އިސްރާއީލުގެ އާންމު އިންތިޚާބު ކާމިޔާބުވެއްޖެކަމަށް އެޤައުމުގެ ބޮޑުވަޒީރު ބެންޔަމިން ނަތަންޔާހޫ ވިދާޅުވެއްޖެއެވެ. ނަތަންޔާހޫ އެހެން ވިދާޅުވީ އިންތިޚާބުގެ ރަސްމީ ނަތީޖާ އިޢުލާނު ކުރުމުގެ ކުރިންނެވެ.
ދެވަނަ ދަޢުރަކަށް އިންތިޚާބުވުމަށް ނަތަންޔާހޫ ވާދަކުރައްވަނީ ބްލޫ އެންޑް ވައިޓް ޕާޓީގެ ބެނީ ގެންޓްޒްއާއެވެ. ނަތަންޔާހޫގެ ލިކުޑް ޕާޓީއަށް 36 ނުވަތަ 37 ގޮނޑި ކާމިޔާބުކުރެވޭނެކަމަށް ބެލެވެއެވެ. އަދި ގެންޓްޒްގެ ޕާޓީއަށް ތިރީސް ދެޔަކާ ތިރީސް ހަތަރަކާދެމެދުގެ ޢަދަދަކަށް ގޮނޑި ކާމިޔާބުކުރާނެކަމަށް ބެލެވެއެވެ. ނަމަވެސް އެއްވެސް ފަރާތަކަށް 120 މެމްބަރުންގެ ޤާނޫނުހަދާ މަޖިލީހުގެ ސާފު އަޤުލަބިއްޔަތު ލިބޭނެކަމަކަށް ނުބެލެވެއެވެ.
ނަތަންޔާހޫގެ ލިކުޑް ޕާޓީއާއި ކަނާތު ފިޔައިގެ އެހެން ޕާޓީތަކަށް ކާމިޔާބުކުރެވޭނީ އެންމެ ގިނަވެގެން 59 ނުވަތަ 60 ގޮނޑިކަމަށް ބެލެވެއެވެ. މިފަހަރުގެ އިންތިޚާބަކީ އެޤައުމުގައި އަހަރެއްގެ ތެރޭގައި ބާއްވާ ތިންވަނަ އިންތިޚާބެވެ.
އިންތިޚާބު ބޭއްވީ ނަތަންޔާހޫއާ ދެކޮޅަށް ޚިޔާނާތުގެ ޝަރީޢަތް ފެށުމުގެ ދެހަފުތާކުރިންނެވެ.