ހަލުވިކަމާއެކު މުޅި ދުނިޔެއަށް ފެތުރެމުންދާ ކޯވިޑް-19ވަނީ މިހާތަނަށް 128 ޤައުމަކާއި ސަރަޙައްދަކަށް ފެތުރިފައެވެ. ވައިރަސް ޖެހުނު މީހުންގެ ޖުމްލަ ޢަދަދު 126،000އަށްވުރެ އިތުރުވެ 4،600އަށްވުރެ ގިނަ މީހުންވަނީ މަރުވެފައެވެ. ވައިރަސް ފެތުރޭ މިންވަރު ދަށްކުރުމަށް ދުނިޔޭގެ ހުރިހާ ސަރަޙައްދުތަކުންދަނީ ވަރުބަލިކަމެއްނެތި މަސައްކަތްކުރަމުންނެވެ.
ޤައުމެއްގައި ކޯވިޑް-19 ފެތުރެންފަށައިފިނަމަ އެޤައުމުގައި ދިރިއުޅޭ މީހުނަށް ކެތްތެރިވާން މަޖުބޫރުވެއެވެ. ހަލުވިކަމާއެކު ކޯވިޑް-19 ފެތުރެމުންދާ އިޓަލީވިލާތް މިހާރު އޮތީ އެފަދަ ޙާލަތެއްގައެވެ.
ވައިރަސް ފެތުރޭ މިންވަރު މަދުކުރުމަށް އޭޕްރިލް މަހުގެ 3ވަނަ ދުވަހާހަމައަށް 60 މިލިޔަން މީހުންގެ އާބާދީއެއް އޮންނަ އިޓަލީވިލާތް މިހާރު އޮތީ ބަންދުކޮށްފައެވެ. ސުޕަމާކެޓުތަކުގެ ބޭރުގައި ދިގު ކިއުތައް ހަދާފައި އޮންނަ މަންޒަރަކީ މިހާރު އާންމު މަންޒަރެކެވެ. ސުޕަމާކެޓުތަކަށް އެއްފަހަރާ ވަދެވޭ މީހުންގެ ޢަދަދު އޮތީ ހިފެހެއްޓިފައެވެ. އެހެންކަމުން އެމީހެއްގެ ބުރު ޖެހެންދެން ފިހާރަތަކުގެ ބޭރުގައި މަޑުމައިތިރިކަމާއެކު މީހުން މަޑުކޮށްގެންތިބެއެވެ. ކޮންމެ ދެމީހެއް ދޭތެރޭ އެންމެ މަދުވެގެން އެއް މީޓަރުގެ ދުރުމިނެއް ބަހައްޓައެވެ. އެއީ ކޯވިޑް-19ން ރައްކާތެރިވުމަށް ދޭ އިރުޝާދުތަކުގައި އަންގާފައިވާ ގޮތެވެ.
އިޓަލީވިލާތުގެ ބޮޑުވަޒީރު ގުސެއްޕެ ކޮންތޭވަނީ އެޤައުމުގެ އެއް ސަރަޙައްދުން އަނެއް ސަރަޙައްދަށް ދަތުރުކުރުމުގައި އަޅާފައިވާ ފިޔަވަޅުތައް އިތުރަށް ހަރުކަށިކުރުން އެކަށީގެންވާކަމަށް ވިދާޅުވެފައެވެ. އިޓަލީވިލާތުގައި އަޅާފައިވާ ފިޔަވަޅުތަކަކީ ދެވަނަ ބޮޑު ހަނގުރާމައިގެ ފަހުން ހުޅަނގުގެ ޤައުމެއްގައި ހަރުކަށި ފިޔަވަޅުތަކެއް އެޅި ފުރަތަމަ ފަހަރެވެ. އިޓަލީވިލާތުގެ ރައްޔިތުންދަނީ ސަރުކާރުން އަޅާ ފިޔަވަޅުތަކަށް އިޚްތިރާމުކޮށް ކިޔަމަންތެރިކަމާއެކު ކަމޭހިތަމުންނެވެ. ބޮޑެތި ސިޓީތަށްވަނީ ހަލަބޮލިކަންގެއްލި ހިމޭންވެފައެވެ. ގިނަ ފިހާރަތަކާއި ރެސްޓޯރަންޓުތައް ހުރީ ބަންދުކޮށްފައެވެ. ވައިގެ ދަތުރުތައްވަނީ މަދުވެ، މުޅި ޤައުމު އޮތީ ފަޅުވެފައެވެ.
ޖަރުމަނުވިލާތުގެ ޗަންސެލަރ އެންގެލަރ މާކަލް ވިދާޅުވީ އެޤައުމުގެ ޖުމްލަ އާބާދީގެ 70 އިންސައްތައަށް ކޯވިޑް-19 ޖެހުމުގެ ފުރުޞަތު ބޮޑުކަމަށެވެ. އެއީ ވައިރަހާ ދެކޮޅަށް ބޭނުންކުރާނެ ވެކްސިނެއް ނެތުމާއި ބައްޔަށް ދެވޭނެ ވަކި ޚާއްޞަ ފަރުވާއެއް ނެތުމުންކަމަށް އޭނާ ވިދާޅުވެއެވެ.
ސްޕެއިންގެ ޙާލަތުވެސް އޮތީ ހަމަ އެފަދަ ގޮތަކަށެވެ. އެޤައުމުގެ މަދަރުސާތައް ބަންދުކޮށް، އިޓަލީވިލާތުން އެޤައުމަށް ދަތުރުކުރާ ފްލައިޓުތައްވަނީ ވަގުތީގޮތުން މެދުކަނޑާލާފައެވެ. އޭޝިޔާގެ ޤައުމުތަކުގެ ޙާލަތުވެސް ވަކި ތަފާތެއްނޫނެވެ.
ދެކުނު ކޮރެޔާގައި ވައިރަސްފެތުރެމުންދާ މިންވަރުދަނީ ހަލުވިކަމާއެކު އިތުރުވަމުންނެވެ. އާންމު ދަތުރުފަތުރަށް ބޭނުންކުރާ ރޭލުތަކާއި ރޭލު ސްޓޭޝަންތައް ސާފުކޮށް ޑިސްއިންފެކްޓުކުރުމުގެ މަސައްކަތް ކޮންމެ ދުވަހަކުވެސް ކުރެއެވެ. ނަމަވެސް ވައިރަސް އެންމެ ފުރަތަމަ ފެނުނު ޗައިނާގެ ވުހާން ސިޓީގެ ޙާލަތު އަންނަނީ ރަނގަޅުވަމުންނެވެ. ޖެނުއަރީ މަހުގެ ފަހުކޮޅުން ފެށިގެން 11 މިލިޔަން މިހުންނާއެކު ބަންދުކޮށްފައި އޮތް އެސިޓީގެ ސުޕަމާކެޓުތަކާއި އެހެން ވިޔަފާރިތައް މަޑުމަޑުންދަނީ ހުޅުވަމުންނެވެ. ވައިރަހާ ދެކޮޅަށް ޗައިނާއިން ކުރަމުންދާ މަސައްކަތް ކާމިޔާބުވާކަމަށްވަނީ ބެލެވިފައެވެ.
ޝަންހާއީގައި ހުންނަ ފަތުރުވެރިންގެ މެދުގައި މަޤުބޫލު ޑިޒްނީލޭންޑުވެސްދަނީ މަރުހަލާތަކަކަށް ބަހާލައިގެން ހުޅުވަމުންނެވެ. ނަމަވެސް ރައްކާތެރިކަމުގެ ފިޔަވަޅުތައް އެޅުން އަދިވެސް ހުއްޓައެއް ނުލައެވެ. އެޕާކަށް ޒިޢާރަތްކުރާ ކޮންމެ މީހެއްގެ ހަށިގަނޑުގެ ހޫނުމިން ބަލައެވެ. އަދި ޕާކުތެރޭގައި އުޅެންޖެހެނީ މާސްކު އަޅައިގެންނެވެ.
ވައިރަހުން ރައްކާތެރިވުމުގެ ފިޔަވަޅެއްގެ ގޮތުން އަތާއި އަތް ޖޯޑުކޮށް ސަލާމްކުރުންވެސް މިހާރުވަނީ މަދުވެފައެވެ.