ކޯވިޑް-19 ޖެހިފައިވާ ނުވަ މީހަކު އިޓަލީވިލާތުން ޖަރުމަނުވިލާތަށް ފޮނުވައިފިއެވެ.
ކޯވިޑް-19 މިހާރު އެންމެ ހަލުވިކަމާއެކު ފެތުރެމުންދަނީ އިޓަލީވިލާތުގައެވެ. އެޤައުމުގައި މިހާތަނަށް 69,176 މީހުންނަށް ވައިރަހުގެ އަސަރުކޮށްފައިވެއެވެ. އަދި މަރުވި މީހުންގެ ޢަދަދުވަނީ 6,820އަށްވުރެ އިތުރުވެފައެވެ. ވައިރަހުގެ ސަބަބުން މަރުވާ މީހުންގެ ނިސްބަތްދަނީ އެއްދުވަހުން އަނެއްދުވަހަށް އިތުރުވަމުންނެވެ.
ވައިރަހުގެ އަސަރުކޮށްފައިވާ މީހުންގެ ޢަދަދު އިންތިހާއަށް އިތުރުވެފައިވާތީ އިޓަލީވިލާތަށްވަނީ އެންމެ އެކަށީގެންވާ ޞިއްޙީ ފަރުވާދިނުމަށް ނުކުޅެދިފައެވެ. އަދި އިޓަލީވިލާތުންވަނީ ބަލި މީހުންނަށް ފަރުވާދިނުމުގައި ޖަރުމަނުވިލާތުގެ އެހީތެރިކަމަށް އެދިފައެވެ.
އެހެންކަމުން އެޤައުމަށް އެހީތެރިވުމުގެ ގޮތުން ޖަރުމަނުވިލާތުގެ ސަކްސޮނީ ސްޓޭޓުންވަނީ އިޓަލީވިލާތުގެ 9 މީހަކާ ހަވާލުވެފައެވެ. ކުރިއަށް އޮތް ދުވަސްތަކުގައި އިތުރު 10 މީހުން އެޤައުމުގެ ނޯތްރައިން ވެސްޓްފޭލިއާ ސްޓޭޓަށް ގެންދިއުމަށްވަނީ ހަމަޖެހިފައިވެއެވެ. ކޯވިޑް-19 ޖެހިފައިވާ ބަލިމީހުން ފަރަންސޭސިވިލާތުންވެސް ޖަރުމަނުވިލާތަށް ގެންގޮސްފައިވެއެވެ.
ކޯވިޑް-19 ޖެހިފައިވާ 33,593 މީހުން މިހާތަނަށް ޖަރުމަނުވިލާތުން ފެނިފައިވެއެވެ. އެޤައުމުގައި ވައިރަހުގެ ސަބަބުން މަރުވެފައިވަނީ 164 މީހުންނެވެ.