އިސްލާމްދީނުގައި އޮތް ސާފުތާހިރުކަމުގެ މަންހަޖާ ފުށުއަރާގޮތަށް އިންސާނުންގެ ޢަމަލުތައް ބެހެއްޓުމުގެ ސަބަބުން ނުރައްކާތެރި އެކި ވަބާތަކާއި ސިއްޙީ ބޮޑެތި ގެއްލުންތައް ކުރިމަތިވަމުން އަންނަކަން ފާހަގަކުރައްވައި ސާފުތާހިރުކަމަށް އިތުރު ސަމާލުކަމެއް ދިނުމަށް މިއަދުގެ ހުކުރު ޚުތުބާގައި ގޮވާލައްވައިފިއެވެ.
އިސްލާމްދީނުގައި އޮތީ ސާފުތާހިރުކަމުގެ އެންމެ ފުރިހަމަ މަންހަޖުކަން ފާހަގަކުރައްވައި، މިއަދުގެ ހުކުރު ޚުޠުބާގައިވަނީ އެއީ މުސްލިމުންނާއި މުޅި އިންސާނިއްޔަތުގެ ސަލާމަތާ ރައްކާތެރިކަމަށްޓަކާ ކަނޑައަޅުއްވާފައިވާ ނިޒާމެއްކަން ބަޔާންކުރައްވާފައެވެ. އެއާ ފުށުއަރާގޮތަށް އިންސަނުންގެ ޢަމަލުތައް ބެހެއްޓުމުގެ ސަބަބުން ނުރައްކާތެރި އެކި ވަބާތަކާއި ބަކިމަޑުކަން ޢާއްމުވަމުން އަންކަމަށް ޚުތުބާގައި ވަނީ ފާހަގަކުރައްވާފައެވެ.
އިސްލާމް ދީނުގައި ސާފުތާހިރުކަމަށް ބާރުއަޅުއްވާފައިވަނީ ހަމައެކަނި އަޅުކަންކުރުމާ ގުޅިގެން އެކަނި ނޫންކަމަށާ، އިންސާނާގެ ހަށިގަނޑާއި ފޭރާމާއި ދިރިއުޅޭ މާޙައުލުގެ ސާފުތާހިރުގެ މުހިއްމުކަން ޚުތުބާގައިވަނީ ފާހަގަކުރައްވާފައެވެ. އަދި މާތްﷲގެ ހަޟްރަތުގައި ލޮބުވެތި މީހަކަށްވެވޭނީ އެތެރެ ފުށުގެ ކިބުރުވެރިކަމުންނާއި ބޮޑާކަމާއި ޝިރުކުގެ މުޑުދާރު ޢަމަލުތަކުން ނަފްސު ޠާހިރުކުރުމަށާއި ކައިބޮއިއުޅޭ ތަކެއްޗަކީ ޙަލާލުތަކެތިކަމަށް ހެދުމަށްވެސް ޙުޠުބާގައިވަނީ ހަނދާންކޮށްދެއްވާފައެވެ. އަދި ނުތާހިރު ހުރިހާކަމަކުން ދުރުވުމަށް ޙުޠުބާގައިވަނީ ބާރު އަޅުއްވާފައެވެ.
"އެގޮތުން ތިމާގެ ނަފްސާއި ގޯތި ގެދޮރާއި މިސްކިތްތަކާއި މަދުރަސާތަކާއި އޮފސްތަކާއި މަގުތައް ސާފުތާހިރުކޮށް ބަލަހައްޓާ ސާފުތާހިރުކަމާއި ފުށުއަރާ އެންމެހާ އާދަތަކަކުން ދުރުހެލިވާން ޖެހޭ. އަދި ބިދޭސީން ގެންގުޅޭ ފަރާތްތަކުން އެމީހުންގެ ބެލުމުގެ ދަށުގައި ތިބޭ ބިދޭސީންނަށްވެސް ސާފުތާހިރުވުމަށް ބާރު އަޅަންޖެހޭ." ޚުޠުބާގައި ވިދާޅުވެފައިވެއެވެ.
މިހާރު މުޅި ދުނިޔެއަށް ފެތުރެމުން އަންނަ ކޯވިޑް-19ގެ ޙާލަތަށް އަލިއަޅުއްވާލައްވަމުން ޚުތުބާގައި ވިދާޅުވީ ސިއްޙީ ކަންކަމާއި ސާފުތާހިރުކަމަށް އިހްމާލުވެވޭނަމަ އިންސާނުންގެތެރޭގައި ތަފާތު ބަލިތައް ފެތުރި ނުރައްކާތެރި ވަބާތައް ޢާއްމުވެ ސިއްޙީ ބޮޑެތި މައްސަލަތައް ކުރިމަތިވާނެކަމަށެވެ. އަދި މިބަލިތަކުން ޢާއްމު ރައްޔިތުން ސަލާމާތްކުރުމަށް ސަރުކާރާއި ކަމާބެހޭ އެންމެހާ ފަރާތްތަކުން ކުރާ މަސައްކަތްތަކުގައި ޢާއްމުގެ ފުރިހަމަ އެއްބާރުލުން ދިނުމަށް ޚުތުބާގައިވަނީ ނަސޭޙަތްތެރިވެފައެވެ.
"ރައްޔިތުންގެ ކަންބޮޑުވުމާއި މާޔޫސްވާ ވަހަކަތައް ނުދެއްކުމަށާއި ސާބިތު ނުހިފޭ ދޮގު ޚަބަރު ނުފެތުރުމަށާއި ތަންތަނަށް އެއްވެ ނޫޅުމަށް އެފަރާތްތަކުން އެދަނީ ކެނޑިނޭޅި ނަސޭޙަތްތެރިވަމުން. އެހެންކަމުން އެފަދަ އިރުޝާދުތަކަށް ޢަމަލުކުރުމާއެކު އެންމެހާ ފާފަތަކުން ދުރުހެލިވެ މުޅި ދުނިޔެއަށް ދިމަވެފައިވާ މިނުރައްކާތެރި ޙާލަތުން މިންޖުވޭތޯ ﷲގެ ހަޟްރަތުގައި ދުޢާ ދަންނަވާ އިސްތިޣްފާރުކުރުން ގިނަ ކުރައްވާ." ޚުޠުބާގައި ވިދާޅުވެފައިވެއެވެ.
މިއަދުގެ ހުކުރު ޚުތުބާގައިވަނީ މީސްތަކުންގެ އަތްތަކުން ހޯދައިގަންނަ ނުބައި ވަބާތަކުން ސަލާމަތްވުމަށް ޢާލަމްތަކުގެ ވެރި ރަސްކަލާންގެ ހަޟުރަތުގައި ގިނަގިނައި އެދި ދުޢާކުރުމަށް ގޮވާލައްވާފައެވެ. އަދި މިދަނޑިވަޅުގައި ކަމާބެހޭ ފަރާތްތަކުން ދެއްވާ އިރުޝާދުތަކަށް ފުރިހަމަގޮތުގައި ބޯލެނބުމަށްވެސް ޙުތުބާގައިވަނީ ނަސޭޙަތްތެރިވެފައެވެ.
މާލެއާއި ރާއްޖޭގެ ރިސޯޓުތަކުގައި ޖަމާޢަތުގައި ނަމާދުކުރުމާއި ހުކުރުނަމާދުކުރުން ވަނީ މެދުކަނޑާލާފައެވެ. އެހެންނަމަވެސް ރާއްޖޭގެ އެހެން ރަށްރަށުގައި މިއަދު ހުކުރުނަމާދުގެ ޖަމާޢަތް އޮތެވެ.