މީގެ ފަސް އަހަރު ކުރިން ގެއްލިފައިވާ މެލޭޝިޔަން އެއަރލައިންސްގެ މަތިންދާބޯޓު އެމްއެޗް370 ހޯދުމަށް އިތުރު މަސައްކަތެއް ކުރުމަށް އަދި ނިންމާފައިނުވާކަމަށް މެލޭޝިޔާގެ ސަރުކާރުން ބުނެފިއެވެ.
މެލޭޝިޔާގެ ސަރުކާރުން އެހެން ބުނެފައިވަނީ އޮސްޓްރޭލިޔާގެ ނޫހެއްކަމަށްވާ ނިއު ކޯޕުން އެމެރިކާގެ އޯޝަން އިންފިނިޓީ ކުންފުންޏާއި މެލޭޝިޔާގެ ސަރުކާރާއި ގުޅިގެން ގެއްލިފައިވާ މަތިންދާބޯޓު ހޯދުމަށް އައު މަސައްކަތްތަކެއް މިއަހަރުތެރޭގައި ފެށުމަށް މަޝްވަރާކުރަމުންދާކަމަށް ބުނެފައިވަނިކޮށެވެ. ލިބިފައިވާ އައު މަޢުލޫމާތުގެ މައްޗަށް ބިނާކޮށް، ،މަތިންދާބޯޓު ވެއްޓިފައިވަނީ އިންޑިޔާ ކަނޑުން ކުރިން ހޯދި ސަރަޙާއްދާއި އިންވެގެންވާ ސަރަހައްދަކަށްކަމަށް ބެލެވޭކަމަށް އެނޫހުން ބުނެފައިވެއެވެ. ނަމަވެސް މެލޭޝިޔާގެ ދަތުރުފަތުރާއިބެހޭ ވުޒާރާއިން ބުނެފައިވަނީ މަތިންދާބޯޓު ހޯދުމުގެ މަސައްކަތް އަލުން ފަށަން ނިންމޭފަދަ އިތުރު ހެއްކެއް ލިބިފައިނުވާކަމަށެވެ.
2014ވަނަ އަހަރުގެ މަރޗް މަހުގެ 8ވަނަ ދުވަހު 239 ފަސިންޖަރުންނާއެކު މެލޭޝިޔާގެ ވެރިރަށް ކުއަލަ ލަމްޕޫރުން ޗައިނާގެ ވެރިރަށް ބެއިޖިންގަށް ދަތުރުކުރި މެލޭޝިޔަން އެއަރލައިންސްގެ ފްލައިޓް އެމްއެޗް370އަށް ވީނުވީއެއް ނޭނގި ގެއްލުނެވެ. މެލޭޝިޔާއާއި ޗައިނާއާއި އޮސްޓްރޭލިޔާއިން 130 މިލިއަން ޑޮލަރު ޚަރަދުކޮށްގެން ދެއަހަރުދުވަސްވަންދެން މަތިންދާބޯޓު ހޯދުމަށް ކުރި މަސައްކަތްވަނީ ނާކާމިޔާބުވެފައެވެ. އޭގެ ފަހުން އޯޝަން އިންފިނިޓީ އިސްވެ މަތިންދާބޯޓު ހޯދުމަށް ކުރި މަސައްކަތުންވެސް އެބޯޓުގެ ހިލަމެއްވެފައެއް ނުވެއެވެ.