މެލޭޝިޔާގެ ބޮޑުވަޒީރު މަހަތިީރު މުޙައްމަދު އެޤަައުމުގެ ރަސްގެފާނަށް އިސްތިޢުފާގެ ސިޓީ ފޮނުއްވައިފިއެވެ.
ކުރިންވެސް މެލޭޝިޔާގެ ބޮޑުވަޒީރުކަންކުރެއްވި 94 އަހަރުގެ މަހަތީރު ދެވަނަ ފަހަރަށް ބޮޑުވަޒީރުކަމަށް އިސްކުރެވުނީ 2018ވަނަ އަހަރުގެ މޭ މަހުގައެވެ. މަހާތީރުވަނީ 2009ވަނަ އަހަރުންފެށިގެން ބޮޑުވަޒީރުކަމުގައި ހުންނެވި ނަޖީބު ރައްޒާޤް އިންތިޚާބުގައި ބަލިކުރެއްވުމަށް ޕީޕަލްސް ޖަސްޓިސް ޕާޓީގެ ރައީސް އަންވަރު އިބްރާހިމާއެކު އިއްތިޙާދެއް އުފައްދަވާފައެވެ. މަހާތީރުވަނީ ހޮވިވަޑައިގެންފިނަމަ ބޮޑުވަޒީރުކަން އަންވަރާ ދައުރުގެ މެދުން ހަވާލުކުރެއްވުމަށް އެއްބަސްްވެވަޑައިގަންނަވާފައެވެ.
ނަމަވެސް ހަފުތާ ބަންދުތެރޭގައި ސަރުކާރު ހިންގާ އިއްތިޙާދުގެ ބައިވެރިންނާއި އިދިކޮޅު ޕާޓީތަކާދެމެދުވަނީ އަންވަރަށް ބޮޑުވަޒީރުކަން ޙަވާލުނުކޮށް، އައު ސަރުކާރެއް އުފެއްދުމާގުޅޭގޮތުން މަޝްވަރާކޮށްފައެވެ. އަދި މަހަތީރު ނިސްބަތްވެވަޑައިގަންނަވާ މެލޭޝިޔަންް ޔުނައިޓެޑް އިންޑިޖިނަސް ޕާޓީ ސަރުކާރު ހިންގާ އިއްތިޙާދުން ވަކިވެފައިވާކަން އެޕާޓީގެ ރައީސް މުޙްޔިއްދީން ޔާސީންވަނީ ކަށަވަރުކޮށްދެއްވާފައެވެ.
1981ވަނަ އަހަރުން 2003ވަނަ އަހަރާހަމައަށްް މެލޭޝިޔާގެ ބޮޑުވަޒީރުކަން ކުރެއްވީ މަހަތީރު އަދި އޭނާގެ ނައިބެއްގެ ގޮތުގައި 1993ވަނަ އަހަރުން 1998ވަނަ އަހަރާހަމައަށް ހުންނެވީ އަންވަރެވެ. ނަަމަވެސް، އެޤައުމަށް އޭރުކުރިމަތިވި މާލީ ދަތިކަމާމެދު އަމަލުކުރާނޭ ގޮތަކާމެދު ދެބޭފުޅުންނަށްް އެއްބަސް ނުވެވި، މަހަތީރުވަނީ އަންވަރު މަޤާމުން ދުރުކުރައްްވާފައެވެ.