާތަނަށް 80,868 މީހަކަށް ކޯވިޑް-19 ޖެހި، 5,031 މީހުންވަނީ މަރުވެފައެވެ. އީރާނުގެ ޤާނޫނުހަދާ މަޖިލީހުން ނެރުނު ރިޕޯޓެެއްގައި ބުނީ ބަލިޖެހުނު މީހުންގެ އަސްލު ޢަދަދު އިޢުލާނުކޮށްފައިވާ ޢަދަދަށްވުރެ 10 ގުނަ އިތުރުވާނެކަމަށް ބެލެވޭކަށާއި މަރުވި މީހުންގެ ޢަދަދުވެސް މިހާރު އިޢުލާނުކޮށްފައިވާ ޢަދަދުތަކަށްވުރެ ދެގުނަ އިތުރުވާނެކަމަށް ޤަބޫލުކުރެވޭކަމަށެވެ. އެހެންކަމުން އީރާނުގައި އަދިވެސް ހަލުވިކަމާއެކު ބަލިފެތުރެމުންދާކަމަށް ކަމާބެހޭ މާހިރުން ޤަބޫލުކުރެއެވެ.

ކޯވިޑް-19އާ ގުޅިގެން އީރާނުގައި އަޅާފައިވާ ރައްކާތެރިކަމުގެ ފިޔަވަޅުތަކަށް ދޫދޭން ނިންމި ނިންމުން އެޤައުމުގެ ރައީސް ހަސަން ރޫޙާނީވަނީ ދިފާޢުކުރައްވާފައެވެ. ރޫޙާނީ ވިދާޅުވީ ރައްޔިތުންގެ ރައްކާތެރިކަން މުހިންމުވާގޮތަށް، ޤައުމުގެ އިޤްތިޞާދުވެސް ރައްކާތެރިކުރުން މުުހިންމުކަމަށެވެ.