ދުނިޔޭގައި އެންމެ ހަލުވިކަމާއެކު ކޯވިޑް-19 ފެތުރޭ ޤައުމުކަމަށްވާ އެމެރިކާގެ ބައެއް ސްޓޭޓުތަކުއި ޢާންމުން ބޭރަށް ނުކުންނައިރު މާސްކު ބޭނުންކުރުން ލާޒިމުކުރަން ޢަމުރުކޮށްފިއެވެ.
އެމެރިކާގައި 644,348 މީހުންނަށް މިހާތަނަށްވަނީ ކޯވިޑް-19 ޖެހިފައެެވެ. އަދި ބަލިމަޑުކަމުގެ ސަބަބުން މަރުވި މީހުންގެ ޢަދަދުވަނީ 28,554އަށް އިތުރުވެފައެވެ.
އެމެރިކާގެ ކަނެކްޓިކަޓާއި މޭރީލޭންޑާއި ނިއު ޔޯކާއި ޕެންސިލްވޭނިއާއިން މިހާރުވަނީ އާންމުން ބޭރަށް ނުކުންނައިރު އަނގަމައްޗާއި ނޭފަތް ނިވާކުރުމަށް މާސްކު ބޭނުންކުރުމަށް އަންގާފައެވެ. ނިއު ޔޯކުގެ ގަވަރުނަރު އެންޑްރޫ ކޯމޯ ވިދާޅުވީ އާންމުންގެ ތެރެއަށް ނުކުންނައިރު ގައި ދުރުކަން ނުބެހެއްޓޭނަމަ ކޮންމެ މީހަކުވެސް މާސްކު ބޭނުންކުރަންވާނެ ކަމަށެވެ. މިދިޔަ ހަފުތާގެ ތެރޭގައި ނިއު ޖާޒީއާއި ލޮސް އެންޖެލެސްގައިވަނީ އެފަދަ އަމުރެއް ނެރެފައެވެ. އޭގެ އިތުރުން ކަންސަސްގެ ގަވަރުނަރު ލައުރާ ކެލީވެސްވަނީ މޫނު ނިވާކުރުމަށް އިލްތިމާޞްކުރައްވާފައެވެ. އެމެރިކާގެ އެންމެ އާބާދީ ބޮޑު ކެލިފޯނިއާގެ ގަވަރުނަރު ގާވިން ނިއުސަމް ވިދާޅުވީ އެސްޓޭޓުގައި ދިރިއުޅޭ މީހުން ދިގު މުއްދަތަކަށް މާސްކު ބޭނުންކުރަން ޖެހުން އެކަށީގެންވާކަމަށެވެ. އަދި އެގޮޮތަށް އާންމު ދިރުއުޅުން ހާނަންޖެހޭކަމަށްވެސް އޭނާ ވިދާޅުވިއެވެ.
އެމެރިކާގެ ހުޅަނގުގެ ސަރަޙައްދުތަކުގައި އަލުން އިޤްތިޞާދީ ޙަރަކާތްތައް ފަށައިގަތުމަށްދަނީ ތައްޔާރުވަމުންނެވެ. އެމެރިކާގެ ރައީސް ޑޮނަލްޑް ޓްރަމްޕްވަނީ އެޤައުމުގައި ކޯވިޑް-19 އެންމެ ބޮޑަށް ފެތުރޭނެ މުއްދަތު ފަހަނައަޅާގޮސްފައިވާކަމަށް ވިދާޅުވެ ޤައުމުގެ އިޤްތިޞާދީ ޙަރަކާތްތައް އަލުން ފަށައިގަތުމަށް ޚާއްޞަ އުޞޫލެއް ވަރަށް އަވަހަށް އިޢުލާނުކުރައްވާނެކަމަށް ވިދާޅުވެފައެވެ.