އިސްރާއީލުގެ އައު ސަރުކާރު އެކުލަވާލުމަށް އެޤައުމުގެ އިދިކޮޅު ލީޑަރު ބެނީ ގެންޓްޒާ ހަވާލުކޮށްފިއެވެ.
މިމަހު ކުރީކޮޅު އިސްރާއީލުގައި ބޭއްވި ޢާންމު އިންތިޚާބުގައި ބޮޑުވަޒީރު ބެންޔަމިން ނަތަންޔާހޫވަނީ ސަތޭކަ ވިހި މެންބަރުންގެ ޤާނޫނުހަދާ މަޖިލީހުގެ ސާފު އަޣްލަބިއްޔަތެއް ހޯއްދެވުމަށް ނާކާމިޔާބުވެވަޑައިގެންފައެވެ. އަދި މަޖިލީހުގެ 61 މެންބަރުންވަނީ އިދިކޮޅު ބްލޫ އެންޑް ވައިޓް ޕާޓީގެ ލީޑަރު ގެންޓްޒަށް ސަރުކާރެއް އެކުލަވާލުމުގެ މަސްޢޫލިއްޔަތު ދިނުމަށް ތާޢީދުކޮށްފައެވެ. އިސްރާއީލުގެ ރައީސް ރޫވެން ރިވްލިންވެސްވަނީ އެގޮތަށް ލަފާދެއްވާފައެވެ. އެހެންކަމުން ކުރިއަށް އޮތް 28 ދުވަހުގެ ތެރޭގައި ގުޅިފައިވާ ސަރުކާރެއް އެކުލަވާލައްވަން ގެންޓްޒަށް ޖެހިވަޑައިގަންނަވާނެއެވެ.
ބެނީ ގެންޓްޒްވަނީ ސަރުކާރު އެކުލަވާލެއްވުމުގައި ބޮޑުވަޒީރު ނަތަންޔާހޫ އެއްބާރުލެއްވުން ދެއްވުމަށް އެދިވަޑައިގެންފައެވެ. އަދި އިއްތިޙާދުގައި ބައިވެރިވުމަށްވަނީ ދަޢުވަތު ދެއްވާފައެވެ. ނަމަވެސް ގެންޓްޒަށް ސަރުކާރެއް އެކުލަވާލުމުގައި ބޮޑެތި ދަތިތަކަކާ ކުރިމަތިލާންޖެހިވަޑައިގަންނަވާނެކަމަށް ބެލެވެއެވެ.
2009ވަނަ އަހަރުން ފެށިގެން އިސްރާއީލުގެ ބޮޑުވަޒީރުކަން ކުރައްވަނީ ނަތަންޔާހޫއެވެ. އޭނާވަނީ އޭގެ ކުރިން 1996ން 1999އަށްވެސް ބޮޑުވަޒީރުކަން ކުރައްވާފައެވެ.