ދުނިޔޭގައި ފެތުރެމުންދާ ކޯވިޑް-19ގެ ސަބަބުން ވައިގެ ދަތުރުފަތުރުގެ ޚިދުމަތްދޭ އެއަރލައިންތަކަށް 63 ބިލިއަނާއި 113 ބިލިއަން ޑޮލަރުގެ ދެމެދުގެ ޢަދަދަކަށް ގެއްލުންވާނެކަމަށް ލަފާކުރެވޭކަމަށް އިންޓަނެޝްނަލް އެއަރ ޓްރާންސްޕޯޓް އެސޯސިއޭޝަން، އައިއޭޓީއޭއިން ބުނެފިއެވެ.
ވައިގެ ދަތުރުފަތުރުގެ ސިނާޢަތަށް މީގެ ކުރިން ބޮޑު ލޮޅުމެއް އައިސްފައިވަނީ 2009ވަނަ އަހަރު ދުނިޔޭގެ އިޤްތިޞާދަށް ކުރިމަތިވި ގޮންޖެހުންތަކުގެ ސަބަބުންކަމަށް އައިއޭޓީއޭގެ އިޤްތިޞާދީ މާހިރު ބްރައަން ޕިއަރސްވަނީ ވިދާޅުވެފައެވެ. 63 ބިލިއަން ޑޮލަރުގެ ގެއްލުންވެދާނެކަމަށް އަންދާޒާކޮށްފައިވާ ޙާލަތަކީ ކޯވިޑް-19 ފެތުރުން މަޑުޖެހި އިޤްތިޞާދީ ޙާލަތު ރަނގަޅުވާން ފެށުމުންނެވެ. ނަމަވެސް ވައިރަސް ފެތުރޭ މިންވަރު ކުޑަނުވާނަމަ 113 ބިލިއަން ޑޮލަރުގެ ގެއްލުންވާނެކަމަށްވަނީ އަންދާޒާކޮށްފައެވެ. އެމިންވަރަށް އާމުދަނީ ދަށަށް ދިއުމުން ފަސިންޖަރުންގެ އަތުން ލިބޭ ފައިސާގެ 19 އިންސައްތައާ ގާތްކުރާ މިންވަރެއް އުނިވާނެއެވެ.
ޗައިނާއާ ގުޅިފައިވާ ވިޔަފާރީގެ ސަރަޙައްދުތަކުގައި ބަލި ފެތުރެމުންދާނަމަ އައިއޭޓީއޭއިން އަންދާޒާކޮށްފައިވަނީ ވައިގެ ދަތުރުފަތުރުގެ ޚިދުމަތްދޭ ކުންފުނިތަކަށް 29.3 ބިލިއަން ޑޮލަރުގެ ގެއްލުންވެދާނެކަމަށެވެ.