އެފްރިކާ ބައްރުގެ ޤައުމުތަކުގެ އިއްތިޙާދުކަމަށްވާ އެފްރިކަން ޔޫނިއަންގެ އަހަރީ ބައްދަލުވުން އިތިއޯޕިއާގެ ވެރިރަށް އަޑިސް އަބާބާގައި ފަށައިފިއެވެ.
އެފްރިކަން ޔޫނިއަންގެ 33ވަނަ ބައްދަލުވުމުގައި އެފްރިކާގެ ގިނަ ޤައުމުތަކުގެ އިސްވެރިން ބައިވެރިވަޑައިގަންނަވައެވެ. އެފްރިކަން ޔޫނިއަނުން ބުނެފައިވަނީ މިއަހަރުގެ ބައްދަލުވުމުގެ މައިގަނޑު މަޤުޞަދަކަށްވާނީ އެފްރިކާގައި ހިނގާމުންދާ އަސްކަރީ ކޯޅުންތަކަށް ދާޢިމީ ޙައްލެއް ގެނެސް އެބައްރުގައި ދެމެހެއްޓެނިވި ގޮތަކަށް ޞުލްޙަ ޤާއިމުކުރުންކަމަށެވެ. އަދި އަސްކަރީ ކުރިމަތިލުންތައް ހުއްޓާލާ އެފްރިކާ ބައްރަށް ތަރައްޤީއާއި ކުރިއެރުން ހޯދޭނެފަދަ އުޞޫލުތަކެއް ޤައިމުކުރުމަށްވެސް މަޝްވަރާ ކުރާނެކަމަށް އެފްރިކަން ޔޫނިއަނުންވަނީ ބުނެފައެވެ. އެގޮތުން، މިހާރު ލީބިޔާގައި ހިނގަމުންދާ ހަނގުރާމައާއި ދެކުނު ސޫދާންގައި ހިނގަމުންދާ ހަމަނުޖެހުންތަކާމެދު އެފްރިކާ ޤައުމުތަކުގެ އިސްވެރިން މަޝްވަރާކުރައްވާނެއެވެ.
އެފްރިކަން ޔޫނިއަންގެ ރިޔާސަތާ ހަވާލުވެވަޑައިގަތުމަށްފަހު ދެކުނު އެފްރިކާގެ ރައީސް ސިރިލް ރަމަފޯސާ ވިދާޅުވީ މިއަހަރުގެ ތެރޭގައި އިތުރު ދެ ބައްދަލުވުމެއް ބޭއްވުމަށް މަސައްކަތް ކުރައްވަމުންދާކަމަށެވެ. އެގޮތުން، އެއީ އެފްރިކާ ބައްރުގައި ހިނަމުންދާ ހަނގުރާމަތަކަށް ސުލްޙަވެރި ޙައްލެއް ހޯދުމުގެ މަޤުޞަދުގައި ބާއްވާ ބައްދަލުވުމަކާއި އެފްރިކާ ބައްރުގައި މިނިވަން ވިޔަފާރި ފުޅާކުރުމަށް ބާއްވާ ބައްދަލުވުމެއްކަމަށް ދެކުނު އެފްރިކާގެ ރައީސްވަނީ ވިދާޅުވެފައެވެ.