ކުރީގެ ރައީސް ޢަބްދުﷲ ޔާމީންގެ ސަރުކާރުގައި މެލޭޝިޔާގައި ހުރި ދިވެހިރާއްޖޭގެ އެމްބަސީން، އިންޝުއަރެންސް ސްކީމުގެ ބޭރުން މުވައްޒަފުންގެ ބޭސްފަރުވާއަށް ބޮޑު ޚަރަދެއްކޮށްފައިވާކަން އޮޑިޓް ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލްގެ އޮފީހުން އާންމުކޮށްފައިވާ 2018 ވަނަ އަހަރުގެ ފޮރިން މިނިސްޓްރީގެ އޮޑިޓް ރިޕޯޓްގައި ބުނެފައިވަނީ ދިވެހިރާއްޖޭގެ ޑިޕްލޮމެޓިކް މިޝަންތަކުގެ ވަޒީފާއަށް ފޮނުވާ މުވައްޒަފުންނަށްދޭ އެލަވަންސްތަކާއި އިނާޔަތްތައް ހަމަޖެހިފައިވާ އުސޫލަށް 2017 ވަނަ އަހަރު ގެނައި އިސްލާޙުގައި ފުރިހަމަ އިންޝުއަރެންސް ޚިދުމަތް ލިބެން ނުހުންނަ ގައުމުތަކުގައި "އޯ.ޕީ.ޑީ" ނުވަތަ އިންޝުއަރެންސް ސްކީމުން ޚަރަދު ނުލިބޭ ކަންކަމަށް ފައިސާ ދޫކުރެވިދާނެކަމަށް ބަޔާންކޮށްފައިވާކަމަށެވެ.
މި އުސޫލުގެ ދަށުން މެލޭޝިޔާގައި ހުންނަ ދިވެހިރާއްޖެ އެމްބަސީގެ މުވައްޒަފުން އެ ގައުމުގައި ހިންގާ އިންޝުއަރެންސް ސްކީމެއްގައި ބައިވެރިކޮށްފައިވީ ނަމަވެސް، އެ ސްކީމުގެ ބޭރުން ހޯދާފައިވާ ޚިދުމަތްތަކަށް އެމްބަސީގެ ބަޖެޓުން ޚަރަދުކޮށްފައިވާކަން ފާހަގަކުރެވިފައިވާ ކަމަށް އޮޑިޓް ރިޕޯޓްގައި ބަޔާންކޮށްފައިވެއެވެ.
އެގޮތުން މެލޭޝިއާގައި ހުންނަ ދިވެހިރާއްޖޭގެ އެމްބަސީއަށް ކަނޑައަޅާފައި ހުންނެވި ސަފީރާއި ސަފީރުގެ އަނބިކަނބަލުންގެ މެޑިކަލް ޗެކަޕް ހެއްދެވުމަށް ސައްބީސް ހާސް ތިން ސަތޭކަ ފަސްދޮޅަސް ރުފިޔާ އެމްބަސީގެ ބަޖެޓުން ޚަރަދުކޮށްފައިވާކަން ފާހަގަކުރެވިފައިވާ ކަމަށްވެސް ރިޕޯޓްގައިވެއެވެ. 2018 ވަނަ އަހަރު ސަފީރަކަށް ހުންނެވީ މުޙައްމަދު ފަޙުމީ ޙަސަންއެވެ.
މީގެ އިތުރުން، މެލޭޝިއާގައި ހުންނަ ދިވެހިރާއްޖޭގެ އެމްބަސީގެ މިނިސްޓަރ-ކައުންސިލަރ އާއި އެބޭފުޅާގެ އަނބިކަނބަލުންނަށް ޕްރާޑާ ބްރޭންޑްގެ އައިނު ހެއްދުމަށް ޖުމުލަ ހަތްދިހަ ދެ ހާސް ހަތަރު ސަތޭކަ ތިރީސް އަށް ރުފިޔާ އެމްބަސީގެ ބަޖެޓުން ޚަރަދުކޮށްފައިވާކަންވެސް އޮޑިޓް ރިޕޯޓްގައިވެއެވެ. އެމްބަސީގެ މިނިސްޓަރ-ކައުންސިލަރ އަކީ ޕީއެންސީގެ ރައީސް ޢަބްދުއްރަޙީމްގެ ދަރިކަލުން ފައިސަލް އިބްރާހީމެވެ.
ދިވެހިރާއްޖޭގެ ޑިޕްލޮމެޓިކް މިޝަންތަކުގެ ވަޒީފާއަށް ފޮނުވާ މުވައްޒަފުންނަށްދޭ އެލަވަންސްތަކާއި އިނާޔަތްތައް ދެމުންގެންދާ އުސޫލަށް ބަލާއިރު، މިއީ ކުރެވޭނެ ޚަރަދެއް ނޫންކަމަށްވެސް އޮޑިޓަރ ޖެނެރަލް ފާހަގަކުރައްވާފައިވެއެވެ. އަދި ދައުލަތުގެ ޚަރަދުގައި އިންޝުއަރެންސް ސްކީމެއްގައި މުވައްޒަފަކު ބައިވެރިކުރުވުމަށްފަހު، އޭގެބޭރުން އެމުވައްޒަފެއްގެ ސިއްޙީ ކަންކަމަށް ދައުލަތުން ޚަރަދުކުރުމަކީވެސް ހަމަޖެހޭ އުސޫލެއްނޫންކަމަށްވެސް އޮޑިޓަރ ޖެނެރަލް ސޮއިކުރައްވާ ނެރުނު ރިޕޯޓްގައިވެއެވެ.
އެހެންކަމުން މި ޚަރަދަކީ އާންމު އުސޫލާ ޚިލާފަށް ކޮށްފައިވާ ޚަރަދެއްކަމުން، ކަމާގުޅޭ މުއައްސަސާތަކުގެ މަޝްވަރާގެ މަތިން އެފައިސާ އަނބުރާ ހޯދުމަށް އޮޑިޓަރ ޖެނެރަލް ވަނީ ލަފާދެއްވާފައެވެ.
މީގެ އިތުރުންވެސް ދައުލަތުގެ މާލިއްޔަތު ޤަވާއިދާ ޚިލާފަށް ގިނަ ކަންކަން ކޮށްފައިވާކަން ފޮރިން މިނިސްޓްރީގެ އޮޑިޓް ރިޕޯޓުން ހާމަވެފައިވެއެވެ. އެގޮތުން މިނިސްޓްރީ އޮފް ފޮރިން އެފެއާޒްގެ ދަށުން ހިނގަމުން އަންނަ އެމްބަސީތަކުން 2018 ވަނަ އަހަރު ބަލައިގަނެފައިވާ ފައިސާގެ ތެރެއިން ރާއްޖެއިން ބޭރުގައި ދިރިއުޅޭ ދިވެހިންގެ ޕާސްޕޯޓް ހެއްދުމަށާއި އައު ކުރުމަށް ނަގާ ފައިސާއަކީ މޯލްޑިވްސް އިމިގްރޭޝަނަށް ރައްދުކުރުމަށްޓަކައި ނެގޭ ފައިސާ އެއް ނަމަވެސް، މިގޮތަށް ނެގޭ ފައިސާ އާއި ރައްދު ނުކުރެވި ބާކީ ހުރި ފައިސާގެ ހިސާބު އެކަށީގެންވާ ގޮތަށް ބަލަހައްޓާފައި ނުވާކަމަށާއި، މާލީ ބަޔާންތަކުގައި ޑިސްކްފޯސް ކޮށްފައި ނުވާ ކަން ފާހަގަ ކުރެވިފައިވާކަމަށްވެސް އޮޑިޓް ރިޕޯޓްގައިވެއެވެ.