ކޯވިޑް-19 އެންމެ ބޮޑަށް ފެތުރިފައިވާ ވުހާން ސިޓީން ނެރެގެން އިންޑިޔާއަށް ގެނެސް ކަރަންޓީންކުރި 7 ދިވެހިން ކަރަންޓީނުން ދޫކޮށްލުމުން އެމީހުން މާދަމާ މާލެ ގެނެވޭނެ ކަމަށް ޚާރިޖިއްޔާއިން ބުނެފިއެވެ.
ކަރަންޓީންގެ މުއްދަތު ހަމަވުމުން އެ މީހުން ކަރަންޓީން އިން ދޫކޮށްލާފައި ވަނީ، މިރޭ އިންޑިއާ ގަޑިން މެންދަމު 12:00 ޖެހިއިރުގައެވެ.
އަދި މިރޭގެ ފަތިހުގެ ވަގުތެއްގައި އެ 7 ދިވެހިން ދިއްލީން މާލެ އައުމުގެ ދަތުރު ފަށާނެ ކަމުގައިވެސް މައުލޫމާތު ލިބިފައިވެއެވެ.
ކަރަންޓީން މުއްދަތުގެ ތެރޭގައި ވައިރަހުގެ އެއްވެސް އަލާމާތެއް މިމީހުންގެ ގައިން ފެނިފައި ނުވާތީ އެމީހުން ރާއްޖެ އައިސް އާއިލާތަކާއެކު އުޅުމުގައި އެއްވެސް ހުރަހެއް ނެތް ކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ވަނީ ވިދާޅުވެފައެވެ. އިންޑިޔާގެ ކަރަންޓީން ފެސިލިޓީގައި ތިބި މިހަތް ދިވެހިން ދޫކޮށްލުުމުން، މާދަމާ އެމީހުން ރާއްޖެ ގެނެވޭނެ ކަމުގައި ޚާރިޖިއްޔާއިން ވަނީ ވިދާޅުވެފައެވެ.
ވުހާން އިން އިންޑިއާއަށް ގެންދިޔަ 7 ދިވެހިންގެ ތެރޭގައި ހިމެނެނީ ފަސް އަންހެނަކާއި ފިރިހެންނެއްގެ އިތުރުން ކުޑަ ކުއްޖެކެވެ.
މި 7 ދިވެިން ވޫހާންއިން ނެރެގެން އިންޑިއާއަށް ގެންދިޔައީ މިމަހުގެ 2 ވަނަދުވަހުއެވެ. މި އެންމެންވެސް އިންޑިއާއަށް ގެންގޮސްފައިވަނީ ވޫހާންގެ ތިބި އިންޑިއާ ރައްޔިތުން އެ ސިޓީ ނެރުމަށްް އިންޑިއާ ސަރުކާރުން ހަމަޖެއްސި ޚާއްސަ ފްލައިޓެއްގައެވެ. މި ފްލައިޓްގައި 7 ދިވެހިންނާއި އިންޑިއާގެ 323 މީހުން ދަތުރުކުރިއެވެ.
މިމީހުން އިންޑިޔާގެ ކަރަންޓީން ފެސިލިޓީއަށް ގެންދިއުމާ ގުޅިގެން އިންޑިއާގެ ވިއޯން ނިއުސްއަށް ދެއްވި އިންޓަރވިއުއެއްގައި ރާއްޖޭގެ ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވީ މި ހަތް ދިވެހިންވެސް ކޮރޯނާ ވައިރަހަށް ނެގެޓިވްވެފައިވާކަމަށެވެ. މިމީހުން ކަރަންޓީނު ކުރީ ދިއްލީގެ މަނޭސާރުގައި ގާއިމު ކޮށްފައިވާ ޚާއްސަ ކަރަންޓީން ފެސިލިޓީޒްގައެވެ. މި ދިވެހިން ވޫހާން ސިޓީން ނެރެދިނުމަށް އިންޑިއާގެ ސަރުކާރުން ދެއްވި އެހީތެރިކަމަށް ޑިފެންސް މިނިސްޓަރ މާރިޔާ ވަނީ ޝުކުރު އަދާކުރައްވާފައެވެ.
ޗައިނާގައި ޖުމްލަ 50 ދިވެއްސަކު ދިރިއުޅެމުންދިޔަ ނަމަވެސް ސަރުކާރުގައި އެހީގައި ރާއްޖެ އަންނަން ބޭނުންވީ އޭގެތެރެއިން 7 މީހެކެވެ، މި 7 މީހުންނަކީ ކޮރޯނާ ވައިރަސް އެންމެ ބޮޑަށް ފެތުރެމުންދާ ވުހާން ސިޓީގައި ދިރިއުޅެމުން ދިޔަ 9 ދިވެހިންގެ ތެރޭގައި ހިމެނޭ ބައެކެވެ. ސަރުކާރުންވަނީ ޗައިނާގެ ވުހާން ސިޓީގައި ތިބި ދިވެހިންނަށް މާލީ އެހީތެރިކަންވެސް ފޯރުކޮށްދީފައެވެ.