ފުވައްމުލަކުގައި ހިނގި އެކްސިޑެންޓެއްގައި އަނިޔާވި 2 މީހުން އިތުރު ފަރުވާއަށް މާލެ ގެނައުމުގެ މަސައްކަތްކުރަމުންދާ ކަމަށް ފުވައްމުލަކު ހޮސްޕިޓަލުން ވިދާޅުވެއްޖެއެވެ.
ޕީއެސްއެމްނިއުސްއަށް މައުލޫމާތުދެއްވަމުން ފުވައްމުލަކު ހޮސްޕިޓަލް ހިންގެވުމާ ހަވާލުވެހުންނެވި އަހުމަދު ސަޢީދު ވިދާޅުވީ މިރޭ ހިނގި އެކްސިޑެންޓެއްގައި 2 މީހަކަށް އަނިޔާވެގެން އެހޮސްޕިޓަލަށް ގެންގޮސް ފަރުވާ ދެމުން އަންނަކަމަށެވެ. އެގޮތުން އެކެއްގެ ބޮލަށާއި ކޮނޑު ހުޅުގެ ކަށިގަނޑަށް އެކިވަރުގެ އަނިޔާވެފައިވާކަމަށާއި ދެވަނަ މީހާގެވެސް ބޮލަށް އަނިޔާވެފައިވާކަމަށް އޭނާ ވިދާޅުވިއެވެ. އަދި ދެ މީހުންނަށްވެސް ލިބިފައިވާ އަނިޔާގެ އެނގޭނީ ސީޓީ ސްކޭން ހަދައިގެންކަމަށްވާތީ އިތުރު ފަރުވާއަށް މާލެ ފޮނުވުމުގެ މަސައްކަތްކުރަމުން އަންނަކަމަށް އަޙުމަދު ސަޢީދު ވިދާޅުވިއެވެ. އެގޮތުން މިރޭ ދަންވަރު ޗަރޓަރ ފްލައިޓެއްގައި 2 މީހުން މާލެ ފޮނުވާލާނެކަމަށް އޭނާ ވިދާޅުވިއެވެ.
މިއެކްސިޑެންޓް ހިނގީ މިރޭ ފުވައްމުލަކު ސްޓޭޑިއަމް ކައިރިން ދުއްވާފައިދިޔަ ސައިކަލެއް އެތަނުގައި ހުރި ގާޑިޔަލެއްގައި ހުރި މީހެއްގެ ގައިގައި ޖެހިގެންނެވެ. މިއެކްސިޑެންޓުގައި އަނިޔާވެފައިވަނީ ސައިކަލު ދުއްވަން އިން 64 އަހަރުގެ ފިރިހެން މީހާއަށާއި ގާޑިޔާ ދުއްވަން ހުރި 32 އަހަރުގެ މީހާއަށެވެ. އެކްސިޑެންޓުވި ގަޑީގައި ސައިކަލުގެ ފަހަތުގައި 16 އަހަރުގެ ކުޑަ ކުއްޖަކުވެސް ހުރިކަމަށް ފުލުހުން މައުލޫމާތުދެއްވައެވެ. އެހެންނަމަވެސް މިއެކްސިޑެންޓުގައި އެކުއްޖާއަށް އަނިޔާއެއް ލިބިފައިނުވާކަމަށް ފުލުހުން ވިދާޅުވެއެވެ.