ދުނިޔޭގެ އެކި ޤައުމުތަކުން ކޮރޯނާވައިރަހާ ދެކޮޅަށް އަޅާ ފިޔަވަޅުތަކުގައި ޗައިނާގެ އިޤްތިޞާދީ ބާރުވެރިކަން ބައެއް ޤައުމުތަކަށް ހުރަހަކަށް މެދުވެރިވާކަމަށް ދައްކައެވެ. އެކި ކަންކަމުގައި ޗައިނާއަށް ބަރޯސާވާ ޤައުމުތައް ވަރަށް ގިނައެވެ، އޭގެ ތެރޭގައި އޭޝިޔާއާއި މެދުއިރުމައްޗާއި އެފްރިކާގެ ޤައުމުތައް ހިމެނެއެވެ.
ދުނިޔޭގައި ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަހުން ސަލާމަތްވުމަށް ޗައިނާގެ ބައެއް ވިޔަފާރީގެ ބައިވެރިންވަނީ އިތުރު ވިސްނުމަކާ ނުލާ ޗައިނާއިން އަންނަ ހުރިހާ ދަތުރުވެރިންނަށް ހުރަސް އަޅާފައެވެ. ނަމަވެސް ވިޔަފާރީގައި ޗައިނާއަށް ބަރޯސާވާ ގައުމުތަކުންވަނީ ކޮރޯނާވައިރަހާގުޅޭ ފިޔަވަޅުތައް އެޅުމުގައި ޗައިނާގެ ގުޅުން ހީނަރުނުވާނެގޮތް ބަލައިގެން ސިޔާސަތުތައް ބައްޓަން ކުރުމަށް މަސައްކަތްކޮށްފައެވެ. އަދި ބަޔާންތައް ދިނުމުގައިވެސް ޗައިނާގެ ޝުޢޫރަށް ރިޢާއަތްކޮށްފައިވެއެވެ. އެޤައުމުތަކުން ވިސްނަނީ ޗައިނާއާއެކު އޮންނަ ގުޅުން ހީނަރުވިޔަނުދީ އެޤައުމުތަކުގެ ރައްޔިތުންގެ އެދުމާއި އެއްގޮތަށް ފިޔަވަޅު އެޅުމަށެވެ.
ގިނަ ޤައުމުތަކުން ކޮރޯނާވައިރަހާ ގުޅިގެން އަޅާ ފިޔަވަޅުތަކުން ދުނިޔޭގެ ނަޒަރުގައި ޗައިނާގެ ތަސައްވަރަށް ކިލަނބުކަމެއް އައުމަކީ ގާތްކަމެކެވެ. އެއްވެސް ޤައުމެއްގައި ވަބާއެއްގެ ގޮތުގައި ވައިރަސް ފެތުރެނީނަމަ އެޤައުމެއްގެ އެތެރޭގެ ހާލަތަށާއި ސިޔާސީ މަޝްރަހަށް އޭގެ އަސަރު ކުރާނެއެވެ. ޚާއްޞަ ގޮތެއްގައި އިންތިޚާބަކާ ކުރިމަތިލާ ޤައުމުތަކަށެވެ. އަދި އެފަދަ ކޮންމެ ކަމަކުން ސަރަޙައްދީ ސިޔާސީ ގުޅުމަށްވެސް އަސަރުތަކެއް ކުރާނެއެވެ. ޗައިނާއިންވަނީ ބައެއް ޤައުމުތަކުން އެޤައުމާ ދެކޮޅަށް އަޅާފައިވާ ދަތުރުފަތުރުގެ ފިޔަޅުތަކާމެދު ނުރުހުން ފާޅުކޮށްފައެވެ. ޗައިނާއިން ބުނަނީ އެފަދަ ޤައުމުތަކުން އަޅާ ފިޔަވަޅުތަކަކީ ދުނިޔޭގެ ޞިއްޙަތު ޖަމްޢިއްޔާއިން ކަނޑައަޅާފައިވާ މިންގަނޑަށްވުރެ އިތުރަށް އަޅާ ފިޔަވަޅުތަކެއްކަމަށެވެ.
އިސްރާއީލުންވަނީ ޗައިނާގެ ފަތުރުވެރިން އެޤައުމަށް ދަތުރުކުރުން މަނާކޮށްފައެވެ. އިސްރާއީލަށް ކަނޑައަޅާފައިވާ ޗައިނާ ސަފީރު ސިފަކުރާގޮތުގައި އެއީ ނާޒީ ޖަރުމަންވިލާތުގެ އަނިޔާވެރިކަމުން ސަލާމަތްވާން ޔަހޫދީން އެހެން ޤައުމުތަކަށް އެތެރެވާން އުޅުމުން އަނބުރާ ފޮނުވާލުންފަދަ ފިޔަވަޅެކެވެ. ނަމަވެސް ޗައިނާގެ ސަފީރުވަނީ ފަހުން އޭނާގެ ވާހަކަ އަނބުރާ ގެންދަވާފައެވެ. އެމެރިކާއިންވެސްވަނީ އަފްޣާނިސްތާނާއި ޢިރާޤަށް ދަތުރުނުކުރުން މަނާކުރިގޮތަށް ޗައިނާއަށްވެސް އެމެރިކާ ރައްޔިތުން ދަތުރުކުރުން މަނާކޮށްފައެވެ. ޗައިނާއިން ބުނެފައިވަނީ އެއީ ހަރުދަނާ ފިޔަވަޅެއް ނޫންކަމަށެވެ.
ކެމްބޯޑިއާފަދަ ޗައިނާއަށް ބަރޯސާވާ ޤައުމުތަކުންވަނީ ޗައިނާއިން މީހުން އެޤައުމަށް އެތެރެވުން މަނާކުރުމުން ލިބޭ އިޤްތިޞާދީ އަދި ސިޔާސީ ގެއްލުމަށް ބާރުލައި ވާހަކަ ދައްކާފައެވެ. ކެމްބޯޑިއާއަކީ ޗައިނާގެ އެންމެ އިތުބާރުކުރެވޭ ރަޙުމަތްތެރިޔާއެވެ. 2016ން 2019އަށް ޗައިނާއިންވަނީ ކެމްބޯޑިއާއަށް 8 ބިލިއަން ޑޮލަރު ޚަރަދުކޮށްފައެވެ. އެއީ އެޤައުމަށް ލިބުނު އިންވެސްޓްމެންޓުގެ ތިން ބައިކުޅަ އެއްބައެވެ. ކެމްނބޯޑިއާގެ ބޮޑުވަޒީރު ހުންސެން ވިދާޅުވެފައިވަނީ ޗައިނާގައި ތިބި ކެމްބޯޑިއާގެ ރައްޔިތުން ޗައިނާގައި ތިބުމަށެވެ. އަދި ވުހާންގައި ތިބި ކެމްބޯޑިއާ ރައްޔިތުންވެސް ވައިރަހާ ދެކޮޅަށް ޗައިނާއިން ކުރާ މަސައްކަތުގައި އެއްބާރުލުންދީ އެހީތެރިވުމަށެވެ.
ޗައިނާގެ ދެކުނު އޭޝިއާގެ އެންމެ މުހިންމު ބައިވެރިޔާކަމަށްވާ ޕާކިސްތާނުން ޗައިނާއަށް ކުރާ ވައިގެ ދަތުރުތައް ހުއްޓާލިއެވެ. ނަމަވެސް 5 ދުވަސްފަހުން އަލުން ދަރުރުތައް ފެށިއެވެ. އަދި ޕާކިސްތާން ބުނެފައިވަނީ ޗައިނާގެ ޞިއްޙަތާ ބެހޭ ނިންމުންތައް ވަރަށް ރަގަޅުކަމަށާއި ޗައިނާއިން ގެންގުޅޭ ޞިއްޙަތާ ބެހޭ ސިޔާސަތުތަކަށް ޕާކިސްތާނުން އިޙުތިރާމު ކުރަން ޖެހޭކަމަށެވެ. ޗައިނާއިން ގިނަ ޢަދަދެއްގެ އިސްވެސްޓުކޮށްފައިވާ ސްރީ ލަންކާއިންވަނީ ދެޤައުމުގެ ދެމެދު އޮންނަ ގާތް ސިޔާސީ ގުޅުމަށް އިޝާރާކޮށް، އެޤައުމުގެ ރައްޔިތުން ޗައިނާއިން ބޭރުކުރުމަށް ޗައިނާއިން އެހީތެރިވެ ދިނުމުން އެކަމަށް ތަޢުރީފުކޮށްފައެވެ.
ދެކުނު އިތުމަތީ އޭޝިޔާގެ ޤައުމުތަކުންވެސްވަނީ ވަރަށް ހަރުދަނާ ފިޔަވަޅުތަކެއް އަޅާފައެވެ. ޗައިނާއިން ބޭރުގައި ކޮރޯނާވައިރަސް ޖެހިގެން މަރުވި ފުރަތަމަ މީހާ މަރުވި ފިޕިޕީންސްގެ ސަރުކާރުންވަނީ ޗައިނާގެ އެއްވެސް ސަރަޙައްދަކަށް އެއްވެސް މީހަކު ދަތުރުކުރުން މަނާކޮށްފައެވެ. އަދި ފިލިޕީންސްގެ ރައްޔިތުންވެސް ޗައިނާގެ އެއްވެސް ސަރަޙައްދަކަށް ދިއުން މަނާކޮށްފައެވެ. ފިލިޕީންސްގެ ރައީސް ވިދާޅުވެފައިވަނީ މިއީ ރައްކާތެރިކަމަށް އެޅި ފިޔަވަޅެއްކަމަށެވެ.
ސިންގަޕޫރުންވަނީ ޗައިނާ ރައްޔިތުންނަށް ވިސާ ދިނުން މަޑުޖައްސާލާފައެވެ. އަދި ޗައިނާއަށް އެތެރެވެފައިވާ ބިދޭސިންނާމެދުވެސް އެފަދަ ފިޔަވަޅެއް އަޅާފައެވެ. އަދި ހުރިހާ ޤައުމަކުން ގުޅިގެން ވައިރަސް އިތުރަށް ފެތުރުނަނުދިނުމަށް މަސައްކަތް ކުރަން ޖެހޭނެކަމަށް އެޤައުމުން ބުނެއެވެ. އަދި ޗައިނާއާއި އެކަމުގައި މަސައްކަތްކުރާ އެހެން ޤައުމުތަކުން ކުރަމުންދާ މަސައްކަތް ކާމިޔާބުވާނެކަމަށް ސިންގަޕޫރުން ޤަބޫލުކުރެއެވެ.
މިޔަންމާގައި ކޮރޯނާވައިރަސްގެ އަލާމާތެއް ފެނިފައެއް ނުވެއެވެ. އެޤައުމުންވަނީ ޗައިނާއިން އަންނަ ދަތުރުތައް ހުއްޓާލާފައެވެ. އަދި ވުހާންގައި ކިޔަވަން ތިބި އެޤައުމުގެ 59 ދަރިވަރުންވެސް އަނބުރާ ޤައުމަށް ގެނަސްފައެވެ. މިޔަންމާއިން ބުނެފައިވަނީ ޗައިނާއާއެކު އޮންނަ ގުޅުން ރަގަޅުކުރުމަށް މަސައްކަތް ކުރާނީ ޤައުމީ މަސްލަހަތަށްވެސް އިސްކަންދީގެންކަމަށެވެ.
ތައިލެންޑަށް ޗައިނާއިންކުރާ ދަރތުރުތައްވަނީ 80 އިންސައްތައަށް މަދުވެފައެވެ. ތައިލެންޑުގެ ސަރުކާރުން ބުނެފައިވަނީ ދަތުރުތައް ހުއްޓާލާ ޗައިނާ ރައްޔިތުންނަށް ވިސާ ދިނުން ހުއްޓާލަންވެސް ނުޖެހޭކަމަށެވެ. އެކަން އެގޮތަށް ކޮށްފިނަމަ އިޤްތިޞާދީ ބޮޑު އަނދަވަޅަކާ ކުރިމަތިލާންޖެހިދާނެކަމަށް އެޤައުމުގެ ސަރުކާރުން ބުނެއެވެ.
ދުނިޔޭގެ އެކި ޤައުމުތަކުން ކޮރޯނާވައިރަހާ ދެކޮޅަށް އަޅާފައިވަނީ އެކި ފެންވަރުގެ ރައްކާތެރިކަމުގެ ފިޔަވަޅުތަކެވެ. ގިނަ ޤައުމުތަކުން މަސައްކަތްކުރަނީ ޗައިނާއާއެކު އޮންނަ ގުޅުމާއި އިޤްތިޞާދަށް އަސަރުނުކުރާނެ ގޮތަކަށް އަމަލުކުރެވޭތޯއެވެ. އެކަމުން އިސްތިސްނާވަނީ ދުނިޔޭގެ ވަރަށް މަދު ޤައުމެކެވެ.