ކާނިވާ ސަރަހައްދުގައި ފީ ދައްކައިގެން ހަތަރު ފުރޮޅުލީ އުޅަނދު ޕާކުކުރަން ބޭނުންވާ ފަރާތްތަކަށް އެކަމަށް އެދި ހުށަހެޅުމުގެ ފުރުޞަތު ހުޅުވާލައިފިއެވެ.
މާލެ ސިޓީ ކައުންސިލުން ބުނީ އަންނަމަހުގެ އެއްވަނަ ދުވަހާއި ހަމައަށް ފޯމް ހުށަހެޅުމުގެ ފުރުސަތު ހުޅުވާލާފައިވާ ކަމަށާއި، މި ޒޯނުން 52 ޕާކިން ސްލޮޓް ދޫކުރުމަށް ހަމަޖެހިފައިވާ ކަމަށެވެ. މި ޒޯނުގައި ޕާކުކުރުމަށް ދައްކަން ޖެހޭނީ މަހަކު 3000 ރުފިޔާއެވެ.
މި ޒޯނުތަކަށް އެދޭނީ އެކަމަށް ޚާއްޞަކޮށް މި ކައުންސިލުން ދޫކުރާ ފޯމުންނެވެ. މި ފޯމް ރަސްމީ ދުވަސް ދުވަހު ކައުންސިލް އިދާރާއިންނާއި ކައުންސިލުގެ ވެބްސައިޓުން ޑައުންލޯޑް ކުރެވެންވެސް ހުންނާނެކަމަށް މާލެ ސިޓީ ކައުންސިލުން ބުނެއެވެ.
މާލެ ސިޓީ ކައުންސިލުން ދަނީ މާލޭގައި ޕާކިންގ އޭރިއާތައް އިތުރުކޮށް، ޕާކިންގ ނިޒާމް ހަރުދަނާކުރަމުންނެވެ. އަދި މާލޭގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ ދަށުން ޕާކް ކުރުމަށްޓަކައި 21 ސަރަޙައްދެއްގައި ޕާކިންގ ބިލްޑިންގ އެޅުމަށް ކަނޑައަޅާފައިވާކަމަށްވެސް މާލެސިޓީ ކައުންސިލުން މީގެކުރިން ވަނީ ބުނެފައެވެ.
ސިޓީ ކައުންސިލުން މިކަން ހާމަކުރައްވާފައި ވަނީ މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށްޓަކައި ރޯޑް ޑިވޮލޮޕްމަންޓް ކޯޕަރޭޝަނާ ޙަވާލުކުރެއްވުމަށް ބޭއްވި ރަސްމިއްޔާތެއްގައެވެ.