ނުރައްކާތެރި ކޮރޯނާ ވައިރަސް، ކޯވިޑް-19 އިތުރަށް ފެތުރުން ހުއްޓުވުމަށް، އެވައިރަސް އެންމެ ފުރަތަމަ ފެނިފައިވާ ޗައިނާގެ ވުހާން ސިޓީގެ ފިހާރަތަކާއި ސުޕަމާކެޓުތައް އެޤައުމުގެ ސަރުކާރުން ބަންދުކޮށްފިއެވެ. ހޫބެއި ޕްރޮވިންސުގެ ވެރިކަންކުރާ ވުހާން ސިޓީވަނީ ޖެނުއަރީ މަހުގެ ފަހުކޮޅުންފެށިގެން ވަދެނިކުމެ ނޫޅެވޭގޮތަށް ބަންދުކޮށްފައެވެ.
ކޯވިޑް-19ގެ އަސަރުކޮށްފައިވާ ސާޅީސްފަސްހާހަށްވުރެ ގިނަ މީހުން މިހާތަނަށްވަނީ ވުހާނުން ފެނިފައެވެ. ވައިރަހުގެ ސަބަބުން އެސިޓީން ސަތާރަސްތޭކައަށްވުރެ ގިނަ މީހުންވަނީ މަރުވެފައެވެ. އެގާރަ މިލިއަން މީހުންގެ އާބާދީއެއް އޮންނަ ވުހާން ސިޓީގައި ދަތުރުފަތުރުގެ ޙިދުމަތްތައް މެދުކަންޑާލާ ރަށަށް ވަދެނިކުތުން މަނާވުމުން އެސިޓީގެ މަގުތަކާއި ފިހާރަތައްވަނީ ހުސްވެފައެވެ.
އެސީޓީގެ ފިހާރަތައް ބަންދުކޮށް، އެވިޔަފާރިތަކުން މިހާރުވަނީ ގައިން ގަޔަށް ވައިރަސް ފެތުރުމުގެ ފުރުޞަތު ކުޑަކުރުމަށް ޑެލިވަރީ ޚިދުމަތް ފަށަން ނިންމާފައިވާކަން އިޢުލާނުކޮށްފަ.
ކުދި ވިޔަފާރިތަކުންވެސް މިޚިދުމަތް ފަށާނެ ކަމަށް ބުނެއެވެ.
ކޯވިޑް-19 މިހާތަނަށް ދުނިޔޭގެ ތެއްތިރީސް ޤައުމަކާއި ސަރަޚައްދަކުންވަނީ ފެނިފައެވެ. ވައިރަސްގެ އަސަރު ހަތްދިހަ ނުވަހާހާ ގާތްކުރާ ޢަދަދެއްގެ މީހުންގެ ގައިންވަނީ ފެނިފައެވެ. އަދި ދެހާސް ފައްސަތޭކައާ ގާތްކުރާ ޢަދަދަކަށް މީހުންވަނީ ވައިރަހުގެ ސަބަބުން މަރުވެފައެވެ.