ދުނިޔޭގައި ފެތުރެމުންދާ ކޮރޯނާވައިރަސް، ކޯވިޑް-19ގެ ސަބަބުން ދުނިޔޭގެ ބާޒާރުގައި ވިއްކާ ތެލުގެ އަގަށް ބޮޑު ބަދަލެއް އަންނާނެކަމަށް ނުބެލެވޭކަމަށް އެމެރިކާގެ ހަކަތައާބެހޭ ވަޒީރު ވިދާޅުވެއްޖެއެވެ.
ރޮއިޓާރސަށް ދެއްވި ބަސްދީގަތުމެއްގައި ވާހަކަދައްކަވަމުން އެމެރިކާގެ ހަކަތައާބެހޭ ވަޒީރު ޑޭން ބްރޫއިލެޓް ވިދާޅުވީ ޗައިނާއިން ގަންނަ ތެލުގެ ޢަދަދު 500،000 ފީފާއަށް ދަށްވިނަމަވެސް ދުނިޔޭގެ ބާޒާރުގައި ތެޔޮ ވިއްކާ އަގަށް ބޮޑު ބަދަލެއް ނާންނާނެކަމަށެވެ. އޭނާ ވިދާޅުވީ ވައިރަހުގެ ސަބަބުން އިޤްތިޞާދުތަކަށް އައިސްފައިވާ ބަދަލުތަކާއެކު ދުނިޔޭގައި ތެޔޮ ގަންނަ މިންވަރު ކޮންމެވެސް ވަރަކަށް ދަށްވެއްޖެކަމަށެވެ. އޭނާ ވިދާޅުވިގޮތުގައި ޗައިނާގެ އިޤްތިޞާދަށް އިތުރު ހީނަރުކަމެއް ކުރިމަތިވެއްޖެނަމަ ދުނިޔޭގެ އިޤްތިޞާދަށް އިތުރަށް އަސަރުކުރާނެކަމަށެވެ. ނަމަވެސް މިވަގުތަށް ވައިރަހުގެ ސަބަބުން ތެލުގެ ސިނާޢަތަށް ބޮޑު ބަދަލެއް ނާންނާނެކަމަށްވެސް އެމެރިކާގެ ތެލާބެހޭ ވަޒީރު ވިދާޅުވިއެވެ.
ދުނިޔޭގެ ހަކަތައާބެހޭ އިދާރާއިން ބުނެފައިވަނީ މިއަހަރުގެ ފުރަތަމަ ހަތަރު މަސްދުވަހު ދުނިޔޭގައި ތެޔޮ ބޭނުންވާ މިންވަރުން ދުވާލެއްގެ މައްޗަށް 435،000 ފީފާ ދަށްވާނެކަމަށެވެ.