ރާއްޖޭގައި ފަތުރުވެރިން ބޭތިއްބުމަށް ޓޫރިޒަމް މިނިސްޓްރީގައި ރަޖިސްޓްރީކޮށްފައިވާ އެނދުގެ އަދަދު 14 އިންސައްތަ އިތުުރުވެއްޖެއެވެ.
ޓޫރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ ތަފާސް ހިސާބުތައް ދައްކާގޮތުން މިއަހަރުގެ ޖެނުއަރީމަހުގެ ނިޔަލަށް ރާއްޖޭގައި ފަތުރުވެރިން ބޭތިއްބުމަށް 51958 އެނދުވަނީ ރަޖިސްޓްރީކޮށްފައެވެ. މިދިޔަ އަހަރުގެ މިމުއްދަތުގައި ރާއްޖޭގައި ފަތުރުވެރިން ބޭތިއްބުމަށް ރަޖިސްޓްރީކޮށްފައިވާ އެނދުގެ އަދަދަކީ 45565 އެވެ. އަދި ޓޫރިޒަމް މިނިސްޓްރީގައި ރަޖިސްޓްރީ ކޮށްފައިވާ 51958 އެނދުގެ ތެރެއިން 50500 އެނދު އޮޕަރޭޓް ކުރެވިފައިވާކަަމަށްވެސް އެމިނިސްޓްރީން ބުނެއެވެ. އަދި އެމުއްދަތުގައި ރާއްޖޭގައި ފަތުރުވެރިން ހޭދަކޮށްފައިވާ ބެޑްނައިޓްސްގެ އަދަދު ވަނީ 9.9 އިންސައްތަ އިތުރުވެފައެވެ. މީގެއިތުރުން އެނދު ބޭނުންކޮށްފައިވާ ނިސްބަތްވެސް 70.1 އިންސައްތައަށް އަރާފައިވާއިރު، ޖެނުއަރީމަހު އެވްރެޖްކޮށް ފަތުރުވެރިއަކު ރާއްޖޭގައި 6.3 ދުވަސް ހޭދަކޮށްފައިވާކަމަށްވެސް ތަފާސް ހިސާބުތަކުން ދައްކައެވެ.
ފަތުރުވެރިން ބޭތިއްބުމަށް ޓޫރިޒަމް މިނިސްޓްރީގައި ރަޖިސްޓްރީކޮށްފައިވާ އެނދުގެ އަދަދު އިތުރުވެފައިވާއިރު، މިދިޔަ އަހަރުގެ ޖެނުއަރީމަހާއި އަޅާބަލާއިރު، މިއަހަރުގެ ޖެނުއަރީމަހު ފަތުރުވެރިން ރާއްޖެ ޒިޔާރަތްކުރި ނިސްބަތްވެސް ވަނީ 14.3 އިންސައްތަ ކުރިއަރާފައެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ޖެނުއަރީމަހު ރާއްޖެއަށް 177140 ފަތުރުވެރިން ވަނީ ޒިޔާރަތްކޮށްފައެވެ. މީގެތެރޭގައި ވައިމަގުން ރާއްޖެއަށް ޒިޔާރަތްކުރި 173347 ފަތުރުވެރިންނާއި ކަނޑުމަގުން ރާއްޖެ ޒިޔާރަތްކުރި 3793 ފަތުރުވެރިން ހިމެނެއެވެ.