އިންޑިއާގެ ވެރިރަށް ނިއު ދިއްލީގައި ކުރި މުޒާހަރާއެއްގައި ބޮޑެތި ހަމަނުޖެހުންތަކެއް ހިނގާ 20 މީހުން މަރުވެއްޖެއެވެ.
ޢިންޑިއާގެ ރައްވެހިކަމާއި ބެހޭ ޤާނޫނަށް ގެނައި އިސްލާޙުގެ ސަބަބުން މުޒާހަރާތަކާއި އެއްވުންތައް އެޤައުމުގެ އެކި ސަރަޙައްދުތަކުގައި ފާއިތުވި ދެމަސް ދުވަހުވަނީ ބާއްވާފައެވެ. ނަމަވެސް އެމެރިކާގެ ރައީސް ޑޮނަލްޑް ޓްރަމްޕް އިންޑިޔާއަށް ކުރެއްވި ރަސްމީ ދަތުރާދިމާކޮށް އިދިކޮޅު ފަރާތްތަކުންވަނީ މުޒާހަރާތައް ވަރުގަދަކޮށްފައެވެ. ނިއު ދިއްލީގެ ފުލުހުން ބުނީ ކުރިމަތިލުންތަކުގައި 190،000އެއްހާ މީހުން ޒަޙަމްވެފައިވާކަމަށެވެ. އަނިޔާވި މީހުންގެ ތެރޭގައި އާންމުންނާއި ފުލުހުންނާއި ކުއްލި ޙާލަތުގައި މަސައްކަތްކުރާ މީހުން ހިމެނެއެވެ.
ކުރިމަތިލުންތައް ހިނގާފައިވަނީ އިންޑިއާގެ ބޮޑުވަޒީރު ނަރެންދްރަ މޯދީއާއި ޓްރަމްޕް ރަސްމީ ވާހަކަތަކަށް ބޭއްވި ހިސާބާ މާދުރުނޫން ސަރަޙައްދެއްގައެވެ. ދަނޑިބުރިއާއި ގާބުރި ހިފައިގެން ތިބި އާންމުން ނިއު ދިއްލީގެ އެކި ސަރަޙައްދުތަކުންވަނީ ފެނިފައެވެ. އެނގިފައިވާގޮތުގައި ކުރިމަތިލުންތައް ހުއްޓުވުމަށް ނިއު ދިއްލީގެ ފުލުހުން ކަރުނަ ގޭސް ބޭނުންކުރިއެވެ.
ކުރިމަތިލުންތަކުގެ ސަބަބުން ނިއު ދިއްލީގެ ބައެއް މަދަރުސާތައްވަނީ ބަންދުކޮށްފައެވެ. އަދި ބައެއް ރޭލު ދަތުރުކުރާ ސްޓޭޝަންތައްވެސްވަނީ ބަންދުކޮށްފައެވެ.