ކޯވިޑް-19ގެ ސަބަބުން ސާކުގެ ޤައުމުތަކަށް ލިބޭ ގެއްލުންތަކުގައި އެހީތެރިވުމަށް އެކުލަވާލާފައިވާ ޚާއްޞަ ފަންޑުގެ ދަށުން އިންޑިޔާއިން އަފްޣާނިސްތާނަށް ގިނަ ޢަދަދެއްގެ ބޭސް ފޯރުކޮށްދޭން ނިންމައިފިއެވެ.
އަފްޣާނިސްތާނުގައި 784 މީހުންނަށްވަނީ ކޯވިޑް-19 ޖެހިފައެވެ. އަދި ބަލިމަޑުކަމުގެ ސަބަބުން 26 މީހުންވަނީ މަރުވެފައެވެ. އިންޑިޔާގެ ބޮޑުވަޒީރު ނަރެންދްރަ މޯދީ އިސްވެ އުފައްދަވާފައިވާ ޚާއްޞަ ފަންޑުން ޚަރަދުކޮށްގެން ހައިޑްރޮކްސިކޮލޮރިކީން ނަމަކަށް ކިޔާ ބޭހުގެ 500،000 ގުޅަ އަފްޣާނިސްތާނަށް ފޯރުކޮށްދޭން އިންޑިޔާއިންވަނީ ނިންމާފައެވެ. އެބޭސް އަފްޣާނިސްތާނަށް ވަރަށް އަވަހަކަށް ފޮނުވޭނެ އިންތިޒާމް ހަމަޖައްސަމުންދާކަމަށްވެސް އިންޑިޔާއިންވަނީ ބުނެފައެވެ.
މެލޭރިޔާއަށް ފަރުވާ ދިނުމަށް ބޭނުންކުރާ އެބޭހުގެ ސަބަބުން ކޯވިޑް-19 ޖެހިފައިވާ މީހުން އަވަހަށް ބަލިން ފަސޭހަވުމަށް އެހީތެރިވެދޭކަމަށް ބައެއް ދިރާސާތަކުންވަނީ ދައްކާފައެވެ. އެހެންކަމުން ދުނިޔޭގައި އެބޭހަށް ޖެހިފައިވާ ބޭނުންވަނީ ފާއިތުވި ހަފުތާތަކުގެ ތެރޭގައި ވަރަށް ބޮޑަށް އިތުރުވެފައެވެ. އަދި އިންޑިޔާގެ ރައްޔިތުންނަށް ފުދޭވަރަށް ބޭސް ބެހެއްޓުމަށް އެޤައުމުންވަނީ ބޭސް ބޭރުކުރާ މިންވަރު ދަށްކޮށްފައެވެ.
އެނިންމުން ބަދަލުކޮށް، ސާކުގެ ގިނަ ޤައުމުތަކަކަށް އެބޭސް މިހާރުވަނީ ފޯރުކޮށްދީފައެވެ. އޭގެ ތެރޭގައި ދިވެހިރާއްޖެއާއި ސްރީލަންކާއާއި ބޫޓާނާއި ނޭޕާލާއި ބަންގްލަދޭޝް ހިމެނެއެވެ. ނަމަވެސް ޕާކިސްތާނުން އެފަދަ އެހީތެރިކަމަކަށް އެދިފައިނުވާތީ އެޤައުމަށް ބޭސް ފޯރުކޮށްދީފައިނުވާކަމަށް އިންޑިޔާއިން ބުނެއެވެ. އިންޑިޔާގެ ސަރުކާރުން ބުނީ ޕާކިސްތާނުގައި އެބޭސް މަދުނުވާ މިންވަރަށް ހުރިކަމަށް މީގެ ކުރިން އިޢުލާނުކޮށްފައިވާކަމަށެވެ.