ކޮރޯނާ ވައިރަސް އެންމެ ބޮޑަށް ފެތުރިފައިވާ ވުހާން ސިޓީން ގެންގޮސް އިންޑިޔާގައި ކަރަންޓީންކުރި 7 ދިވެހިން ކަރަންޓީންގެ މުއްދަތު ހަމަވުމާ ގުޅިގެން މިއަދު ކަރަންޓީނުން ދޫކޮށްލާނެއެވެ. މިމީހުން އިންޑިޔާގެ ކަރަންޓީން ފެސިލިޓީގައި ތިބި 14 ދުވަހުގެ ތެރޭގައި ވައިރަސްގެ އެއްވެސް އިތުރު އަލާމާތެއް ފެނިފައިނުވާކަމަށް މަޢުލޫމާތު ލިބިފައިވެއެވެ.
ކަރަންޓީން މުއްދަތުގެ ތެރޭގައި ވައިރަހުގެ އެއްވެސް އަލާމާތެއް މިމީހުންގެ ގައިން ފެނިފައި ނުވާތީ އެމީހުން ރާއްޖެ އައިސް އާއިލާތަކާއެކު އުޅުމުގައި އެއްވެސް ހުރަހެއް ނެތް ކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިންވަނީ ވިދާޅުވެފައެވެ. އިންޑިޔާގެ ކަރަންޓީން ފެސިލިޓީގައި ތިބި މިހަތް ދިވެހިން މިއަދު ދޫކޮށްލުުމުން، މާދަމާ އެމީހުން ރާއްޖެ ގެނައުމުގެ މަސައްކަތް ކުރަމުންދާ ކަމަށް ރާއްޖޭގެ ފޮރިން މިނިސްޓްރީން ވިދާޅުވެއެވެ.
ވުހާން އިން އިންޑިއާއަށް ގެންދިޔަ 7 ދިވެހިންގެ ތެރޭގައި ހިމެނެނީ ފަސް އަންހެނަކާއި ފިރިހެންނެއްގެ އިތުރުން ކުޑަ ކުއްޖެކެވެ.
މި 7 ދިވެިން ވޫހާންއިން ނެރެގެން އިންޑިއާއަށް ގެންދިޔައީ މިމަހުގެ 2 ވަނަދުވަހުއެވެ. މި އެންމެންވެސް އިންޑިއާއަށް ގެންގޮސްފައިވަނީ ވޫހާންގެ ތިބި އިންޑިއާ ރައްޔިތުން އެ ސިޓީ ނެރުމަށްް އިންޑިއާ ސަރުކާރުން ހަމަޖެއްސި ޚާއްސަ ފްލައިޓެއްގައެވެ. މި ފްލައިޓްގައި 7 ދިވެހިންނާއި އިންޑިއާގެ 323 މީހުން ދަތުރުކުރިއެވެ.
މިމީހުން އިންޑިޔާގެ ކަރަންޓީން ފެސިލިޓީއަށް ގެންދިއުމާ ގުޅިގެން އިންޑިއާގެ ވިއޯން ނިއުސްއަށް ދެއްވި އިންޓަރވިއުއެއްގައި ރާއްޖޭގެ ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވީ މި ހަތް ދިވެހިންވެސް ކޮރޯނާ ވައިރަހަށް ނެގެޓިވްވެފައިވާކަމަށެވެ. މިމީހުން ކަރަންޓީނު ކުރީ ދިއްލީގެ މަނޭސާރުގައި ގާއިމު ކޮށްފައިވާ ޚާއްސަ ކަރަންޓީން ފެސިލިޓީޒްގައެވެ. މި ދިވެހިން ވޫހާން ސިޓީން ނެރެދިނުމަށް އިންޑިއާގެ ސަރުކާރުން ދެއްވި އެހީތެރިކަމަށް ޑިފެންސް މިނިސްޓަރ މާރިޔާ ވަނީ ޝުކުރު އަދާކުރައްވާފައެވެ.
ޗައިނާގައި ޖުމްލަ 50 ދިވެއްސަކު ދިރިއުޅެމުންދިޔަ ނަމަވެސް ސަރުކާރުގައި އެހީގައި ރާއްޖެ އަންނަން ބޭނުންވީ އޭގެތެރެއިން 7 މީހެކެވެ، މި 7 މީހުންނަކީ ކޮރޯނާ ވައިރަސް އެންމެ ބޮޑަށް ފެތުރެމުންދާ ވުހާން ސިޓީގައި ދިރިއުޅެމުން ދިޔަ 9 ދިވެހިންގެ ތެރޭގައި ހިމެނޭ ބައެކެވެ. ސަރުކާރުންވަނީ ޗައިނާގެ ވުހާން ސިޓީގައި ތިބި ދިވެހިންނަށް މާލީ އެހީތެރިކަންވެސް ފޯރުކޮށްދީފައެވެ.