ދަނޑުވެރިކަމުގެ ސިނާޢަތް ކުރިއެރުވުމަށް އިންޑިއާގެ ސަރުކާރުން 40 ބިލިއަން ޑޮލަރު އިންވެސްޓްކުރަނީ
އިންޑިއާގެ ސަރުކާރުން އެޤައުމުގެ ދަނޑުވެރިކަމުގެ ސިނާޢަތް ކުރިއެރުވުމަށް 40 ބިލިއަން އެމެރިކާ ޑޮލަރު އިންވެސްޓް ކުރުމަށް ނިންމައިފިއެވެ.
2020ވަނަ އަހަރާ 2021ވަނަ އަހަރުގެ ދަޢުލަތުގެ ބަޖެޓު ޤާނޫނުހަދާ މަޖިލީހަށް ހުށަހަޅުއްވަމުން އެޤައުމުގެ މާލީ ވަޒީރު ނިރްމަލާ ސިތާރަމަން ވިދާޅުވީ ބަޖެޓުން ދަނޑުވެރިކަމުގެ ސިނާޢަތް ކުރިއަރުވާ ދަނޑުވެރިންގެ މަސައްކަތްތަކަށް ލުއިފަސޭހަކަން ހޯދައިދިނުމަށް %39.8 ބިލިއަން އެމެރިކާ ޑޮލަރު ސަރުކާރުން ހޭދަކުރާނެކަމަށެވެ. އެފައިސާއިން އިރުން ހަކަތަ އުފައްދާނެ ނިޒާމުތައް ޤާއިމުކޮށް ދަނޑުވެރިންގެ އުފެއްދުންތައް ރައްކާތެރި ކުރާނެ ވަޞީލަތްތައް ޤާއިމުކުރުމުގެ މަސައްކަތްތައްވެސް ކުރާނެކަމަށް އޭނާ ވިދާޅުވިއެވެ.
ދަނޑުވެރިކަމުގެ ސިނާޢަތަކީ އިންޑިއާގެ ޖީޑީޕީގެ %15 ޙިއްސާކުރާ ސިނާޢަތެކެވެ. އެޤައުމުގެ އާބާދީގެ ދެބައިކުޅަ އެއްބައި މީހުންނަކީ ދަނޑުވެރިކަމުގެ ސިނާޢަތުގައި މަސައްކަތްކުރާ މީހުންނެވެ. މީގެ އިތުރުން އިންޑިއާގައި ބޯފެނުގެ ޚިދުމަތްދޭ ނިޒާމު ތަރައްޤީކުރުމަށްވެސް އެތައް ބިލިއަން އެމެރިކާ ޑޮލަރެއް ޚަރަދުކުރާނެކަމަށް މާލީ ވަޒީރު ވިދާޅުވިއެވެ. އޭނާ ވިދާޅުވީ އަލަށް ހުށަހަޅާފައިވާ ބަޖެޓުގައި ސަރުކާރުގެ ދަރަނި އެގައުމުގެ ޖީޑީޕީއާ އަޅާބަލާއިރު %3.8 މަތިވާނެކަމަށާއި އެއީ މިއަހަރަށް ކަނޑައަޅާފައިވާ %3.3އަށްވުރެ މަތީ ޢަދަދެއްކަމަކެވެ.