ކޯވިޑް-19 ފެތުރުން ހުއްޓުވުމަށް އިންޑިޔާގައި ޚާއްޞަ ފިޔަވަޅުތަކެއް އަޅައިފިއެވެ.
އެގޮތުން ވައިރަހުގެ އަސަރު އެންމެ ބޮޑަށް ކޮށްފައިވާ މަހާރާޝްތްރާ ސްޓޭޓުގައި ޢާންމު ދަތުރުފަތުރަށް ބޭނުންކުރާ ބަހާއި ރޭލުތައް ރަނގަޅަށް ސާފުކޮށް ޖަރާސީމު ފިލުވުގެ މަސައްކަތްވަނީ ފަށާފައެވެ. އޭސީކޮށްފައިވާ ރޭލުތަކުގައި ބޭނުންކުރާ ރަޖާތަކާއި ދޮރުފޮތިފަދަ ތަކެތި ބޭނުންކުރުން ހުއްޓާލާ، ރޭލުތަކުން ޖަރާސީމުފިލުވާ އެއްކޮށް ސާފުކުރުމަށް އެޤައުމުގެ އިދާރާތަކުންވަނީ އަންގާފައެވެ.
ވައިރަސް ފެތުރުން ހުއްޓުވުމަށް އިންޑިޔާގެ ގިނަ މަދަރުސާތަކާއި ވިޔަފާރިތައް މިހާރުވަނީ ބަންދުކޮށްފައެވެ. އަދި 50 މީހުންނަށްވުރެ ގިނަ މީހުން އެއްފަހަރާ އެއްވެ އުޅުންވެސްވަނީ މަނާކޮށްފައެވެ. ގިނަ ޤައުމުތަކަށް ދޫކޮށްފައިވާ ވިސާތައް ބަލައިގަތުން ހުއްޓާލާ، ސަރަޙައްދީ ރޮނގުތައްވެސް އެޤައުމުންވަނީ ބަންދުކޮށްފައެވެ.
އެންމެ ފަހުގެ ތަފާސްހިސާބުތަކުން ދައްކާގޮތުގައި އެކެއް ޕޮއިންޓު ތިނެއް ބިލިއަން މީހުންގެ އާބާދީއެއް އޮންނަ އިންޑިޔާގައި 129 މީހަކަށް ކޯވިޑް-19 ޖެހި، 3 މީހުންވަނީ މަރުވެފައެވެ. އެއީ އޭޝިޔާއާއި ވިލާތާއި ދެކުނު އެމެރިކާގެ ގިނަ ޤައުމުތަކަށްވުރެ ދަށް ޢަދަދެކެވެ. ނަމަވެސް ވައިރަސްޖެހޭ މީހުންގެ ޢަދަދު އިތުރުވަމުންދާނަމަ އިންޑިޔާގެ ޞިއްޙީފަރުވާދޭ މަރުކަޒުތަކުން އެންމެ އެކަށީގެންވާ ފަރުވާ ނުދެވޭނެކަމުގެ ބިރު އޮތީ ހީވެފައެވެ.