އަފްޣާނިސްތާނަށް ޞުލްޙަ ގެނައުމަށް ޠާލިބާނާއި އެމެރިކާއާ ދެމެދު އެއްބަސްވުމެއްގައި ސޮއިކޮށްފިއެވެ. ޤަތަރުގެ ވެރިރަށް ދޯހާގައި ބޭއްވުނު ރަސްމިއްޔާތެއްގައި އެމެރިކާގެ ފަރާތުން އެއްބަސްވުމުގައި ސޮއިކުރެއްވީ ޚާއްޞަ މަންދޫބު ޒަލްމޭ ޚާލިލްޒާދެވެ.
އެރަސްމިއްޔާތުގައި އެމެރިކާގެ ޚާރިޖީ ވަޒީރު މައިކް ޕޮމްޕެއޯ ބައިވެރިވަޑައިގެންނެވިއެވެ. ޠާލިބާނު ޖަމާޢަތުގެ ފަރާތުން އެއްބަސްވުމުގައި ސޮއިކުރެއްވީ އެޖަމާޢަތުގެ ސިޔާސީ މުޝީރު މުއްލާ އަބްދުލްޣަނީ ބަރާދަރުވަނީ އެއްބަސްވުމަށް އިޚްތިރާމުކުރުމަށް އެޖަމާޢަތަށް ނިސްބަތްވާ މެމްބަރުންނަށް ގޮވާލާފައެވެ. އެއްބަސްވުމުގައި ސޮއިކުރުމަށްފަހު ބަރާދަރު ބުނީ އެ އެއްބަސްވުމާއިމެދު ކުރެވޭ އުއްމީދު ބޮޑުކަމަށެވެ.
ޞުލްޙައިގެ އެއްބަސްވުމުގެ ދަށުން އެމެރިކާ ސިފައިންނާއި ގުޅިފައިވާ ފައުޖުތައް އަފްޣާނިސްތާނުން ފޭބުމުގެ މަސައްކަތް ފަށާނެއެވެ. އެއްބަސްވުމުގައިވާގޮތުން އަފްޣާނިސްތާނުގައި ތިބި އެމެރިކާއާއި ނޭޓޯގެ އަސްކަރީ ފައުޖުތައް ވަކި މުއްދަތެއްގެ ތެރޭގައި އެޤައުމުން ފައިބާނެއެވެ. އަދި އަލްޤައިދާ ހިމެނޭގޮތަށް އިދިކޮޅު ހަނގުރާމަވެރި ފައުޖުތަކުން އެމެރިކާއާއި އެޤައުމަށް ވާގިވެރިވާ ޤައުމުތަކަށް ބިރުދެއްކުމަށް އަފްޣާނިސްތާނު ބޭނުން ކުރުން މަނާކުރުމަށް ޠާލިބާނުން އެއްބަސްވިއެވެ. ޕޮމްޕެއޯ ވިދާޅުވީ ޠާލިބާނުން އެއްބަސްވުމާ އެއްގޮތަށް ޢަމަލުކުރާނަމަ އަފްޣާނިސްތާނުގައި ތިބި އެމެރިކާ ސިފައިންގެ ޢަދަދު ތޭރަހާހުން އަށްހާސް ހަސަތޭކައަށް އެއްބަސްވުމުގައި ސޮއިކުރާތާ ސަތޭކަ ތިރީސް ފަސް ދުވަހުގެ ތެރޭގައި މަދުކުރާނެއެވެ.
އެއްބަސްވުމާ އެއްގޮތަށް ދެފަރާތުން ޢަމަލުކުރަމުންދާނަމަ ކުރިއަށް އޮތް ސާދަ މަސްދުވަހުގެ ތެރޭގައި އަފްޣާނިސްތާނުގައި ވޭތުވެދިޔަ އަށާރަ އަހަރު ތިބި އެމެރިކާ ސިފައިން އެޤައުމުން އެކީ ފައިބާނެއެވެ. ނަމަވެސް ކުރިއަށްއޮތް ދުވަސްތަކަކީ ފަސޭހަ މަރުޚަލާއަކަށް ނުވާނެކަމަށް އެމެރިކާގެ ދިފާޢީ ވަޒީރު މާކު އެސްޕާރ ވިދާޅުވިއެވެ. ޠާލިބާނުންނާއި ދެމެދު ވެވުނު އެއްބަސްވުމަށް ވާގިދޭ އިތުރު ޤަރާރެއް އަފްޣާނިސްތާނާއި އެމެރިކާގެ ސަރުކާރު ގުޅިގެން އިއްޔެވަނީ އިޢުލާންކޮށްފައެވެ.
ޤަރާރު އިޢުލާންކުރެއްވުމަށް އަފްޣާނިސްތާނުގެ ރައީސް އަޝްރަފް ޣަނީއާ އެސްޕަރވަނީ އަފްޣާނިސްތާނުގެ ވެރިރަށް ކާބުލްގައި ބައްދަލުކުރައްވާފައެވެ. އެއްބަސްވުމާއެއްގޮތަށް އެމެރިކާ ސިފައިންގެ ފައުޖުތައް އަފްޣާނިސްތާނުން ފައިބަމުން ދިޔަ ނަމަވެސް އަފްޣާނިސްތާނުގެ ސަރުކާރާއި ޠާލިބާނުންނާ ދެމެދު ކުރާ މަޝްވަރާތައް ކުރިއަށް ގެންދިޔުމުގައި ދަތިތަކެއް ކުރިމަތިވެދާނޭކަމަށް ބެލެވެއެވެ